വായ്പ എടുത്തവർക്ക് അതേ ബാങ്കിൽനിന്ന് ഈടില്ലാതെ അധിക വായ്പ; അറിയേണ്ട കാര്യങ്ങളിതാ

കൊച്ചി: കച്ചടവടത്തിനോ സംരംഭത്തിനോ വേണ്ടി ബാങ്കിൽനിന്ന് വായ്പ എടുത്തവർക്ക് സന്തോഷ വാർത്ത. കുറഞ്ഞ പലിശയിൽ അതേ ബാങ്കിൽനിന്ന് നിങ്ങൾക്ക് കൂടുതൽ തുക വായ്പയായി എടുക്കാനാകും. ഇതിനായി അധിക ഈടൊന്നും നൽകേണ്ടതില്ല. നിലവിലുള്ള വായ്പയുടെ 20 ശതമാനം തുക വരെ ഇത്തരത്തിൽ ലഭിക്കും.

അധികമായി ലഭിക്കുന്ന വായ്പ തുകയ്ക്ക് പൂർണമായും സർക്കാർ ഗ്യാരന്റിയും ഉറപ്പുനൽകുന്നുണ്ട്. ബാങ്കിനെ സംബന്ധിച്ച് റിസ്ക് കുറവായതിനാൽ ഈ തുക ലഭ്യമാക്കാൻ തടസങ്ങളും ഉണ്ടാകില്ല. നാല് വർഷം കൊണ്ട് തുക തിരിച്ചടച്ചാൽ മതി. ആദ്യ വർഷം മുതലിന് മോറട്ടോറിയവും ലഭിക്കുന്നതാണ്.

റിപ്പോ ലിങ്ക്ഡ് ലെൻഡിങ് റേറ്റി നേക്കാൾ (ആർഎൽഎൽആ) ഒരു ശതമാനം അധിക പലിശ മാത്രമെ ഇത്തരം വായ്പകൾക്ക് ഈടാക്കാവൂ എന്നാണ് റിസർവ് ബാങ്കിന്റെ നിർദ്ദേശം. ആർഎൽഎൽആർ 6.65 ശതമാനം ആയ പഞ്ചാബ് നാഷണൽ ബാങ്കിൽ നിന്ന് ഇത്തരത്തിൽ അധിക തുക വായ്പ എടുത്താൽ 7.65 ശതമാനം പലിശ മാത്രമേ നൽകേണ്ടതുള്ളൂ.

Also Read: പുകയില ഉത്പന്നങ്ങൾക്ക് കൊവിഡ് സെസ് ഏർപ്പെടുത്തണമെന്ന ആവശ്യവുമായി വിദഗ്ധർ

പക്ഷെ ആർഎൽഎൽആർ ഏറ്റവും കുറഞ്ഞ നിരക്കുള്ള ബാങ്കിൽ നിന്നും ഈ വായ്പ എടുക്കാനാകില്ല. നിലവിൽ നിങ്ങൾക്ക് വായ്പയുള്ള ബാങ്കിൽ നിന്ന് മാത്രമേ ഇത്തരത്തിൽ അധിത തുക അനുവദിക്കുകയുള്ളൂ എന്നും ഓർക്കുക. കഴിഞ്ഞദിവസം എസ്‌ബി‌ഐ‌ വായ്പകളുടെ പലിശ നിരക്ക് കുറച്ചിരുന്നു. എംസിഎൽ ആർ അധിഷ്ഠിത പലിശ നിരക്കുകൾ 25 ബിപിഎസ് ആയാണ് കുറച്ചത്.

പുതുക്കിയ നിരക്കുകള്‍ 2020 ജൂണ്‍ 10 മുതല്‍ പ്രാബല്യത്തില്‍ വരും. മെയിൽ നിക്ഷേപ നിരക്ക് എസ്ബിഐ രണ്ടുതവണ കുറച്ചിരുന്നു. റിപ്പോ ലിങ്ക്ഡ് ലെന്‍ഡിംഗ് നിരക്ക് ജൂണ്‍ 1 മുതല്‍ 6.65 ശതമാനത്തില്‍ നിന്ന് 6.25 ശതമാനമായും എസ്ബിഐ കുറച്ചിട്ടുണ്ട്.