പണത്തിന് ആവശ്യം വന്നോ? 7.25 ശതമാനം പലിശ നിരക്കിൽ എസ്ബിഐ നൽകും ലോൺ
കാര്‍ഷിക രംഗത്ത് പ്രവര്‍ത്തിയ്ക്കുന്നവര്‍ക്ക് എസ്ബിഐയുടെ മൾട്ടി പര്‍പ്പസ് ഗോൾഡ് ലോൺ ലഭ്യമാണ്. നിബന്ധനകൾക്ക് വിധേയമായി 7.25 ശതമാനമാണ് പലിശ നിരക്ക്. ലോണിന് അധിക ചാര്‍ജുകൾ ഇല്ല എന്നതും പെട്ടെന്ന് ലഭ്യമാകും എന്നതുമാണ് പ്രധാന സവിശേഷത. ഉപഭോക്താക്കളുടെ സൗകര്യാര്‍ത്ഥം തിരിച്ചടയ്ക്കാൻ ആകും.
എസ്ബിഐയുടെ രാജ്യത്ത് ഉടനീളമുള്ള ഗ്രാമ, അര്‍ദ്ധ നഗരങ്ങളിലെ ശാഖകളിൽ ലോൺ ലഭ്യമാണ്.സ്വര്‍ണാഭരണങ്ങളാണ് വായ്പയ്ക്കായി ഈടു നൽകേണ്ടത്. ലോൺ എടുത്ത് ഒരു വര്‍ഷത്തിനുള്ളിൽ തിരിച്ചടയ്ക്കണം.
എന്തൊക്കെ ആവശ്യങ്ങൾക്ക് ലോൺ ലഭ്യമാകും?
കൃഷിയുമായി ബന്ധപ്പെട്ട എല്ലാ ആവശ്യങ്ങൾക്കും ഈ കാര്‍ഷിക ലോൺ പ്രയോജനപ്പെടുത്താം. കാര്‍ഷികോത്പാദനത്തിനായി മൂന്ന് ലക്ഷം രൂപ വരെയാണ് നൽകുക. മൂന്ന് ലക്ഷം രൂപയ്ക്ക് മുകളിൽ ആണ് ലോൺ തുക എങ്കിൽ 9.95 ശതമാനം പലിശ നൽകണം. ഏഴ് ശതമാനം പലിശയുള്ള കാർഷിക സ്വർണ പണയ വായ്പയ്ക്ക് മൂന്നു ശതമാനം പലിശ സർക്കാർ നൽകുന്നതായിരുന്നു സബ്‍സിഡി. ഇതു പ്രയോജനപ്പെടുത്തുന്നവര്‍ക്ക് നാലു ശതമാനം പലിശ മാത്രം നൽകിയാൽ മതി എന്നതായിരുന്നു ആകര്‍ഷണം.
എന്തൊക്കെ രേഖകൾ വേണം?
ലോണിന് അപേക്ഷിയ്ക്കുന്നതിനായി രണ്ട് പാസ്‍പോര്‍ട്ട് സൈസ് ഫോട്ടോകൾക്ക് ഒപ്പം പ്രത്യേക അപേക്ഷ പൂരിപ്പിച്ച് നൽകണം. ഐഡൻറിറ്റി പ്രൂഫായി ആധാര്‍ കാര്‍ഡോ, വോട്ടേഴ്സ് ഐഡി കാര്‍ഡോ, പാൻകാര്‍ഡോ, ഡ്രൈവിങ് ലൈസൻസ് പകര്‍പ്പോ നൽകാം.
വോട്ടര്‍ ഐഡി, പാസ്‍പോര്‍ട്ട് തുടങ്ങിയവയിൽ ഏതെങ്കിലും ഒന്ന് അഡ്രസ് പ്രൂഫായി സമര്‍പ്പിയ്ക്കാം. കൃഷിഭൂമി /കൃഷി സംബന്ധിച്ച വിവരങ്ങളും ബാങ്കിൽ സമര്‍പ്പിയ്ക്കണം. ഈടായി സ്ഥലത്തിന് പകരം സ്വര്‍ണം നൽകിയാൽ മതിയാകും. എന്നതു തന്നെയാണ് പ്രധാന ആകര്‍ഷണം.