സ്ഥിര നിക്ഷേപത്തിന് പ്രത്യേക കോറോണ പരിരക്ഷ; ഈ പദ്ധതി അറിയാം

കൊച്ചി: സ്ഥിര നിക്ഷേപം ഉള്ളവ‍ര്‍ക്ക് ആരോഗ്യ ഇൻഷുറൻസ് ഇല്ലെങ്കിലും ഭയപ്പെടേണ്ട. പ്രത്യേക കൊവിഡ് പരിരക്ഷാ പദ്ധതിയുമായി എത്തുകയാണ് ബാങ്കുകൾ. കൊറോണക്കാലത്ത് കൂടുതൽ നിക്ഷേപകരെ ആർഷിയ്ക്കുന്നതിന് യെസ് ബാങ്കാണ് പുതിയ പദ്ധതി അവതരിപ്പിച്ചിരിയ്ക്കുന്നത്. ബാങ്കിൽ സ്ഥിര നിക്ഷേപം നടത്തുന്നവ‍ര്‍ക്ക് പ്രത്യേക കൊറോണ സാമ്പത്തിക പരിരക്ഷയും ലഭിയ്ക്കും.

25,000 രൂപയുടെ സഹായം ആണ് ലഭിയ്ക്കുക. കുറഞ്ഞ നിക്ഷേപം ഒരു ലക്ഷം രൂപയാണ്. തുക ഉയരുന്നതിന് അനുസരിച്ച് പരിരക്ഷാ തുക ഉയരില്ല. ജോയിൻറ് അക്കൗണ്ട് ഉടമകളിൽ ഒരാൾക്ക് മാത്രമേ പരിരക്ഷ ലഭിയ്ക്കൂ. മുതി‍ര്‍ന്ന പൗരൻമാ‍ര്‍ക്ക് പരിരക്ഷ ലഭിയ്ക്കില്ല എന്ന ഒരു പ്രതിസന്ധിയും ഉണ്ട്. ഒരു വ‍ര്‍ഷത്തേയ്ക്ക് ആണ് സാമ്പത്തിക സഹായം ലഭിയ്ക്കുക.

Also Read: സേവിങ്സ് നിക്ഷേപ പലിശ വീണ്ടും കുറച്ച് എസ്ബിഐ

താരതമ്യേന ഉയർന്ന പലിശ നിരക്കാണ് സ്ഥിര നിക്ഷേപത്തിനും ഉള്ളത്. 7.25 ശതമാനമാണ് പലിശ നിരക്ക്. ആർബിഐ വിലക്കിനെ തുടർന്ന് പ്രതിസന്ധിയിൽ ആയിരുന്ന യെസ് ബാങ്ക് നില മെച്ചപ്പെടുത്തുന്നതിൻെറ ഭാഗമായി പുതിയ പദ്ധതികൾ അവതരിപ്പിയ്ക്കുകയാണ്.

മാർച്ച് 31-ന് അവസാനിച്ച പാദത്തിൽ ടി വൺ ബോണ്ടുകൾ എഴുതിത്തള്ളിയത് മൂലം ബാങ്ക് 2,628.61 കോടി രൂപയുടെ അറ്റാദായം നേടിയിരുന്നു. മുൻ വർഷം 1506.4 കോടി രൂപയുടെ നഷ്ടം നേരിട്ടിരുന്ന സ്ഥാനത്താണ് പ്രത്യേക നടപടിയിലൂടെ അറ്റാദായം ഉയർത്തിയത്.