ഇ-ഗോൾഡ് നിക്ഷേപ പദ്ധതികളിൽ നിന്ന് വരുമാനം കൊയ്യാം

കൊറോണക്കാലത്ത് സ്വർണ വില സർവകാല റെക്കോർഡുകൾ ഭേദിച്ച് കുതിയ്ക്കുന്നതാണ് ഇപ്പോഴത്തെ ട്രെൻഡ്. ഈ അവസരത്തിൽ സ്വർണം സുരക്ഷിതത്വം മാത്രമല്ല പ്രതിസന്ധി കാലത്ത് താരതമ്യേന മോശമല്ലാത്ത വരുമാനവും വാഗ്ദാനം ചെയ്യുന്നുണ്ട്. പ്രത്യേകിച്ച് ചെറുകിട നിക്ഷേപ പദ്ധതികളുടെയും സ്ഥിര നിക്ഷേപ പദ്ധതികളുടെയും ഒക്കെ പലിശ നിരക്ക് കുറഞ്ഞു കൊണ്ടിരിയ്ക്കുന്ന സാഹചര്യത്തിൽ.

സ്വർണ നാണയങ്ങൾ, ബുള്ള്യനുകൾ എന്നിവയ്ക്ക് ഒപ്പം മികച്ച ഇ-ഗോൾഡ് പദ്ധതികളിൽ നിക്ഷേപിയ്ക്കുന്നത് വരുമാന നേട്ടം തരും. സോവറൈൻ ഗോൾഡ് ബോണ്ടുകൾ, ഗോൾഡ് ഇടിഎഫ് എന്നിവയെക്കുറിച്ച് നമ്മൾ കേട്ടിട്ടുണ്ട്. ഇവ കൂടാതെയുള്ള ഇ-ഗോൾഡ് പദ്ധതികൾ അറിഞ്ഞിരിയ്ക്കാം.

ഓഹരിയധിഷ്ടിത മ്യൂച്വൽ ഫണ്ടുകളോടും ഡെറ്റ് ഫണ്ടുകളോടും ഒന്നും താത്പര്യമില്ലാത്തവർക്ക് ഗോൾഡ് ഫണ്ടുകളിൽ നിക്ഷേപിയ്ക്കാം. യഥാർത്ഥത്തിൽ ഗോൾഡ് ഇടിഎഫിലോ, ഓഹരിയധിഷ്ഠിത ഗോൾഡിൽ( ബുള്ള്യനുകളിലോ, സ്വർണ ഉത്പാദക കമ്പനികളുടെയും മറ്റും ഓഹരികളിലോ) നിക്ഷേപം നടത്തുന്ന ഫണ്ടുകളാണ് ഇത്. ഗോൾഡ് മ്യൂച്വൽ ഫണ്ടുകളിൽ നിക്ഷേപിയ്ക്കാൻ നിക്ഷേപകർക്ക് പ്രത്യേക ഡീമാറ്റ് അക്കൗണ്ട് ആവശ്യമില്ല. ഓഹരിയധിഷ്ഠിത ഫണ്ടുകൾക്ക് അക്കൗണ്ട് വേണം. എസ്ഐപി ആയും നിക്ഷേപം തുടങ്ങാവുന്നതാണ്.

സ്വർണത്തിൽ നിക്ഷേപം നടത്താൻ ആഗ്രഹിയ്ക്കുന്നവർക്ക് കമോഡിറ്റി എക്സ്ചേഞ്ചുകളെയും ആശ്രയിക്കാം. ഇലക്ട്രോണിക് രൂപത്തിലുള്ള സ്വർണത്തിൽ നിക്ഷേപിയ്ക്കാനും ട്രേഡിങ് നടത്താനും ആകും എന്നതാണ് മെച്ചം. അപ്രതീക്ഷിതമായി വിലയിൽ ഉണ്ടാകുന്ന ചാഞ്ചാട്ടങ്ങൾ ഒഴിവാക്കാൻ ഈ നിക്ഷേപ മാർഗം സഹായകരമാണ്. കാലാവധി അവസാനിയ്ക്കുമ്പോൾ സ്വർണമായോ, പണമായോ ഇത് പ്രയോജനപ്പെടുത്താം. ലിക്വിഡിറ്റിയാണ ഗോൾഡ് ഫ്യൂച്ചേഴ്സിൻെറ പ്രധാന ആകർഷണം.

ഉയർന്ന റേറ്റിങ്ങും പ്രവർത്തന മികവുമുള്ള ഫണ്ടുകൾ തന്നെ വേണം നിക്ഷേപത്തിനായി തെരഞ്ഞെടുക്കാൻ. 2020-ൽ നിക്ഷേപിയ്ക്കാൻ ഉയർന്ന റേറ്റിങ് ഉള്ളതായി നിക്ഷേപകർ ചൂണ്ടിക്കാട്ടുന്ന ഏതാനും ഫണ്ടുകൾ ഇവയാണ്.
* കോട്ടക് ഗോൾഡ് ഫണ്ട്
*ആക്സിസ് ഗോൾഡ് ഫണ്ട്
* എച്ച്ഡിഎഫ്സി ഗോൾഡ് ഫണ്ട്
*ആദ്യത്യ ബിർള സൺലൈഫ് ഗോൾഡ് ഫണ്ട്
* ഐസിഐസിഐ പ്രു റെഗുലർ ഗോൾഡ് സേവിങ്സ് ഫണ്ട്