225 രൂപയുടെ കുറഞ്ഞ പ്രീമിയം; കൊറോണ വൈറസ് പരിരക്ഷയുമായി പേടിഎം

കൊച്ചി: കൊറോണ വൈറസ് പ്രതിസന്ധി കാലഘട്ടത്തിൽ പുത്തൻ ഇൻഷുറൻസ് പരിരക്ഷയുമായി എത്തിയിരിക്കുകയാണ് ഓൺലൈൻ ധനകാര്യ സേവന പ്ലാറ്റ്ഫോമായ പേടിഎം. 225 രൂപയുടെ കുറഞ്ഞ പ്രീമിയത്തിൽ കൊറോണ വൈറസ് കവറേജുള്ള രണ്ടു ലക്ഷം രൂപയുടെ ഇന്‍ഷുറന്‍സ് പോളിസിയാണ് പേടിഎം നല്‍കുന്നത്.

റിലയന്‍സ് ജനറല്‍ ഇന്‍ഷുറന്‍സുമായി ചേര്‍ന്നാണ് പേടിഎം പോളിസി അവതരിപ്പിക്കുന്നത്. കൊറോണ വൈസ് പരിശോധന ഫലം പോസറ്റീവ് ആയാല്‍ 14 ദിവസത്തെ ക്വാറന്റൈൻ ചെലവിനുള്‍പ്പടെ കവറേജ് ലഭിക്കും. മിതമായ നിരക്കിലുള്ള പ്ലാനിൽ ഇന്‍ഷുര്‍ തുകയുടെ 100 ശതമാനവും ഉപഭോക്താവിന് ലഭിക്കുന്നു. സാമ്പത്തിക സഹായത്തിനായി രോഗം പൂര്‍ണമായും ഭേദമാകും വരെ രോഗിക്ക് ഈ പോളിസി വഴി കാത്തിരിക്കേണ്ടി വരില്ല.

മൂന്നു മാസം മുതല്‍ 60 വയസുവരെയുള്ളവര്‍ക്ക് പോളിസി പരിരക്ഷ ലഭിക്കും. 25,000 രൂപ മുതല്‍ രണ്ടു ലക്ഷം രൂപവരെയാണ് ഉറപ്പു നല്‍കുന്ന ഇന്‍ഷുറന്‍സ് തുകയെന്നും പേടിഎം പ്രസ്താവനയിൽ പറഞ്ഞു. ഇനി പേടിഎം വഴി എങ്ങനെ പോളിസി എടുക്കാമെന്ന് നോക്കാം.

• ആദ്യം ആപ്പ് ഡൗൺലോഡ് ചെയ്ത് ലോഗിൻ ചെയ്യുക.
• 'ബാങ്കിങ് ആന്‍ഡ് ഫൈനാന്‍സ്' ചിഹ്നത്തിൽ ക്ലിക്ക് ചെയ്യുക.
• കൊറോണ വൈറസ് ഇന്‍ഷുറന്‍സ് ചിഹ്നത്തില്‍ ക്ലിക്ക് ചെയ്യുക.
• 25,000 മുതല്‍ 2 ലക്ഷം രൂപവരെയുള്ള തുകയില്‍ നിന്ന് നിങ്ങളുടെ പോളിസി തുക തെരഞ്ഞെടുക്കുക.
• പ്ലാന്‍ വിവരങ്ങളും നേട്ടങ്ങളും പരിശോധിക്കുക.
• പോളിസി ഉടമയുടെ പേര്, മൊബൈല്‍ നമ്പര്‍, ജനന തീയതി, ഇ-മെയില്‍ വിലാസം തുടങ്ങിയ വിവരങ്ങള്‍ പൂരിപ്പിക്കുക.
• പോളിസി ബ്രോഷര്‍ ഡൗണ്‍ലോഡ് ചെയ്യുന്നതിൽ കൂടുതല്‍ വിവരങ്ങള്‍ അറിയാനാകും.
• ഉപാധികളും നിബന്ധനകളും അംഗീകരിച്ച് പ്രീമിയം തുക അടയ്ക്കുക.

ഇതിന് പിന്നാലെ രജിസ്റ്റര്‍ ചെയ്ത ഇ-മെയില്‍ ഐഡിയിലേക്ക് രണ്ടു ദിവസത്തിനുള്ളില്‍ പോളിസി സര്‍ട്ടിഫിക്കറ്റ് വരും. പോളിസി ആരംഭിച്ച തീയതി മുതൽ 15 ദിവസത്തിനുള്ളിൽ ക്വാറന്റൈനിൽ പ്രവേശിപ്പിച്ചവരെ കവറേജിൽ ഉൾപ്പെടുത്തില്ല. ക്ലെയിമിനായി റിലയന്‍സ് ജനറല്‍ ഇന്‍ഷുറന്‍സ് വെബ്‌സൈറ്റ് സന്ദര്‍ശിക്കുക. ക്ലെയിം ഫോം, കൊവിഡ്-19 സ്ഥിരീകരണ റിപ്പോര്‍ട്ട്, ക്വാറന്റൈനില്‍ ആണെങ്കില്‍ ആശുപത്രി ബില്‍ തുടങ്ങി ആവശ്യമായ രേഖകള്‍ സമര്‍പ്പിക്കണം. ക്ലെയിം അംഗീകരിച്ചാലുടന്‍ തുക പോളിസി ഉടമയ്ക്ക് ലഭിക്കും.