ക്രെഡിറ്റ് കാർഡ് മോറട്ടോറിയം ഉണ്ടോ? ഇക്കാര്യം അറിഞ്ഞിരിയ്ക്കാം

കൊച്ചി: ക്രെഡിറ്റ് കാർഡ് ലോണുണ്ടോ? തിരിച്ചടവിന് സർക്കാർ പ്രഖ്യാപിച്ച മോറട്ടോറിയം പ്രയോജനപ്പെടുത്താൻ പദ്ധതിയുണ്ടോ? ക്രെഡിറ്റ് കാര്‍ഡ് ലോണുകൾക്ക് മോറട്ടോറിയം പ്രയോജനപ്പെടുത്തിയവ‍ര്‍ക്ക് പലിശ ഭാരം അധിക ബാധ്യതയാകും. ആഗസ്റ്റ് 31 വരെ ആ‍ര്‍ബിഐ മോറട്ടോറിയം നീട്ടി നൽകിയിട്ടുണ്ട്.

മോറട്ടോറിയം കാലാവധി കഴിയുമ്പോൾ വീണ്ടും മുടങ്ങിയ കാലാവധിയിലെ തുകയും ചേർത്ത് വലിയ തുക തന്നെ തിരിച്ചടയ്ക്കണ്ടതായി വരും. അതുകൊണ്ട് തന്നെ ക്രെഡിറ്റ് കാ‍ര്‍ഡ് തിരിച്ചടവുകൾക്ക് ഒരു കാരണവശാലും മോറട്ടോറിയം പ്രയോജനപ്പെടുത്താതെ ഇരിയ്ക്കുന്നതാകും നല്ലത്.

മറ്റു ലോണുകളും ആയി താരതമ്യം ചെയ്യുമ്പോൾ വളരെ ഉയ‍ര്‍ന്ന പലിശ നിരക്കാണ് ക്രെഡിറ്റ് കാര്‍ഡുകൾക്ക് ഈടാക്കുന്നത്. ആറു മാസത്തെ കുടിശ്ശികയും ചേർത്തുള്ള പ്രതിമാസ തിരിച്ചടവ് കുടുംബ ബജറ്റ് ആകെ താളം തെറ്റിയ്ക്കാനും കാരണമാകും. ഏതെങ്കിലും കാരണത്താൽ ക്രെഡിറ്റ് കാർഡ് തിരിച്ചടവുകൾ മുടങ്ങുന്നത് നിലവിലെ കട ബാധ്യത ഇരട്ടിയാക്കുകയും ചെയ്യും. ഇതു ക്രെഡിറ്റ് കാർഡുകൾ ബ്ലോക്കു ചെയ്യപ്പെടാൻ കാരണമാകും.

Also Read: മോറട്ടോറിയം പ്രയോജനപ്പെടുത്തണോ? അറിയാം ബാങ്കുകളുടെ നിബന്ധനകൾ

ക്രെഡിറ്റ് കാർഡ് മോറട്ടോറിയം ആർക്കൊക്കെ?

ഫെബ്രുവരി 29 വരെ പ്രവ‍ര്‍ത്തനക്ഷമമായിരുന്ന ക്രെഡിറ്റ് കാര്‍ഡുകൾക്കാണ് മിക്ക ബാങ്കുകളും മോറട്ടോറിയം നൽകുക. അതുപോലെ തന്നെ മാ‍ര്‍ച്ച് ഒന്നിനു ശേഷം ക്രെഡിറ്റ് കാര്‍ഡുകൾ ലഭിച്ചവ‍ര്‍ക്കും മോറട്ടോറിയം ബാധകമാകില്ല.

ക്രെഡിറ്റ് കാ‍ര്‍ഡ് ലോൺ ഉള്ളവ‍ര്‍ പെയ്മെൻറ് ചാ‍ര്‍ജ് ഈടാക്കാതിരിയ്ക്കാൻ മൊത്തം വായ്പാ തുകയുടെ അഞ്ചു ശതമാനം എങ്കിലും ഓരോ മാസവും അടയ്ക്കണം എങ്കിലും മോറട്ടോറിയം കാലാവധിയിൽ ഇതു ബാധകമാകില്ല. പിന്നീട് ജിഎസ്ടി ഉൾപ്പടെ ചേർത്ത് തുക തിരിച്ചടയ്ക്കണ്ടതായി വരും.