സഹകരണ ബാങ്കുകളിലെ വായ്പ പലിശ നിരക്ക് കുറച്ചു, നിക്ഷേപങ്ങളുടേയും

തിരുവനന്തപുരം: സംസ്ഥാനത്തെ സഹകരണ ബാങ്കുകളിലെ വായ്പ പലിശ നിരക്ക് കുറച്ചു. പ്രാഥമിക വായ്പ സഹകരണ സംഘങ്ങൾ (സർവീസ് സഹകരണ ബാങ്കുകൾ), മലപ്പുറം ജില്ലാ സഹകരണ ബാങ്ക്, കേരള സംസ്ഥാന സഹകരണ ബാങ്ക് (കേരള ബാങ്ക്) എന്നിവ വിതരണം ചെയ്യുന്ന കാർഷികേതര വായ്പകൾക്കും അനുബന്ധ വായ്പകൾക്കും ഈടാക്കുന്ന പലിശ നിരക്കാണ് കുറച്ചത്. എട്ടര മുതൽ 12 ശതമാനം വരെയാണ് വിവിധ വായ്പകൾക്ക് നൽകുന്ന പലിശ നിരക്ക്.

ബാങ്കുകൾ നൽകുന്ന സ്ഥിര നിക്ഷേപങ്ങളുടെ പലിശ നിരക്കും കുറച്ചിട്ടുണ്ട്. വിവിധ കാലയളവിലുള്ള സ്ഥിര നിക്ഷേപങ്ങൾക്ക് അര ശതമാനം വീതമാണ് പലിശ കുറച്ചത്. നാലര മുതൽ 6.75 ശതമാനം വരെയാണ് സ്ഥിര നിക്ഷേപങ്ങളുടെ പലിശ. ഭവന, വിദ്യാഭ്യാസ, സ്വർണ, വ്യവസായ, ചികിത്സാ വായ്പകൾ അടക്കമുള്ള മറ്റു വായ്പകളുടെയും പലിശ കുറച്ചിട്ടുണ്ട്. ഭവന വായ്പകൾക്ക് അര ശതമാനം വരെ പലിശയാണ് കുറച്ചത്.

Also Read: വാഹന ഡീലര്‍മാര്‍ക്ക് ഇനി ഇന്‍ഷുറന്‍സ് പോളിസികളും വില്‍ക്കാം

കേന്ദ്ര സംസ്ഥാന സർക്കാരുകളുടെ പ്രത്യേക സ്കീമിൽ ഉൾപ്പെടുന്ന വായ്പകൾക്ക് ഈ നിരക്കുകൾ ബാധകമല്ല. മുതിർന്ന പൗരൻമാർക്ക് അരശതമാനം പലിശ അധികം ലഭിക്കും. സേവിങ്സ് നിക്ഷേപങ്ങളുടെ പലിശ നിരക്ക് പുതുക്കിയിട്ടില്ല. പലിശ നിർണയ ഉപസമിതിയുടെ തീരുമാന പ്രകാരമാണ് പലിശ നിരക്കിൽ മാറ്റം വരുത്തിയത്.