ലോൺ എടുത്തിട്ടുണ്ടോ? ഈ മാസം മുതൽ പലിശ നിരക്കുകൾ കുറഞ്ഞേക്കും

ന്യൂഡൽഹി: റീട്ടെയ്ൽ- ലോണുകൾ എടുത്തിട്ടുണ്ടോ? ഭവന വായ്പ, വാഹന വായ്പ, വ്യക്തിഗത വായ്പകൾ എന്നിവ ഇനി എടുക്കുമ്പോൾ പലിശ നിരക്കുകൾ കുറഞ്ഞേക്കും. ബാങ്കുകൾ റീട്ടെയിൽ, എംഎസ്എംഇ വായ്പകൾക്ക് പുതിയ മാനദണ്ഡം കൊണ്ടു വരുന്നതാണ് പലിശ നിരക്കുകൾ കുറയ്ക്കുന്നത്. റിസർവ് ബാങ്ക് നിർദേശ പ്രകാരമാണിത്. ഇതിലൂടെ ഈ മാസം വിവിധ വായ്പാ നിരക്കുകൾ കുറയും എന്നാണ് റിപ്പോര്‍ട്ടുകൾ.

എക്സ്റ്റേണൽ ഇൻററസ്റ്റ് ബെഞ്ച്മാര്‍ക്ക് അധിഷ്ഠിതമാക്കി വായ്പാ പലിശ നിശ്ചയിക്കണം എന്ന് ആര്‍ബിഐ ബാങ്കുകൾക്ക് കര്‍ശന നിര്‍ദേശം നൽകിയിരിക്കുന്നതിനാൽ ആണിത്. ഫ്ലോട്ടിങ് റേറ്റ് വായ്പകൾക്കാണ് ഇതു ബാധകമാകുക.

Also Read: ഇനി ഡെബിറ്റ്, ക്രെഡിറ്റ് കാര്‍ഡ് ഉപയോഗത്തിനുണ്ട് ചില മാറ്റങ്ങൾ

ഒക്ടോബര്‍ ഒന്നു മുതൽ ഇത് പ്രാബല്യത്തിൽ കൊണ്ടു വരണമെന്നാണ് ബാങ്കുകൾക്ക് നൽകിയിരിക്കുന്ന നിര്‍ദേശം . രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐ, യൂണിയൻ ബാങ്ക് ഓഫ് ഇന്ത്യ. സെൻട്രൽ ബാങ്ക് ഓഫ് ഇന്ത്യ, പഞ്ചാബ് നാഷണൽ ബാങ്ക് , സ്വകാര്യ ബാങ്കായ ഫെഡറൽ ബാങ്ക് എന്നിവ ഇത് നടപ്പാക്കിയിട്ടുണ്ട്. മറ്റു ബാങ്കുകൾ എംസിഎൽആര്‍ അധിഷ്ഠിതമാക്കിയാണ് പലിശ നിശ്ചയിക്കുന്നത്.

നിലവിലെ എംസിഎൽആര്‍ അധിഷ്ഠിത വായ്പകൾ ഉള്ളവര്‍ക്ക് ആര്‍ബിഐ പ്രഖ്യാപിയ്ക്കുന്ന അടിസ്ഥാന പലിശ നിരക്കുകളിലെ ഇളവുകളുടെ പ്രയോജനം പൂര്‍ണമായി ലഭിയ്ക്കുന്നില്ല എന്നു ചൂണ്ടിക്കാട്ടിയാണ് നടപടി. ആര്‍ബിഐയുടെ റിപ്പോ നിരക്ക് അടിസ്ഥാനമാക്കിയോ, സര്‍ക്കാര്‍ ട്രഷറി ബില്ലുകളുടെ മൂന്നു മാസ വരുമാനം അടിസ്ഥാനമാക്കിയോ ഒക്കെ ബാങ്കുകൾക്ക് പലിശ നിരക്ക് നിശ്ചയിക്കാൻ ആകും.