കാര്‍‍ഡുകള്‍ മൊബൈലില്‍ കൊണ്ട് നടക്കാം, എവിടെയും ഉപയോഗിക്കാം ;ആര്‍ബിഐയുടെ പരിഷ്കാരങ്ങള്‍ ഇങ്ങനെ...

ക്രെഡിറ്റ് കാർഡുകൾ യുപിഐ പ്ലാറ്റ്‌ഫോമുമായി ബന്ധിപ്പിക്കുമെന്ന് റിസർവ് ബാങ്ക് ഓഫ് ഇന്ത്യ (ആർബിഐ) ഗവർണർ ശക്തികാന്ത ദാസ്. ഇന്ന് നടന്ന ധനനയ പ്രഖ്യാപന സമിതിയുടേതാണ് തീരുമാനം. തുടക്കത്തിൽ, റുപേ ക്രെഡിറ്റ് കാർഡുകൾ യുപിഐ പ്ലാറ്റ്‌ഫോമുമായി ബന്ധിപ്പിക്കും. വരും ഘട്ടങ്ങളിൽ ബാക്കി കാർ‍ഡുകൾക്കും ഈ സൗകര്യങ്ങൾ ലഭ്യമാക്കും. ഈ തീരുമാനം വഴി ഡിജിറ്റൽ പേയ്‌മെന്റിന്റെ സാധ്യതകൾ വീണ്ടും വർധിക്കുമെന്നും ഗവർണർ പറഞ്ഞു.

നിലവിൽ ഭൂരിഭാഗം ഉപയോക്താക്കളും ഡെബിറ്റ് കാർഡുകൾ വഴിയോ അല്ലെങ്കിൽ കറന്റ് അക്കൗണ്ടുകൾ ബന്ധിപ്പിച്ചോ ആണ് യുപിഐ ഇടപാടുകൾ നടത്തുന്നത്. എല്ലാ ഇടപാടുകള്‍ക്കും ക്രെഡിറ്റ് കാര്‍ഡുകള്‍ ഉപയോഗിച്ചുള്ള പെയ്മെന്‍റുകള്‍ സാധ്യമല്ലായിരുന്നു. ഇപ്പോഴാണ് ഇതിന് മറുപടിയെന്നോണം ആര്‍ബിഐയുടെ പുതിയ തീരുമാനം വരുന്നത്.

26 കോടിയിലധികം ഉപയോക്താക്കളും അഞ്ച് കോടി വ്യാപാര സംവിധാനങ്ങളുമായി ഇടപാടുമുള്ള ഇന്ത്യയിലെ ഏറ്റവും വലിയ ഇൻക്ലൂസീവ് പേയ്‌മെന്റ് ഓപ്ഷനാണ് യുപിഐ. ചുരുങ്ങിയ വർഷങ്ങൾ കൊണ്ടാണ് യുപിഐ ഇത്രയധികം ജനപ്രീതിയാർജിച്ചത്. സമാനതകളില്ലാത്ത പുരോഗതി നേടിയ യുപിഐ മോഡൽ അനുകരിച്ച് പല രാജ്യങ്ങളും ഇന്ത്യയുമായി കൈ കോർത്തിട്ടുണ്ടെന്ന് ആർബിഐ ഗവർണർ ദാസ് പറഞ്ഞു. ഈ വർഷം മെയ് മാസത്തിൽ മാത്രം യുപിഐ വഴി ഏകദേശം 594 കോടി, അതായത് 10.4 ലക്ഷം കോടി രൂപ ധനവിനിമയെ നടന്നതെന്നും അദ്ദേഹം കൂട്ടിച്ചേർത്തു.

സ്വർണ്ണവിലയിൽ വർധന
യുപിഐ അഥവാ (യൂണിഫൈഡ് പേയ്‌മെന്റ് ഇന്റർഫേസ്) ഒന്നിലധികം ബാങ്ക് അക്കൗണ്ടുകളെ ഒരൊറ്റ മൊബൈൽ ആപ്ലിക്കേഷനു കീഴിലേക്ക് കൊണ്ടു വരുന്ന ഒരു സംവിധാനമാണ്. നിരവധി ബാങ്കിംഗ് ഫീച്ചറുകൾ, തടസ്സമില്ലാത്ത ഫണ്ട് റൂട്ടിംഗ്, മർച്ചന്റ് പേയ്‌മെന്റുകൾ എന്നിവ വളരെ പെട്ടെന്ന് ഉപയോക്താവിന് ലഭിക്കാവുന്ന തരത്തിലാണ് യുപിഐ പ്രവർത്തിക്കുന്നത്. ആവശ്യത്തിനും സൗകര്യത്തിനും അനുസരിച്ച് ഷെഡ്യൂൾ ചെയ്യാനും പണം നൽകാനും കഴിയുന്ന "പിയർ ടു പിയർ" എന്ന സംവിധാനവും യുപിഐക്കുണ്ട്.