പണത്തിന് പെട്ടെന്നൊരു ആവശ്യം വന്നാല്‍ കടം വാങ്ങാതെയിരിക്കാൻ പലർക്കും നിവൃത്തിയില്ല. വ്യക്തികള്‍ക്ക് പലപ്പോഴും വിവിധ തരത്തിലുള്ള വായ്പകള്‍ എടുക്കേണ്ടി വരുന്നു. കാര്‍ ലോണുകളോ ഭവനവായ്പകളോ വിദ്യാഭ്യാസ വായ്പകളോ വ്യക്തിഗത വായ്പകളോ അങ്ങനെ ഏതുമാവാം. കൃത്യമായ സമ്പാദ്യശീലം വളര്‍ത്തിയെടുത്താല്‍ കടം വാങ്ങേണ്ടതില്ലെന്നതാണ് കാര്യം. എന്നിരുന്നാലും സാഹചര്യവശാൽ കടം വാങ്ങേണ്ടി വന്നാല്‍ എങ്ങനെ എളുപ്പത്തില്‍ അടച്ചുതീര്‍ക്കാം എന്നത് അറിഞ്ഞിരിക്കാം.
സ്‌നോബോള്‍ രീതി
'സ്‌നോബോള്‍ രീതി' ലളിതമായി പറഞ്ഞാല്‍, എല്ലാ വായ്പകളിലും ഏറ്റവും ചെറിയ തുക കഴിയുന്നത്ര വേഗത്തില്‍ അടച്ചുതീര്‍ക്കുക എന്നതാണ്. ഒരു ചെറിയ വായ്പ വേഗത്തില്‍ അടയ്ക്കുന്നതിന് മുന്‍ഗണന നല്‍കുക. അതേസമയം വലിയ വായ്പകള്‍ക്ക് ആവശ്യമായ ഏറ്റവും കുറഞ്ഞ പേയ്മെന്റ് മാത്രം നല്‍കുക. ചെറിയ ലോണ്‍ അടച്ചുകഴിഞ്ഞാല്‍, ഉയര്‍ന്ന ബാലന്‍സോടെ അടുത്ത വായ്പ അടയ്ക്കുന്നതിലേക്ക് നീങ്ങാന്‍ സാധിക്കും. ഏറ്റവും ചെറിയ വായ്പ അടച്ചു തീര്‍ത്തതിന് ശേഷം വലിയ വായ്പകളിലേക്ക് ശ്രദ്ധകേന്ദ്രീകരിക്കുന്നത് ലോണ്‍ അടച്ചുതീര്‍ത്തതിന്റെ ആശ്വാസവും തരുന്നു.
കൃത്യമായ പ്ലാന്‍ ഉണ്ടായിരിക്കുക
കൃത്യമായ പ്ലാന്‍ ഇല്ലാത്തതാണ് മിക്ക ആളുകള്‍ക്കും പറ്റുന്ന തെറ്റ്. അവിടെയാണ് വായ്പയോ മറ്റു കടങ്ങളോ അടച്ചു തീര്‍ക്കുന്നതില്‍ ഒരാള്‍ പരാജയപ്പെടുന്നത്. കടബാധ്യതയില്ലാത്ത ജീവിതശൈലിയുമായി മുന്നോട്ട് പോകാന്‍ ഒരു പ്ലാന്‍ തയ്യാറാക്കുക അത്യാവശ്യമാണ്. ഒരു മികച്ച പ്ലാന്‍ അഥവാ സാമ്പത്തിക ആസൂത്രണം പ്രതിബദ്ധതയും, പേയ്മെന്റുകള്‍ സമയത്തിന് അടച്ചു തീര്‍ക്കുവാനുള്ള ഉത്തരവാദിത്തവും ഉണ്ടാക്കുന്നു. കടം അടച്ചുതീര്‍ക്കുന്നിതിന് ടാര്‍ഗെറ്റ് തിയ്യതി നിശ്ചയിച്ച് ആസൂത്രണം ആരംഭിക്കുക.
വരുമാനം കരുതിവെയ്ക്കുക
കടം വീട്ടാന്‍ ഇക്വിറ്റി നിക്ഷേപത്തില്‍ നിന്നുള്ള വരുമാനം അല്ലെങ്കില്‍ ശമ്പളത്തില്‍ നിന്നുള്ള ബോണസ് അങ്ങനെ ഏതെങ്കിലും രീതിയില്‍ ചെലവുകളേയും, സമ്പാദ്യത്തേയും ബാധിക്കാത്ത രീതിയില്‍ പണം മാറ്റിവയ്ക്കാം. കടം വീട്ടുന്നതിലേക്ക് ഒരു വരുമാനം കരുതിവെയ്ക്കുക. എന്നാല്‍ വായ്പ വേഗത്തില്‍ തിരിച്ചടയ്ക്കുന്നതിന് അധികപണം വകമാറ്റിവെയ്ക്കുക എന്നതാണ് ഇവിടെ പോയിന്റ്.
അധിക ചിലവുകള്‍ പരമാവധി കുറയ്ക്കുക
ഒരു വ്യക്തി ആദ്യമേ ചെയ്യേണ്ടത് കടം വേഗത്തില്‍ അടച്ചു തീര്‍ക്കാന്‍ സ്വന്തം ബജറ്റില്‍ രേഖപ്പെടുത്തുക എന്നതാണ്. ചിലവേറിയതും ജീവിതശൈലിയുമായി ബന്ധപ്പെട്ട വിഭാഗങ്ങൾ കണ്ടെത്തുക. രണ്ട് വിഭാഗങ്ങളിലെയും ചെലവുകള്‍ വെട്ടിക്കുറയ്ക്കുക, ഏറ്റവും പ്രധാനപ്പെട്ട എല്ലാ വിഭാഗങ്ങളും ചിലവില്‍ ഉള്‍പ്പെടുത്തുക. തീര്‍ച്ചയായും കടം വേഗത്തില്‍ തിരിച്ചടയ്ക്കാന്‍ കഴിയും.
കടം വ്യക്തിജീവിതത്തില്‍ സമ്മര്‍ദ്ദമുണ്ടാക്കുന്ന ഒരു ബാധ്യതയാണ്. കടബാധ്യത സാമ്പത്തികജീവിതത്തെ എന്നപോലെ ആരോഗ്യത്തേയും ബാധിക്കാം. അതിനാല്‍ ജീവിതം കൂടുതല്‍ സന്തോഷവും സമാധാനവും നിറഞ്ഞതാക്കാന്‍ കടം വേഗത്തില്‍ അടച്ചു തീര്‍ക്കുക, അല്ലെങ്കില്‍ കടബാധ്യത ഉണ്ടാവാതെ മാറി നിൽക്കുക.