സ്ഥിര നിക്ഷേപം എന്നത് ബാങ്കുകളോ, ബാങ്കിങ് ഇതര ധനകാര്യ സ്ഥാപനങ്ങളോ നല്‍കുന്ന ഒരു സാമ്പത്തിക ഉപകരണമാണ്, ഇത് നിക്ഷേപകര്‍ക്ക് നല്‍കിയിരിക്കുന്ന മെച്യൂരിറ്റി തീയതി വരെ ഒരു സാധാരണ സേവിങ്‌സ് അക്കൗണ്ടിനേക്കാള്‍ ഉയര്‍ന്ന പലിശ നിരക്ക് നല്‍കുന്നു. എന്നാൽ നിബന്ധനകൾ ഏറെയാണ്. അതേസമയം, എസ്.ഡബ്ല്യു.പി. നിക്ഷേപകര്‍ക്ക് നിശ്ചിത ഇടവേളകളില്‍ നിശ്ചിത തുക പിന്‍വലിക്കാന്‍ അവസരം നല്‍കുന്നു.
എന്താണ് സിസ്റ്റമാറ്റിക് വിത്‌ഡ്രോവല്‍ പ്ലാന്‍?
നിക്ഷേപങ്ങളില്‍ നിന്നു റിസ്‌ക് കൂടാതെ വരുമാനം നേടാന്‍ ആഗ്രഹിക്കുന്നവര്‍ ഇന്നും ഏറ്റവും കൂടുതല്‍ ആശ്രയിക്കുന്നത് ബാങ്ക് സ്ഥിര നിക്ഷേപങ്ങളേയോ, പോസ്റ്റ് ഓഫീസ് നിക്ഷേപങ്ങളേയോ ആണ്. എന്നാല്‍ ഈ രീതികള്‍ വഴിയുള്ള പലിശനിരക്കു താഴ്ന്നു നില്‍ക്കുന്നത് വലിയ തിരിച്ചടിയാണ്. പ്രത്യേകിച്ച് റിട്ടയര്‍മെന്റ് സമ്പാദ്യം നിക്ഷേപിച്ചിരിക്കുന്ന മുതിര്‍ന്ന പൗരന്‍മാര്‍ക്ക്. ഇവിടെയാണ് മൂച്വല്‍ഫണ്ടുകളും അവരുടെ എസ്.ഡബ്ല്യു.പി. പദ്ധതിയും ശ്രദ്ധ നേടുന്നത്.
Also Read: വായ്പയെടുത്തു തുടങ്ങിയ വാനില കൃഷി ചതിച്ചു; കോഴിക്കൃഷിയിലൂടെ 20 ലക്ഷം ആദായം നേടി വീട്ടമ്മ
ഈ പദ്ധതിക്കു കീഴില്‍ നിക്ഷേപകന് അവര്‍ നടത്തിയ നിക്ഷേപത്തില്‍ നിന്ന് പ്രതിമാസം / ത്രൈമാസ / വര്‍ഷം ക്രമത്തില്‍ ആദായം നേടാം. നിലവിലുള്ള ഏതെങ്കിലും മ്യൂച്വല്‍ ഫണ്ട് പദ്ധതിക്കും ഇത്തരം സൗകര്യം നല്‍കാവുന്നതാണ്. എഫ്.ഡികള്‍ ദീര്‍ഘകാലത്ത് പോലും 5- 7 ശതമാനം പലിശ വാഗ്ദാനം ചെയ്യുമ്പോള്‍, മ്യൂച്വല്‍ ഫണ്ട് നിക്ഷേപങ്ങള്‍ 10 ശതമാനത്തിനു മുകളില്‍ ആദായം നല്‍കുന്നതായാണ് റിപ്പോര്‍ട്ടുകള്‍ വ്യക്തമാക്കുന്നത്.
എസ്.ഡബ്ല്യു.പിയുടെ പ്രയോജനങ്ങള്‍
- സ്ഥിര നിക്ഷേപങ്ങള്‍, പോസ്റ്റ് ഓഫീസ് നിക്ഷേപങ്ങള്‍ തുടങ്ങിയ പരമ്പരാഗത നിക്ഷേപങ്ങളില്‍ നിന്നു ലഭിക്കുന്ന വരുമാനത്തിനേക്കാള്‍ കുറഞ്ഞ നികുതി ഭാരമേ എസ്.ഡബ്ല്യു.പികള്‍ക്ക് ഉണ്ടാകൂ.
- എസ്.ഡബ്ല്യു.പി. കൂടുതല്‍ വഴക്കമുള്ളതാണ്, കാരണം നിങ്ങളുടെ ആവശ്യങ്ങള്‍ക്ക് അനുസരിച്ച് ആനുകാലിക പിന്‍വലിക്കല്‍ മാറ്റാന്‍ ഇത് അനുവദിക്കുന്നു. എന്നാല്‍ എഫ്.ഡികളിലും മറ്റും ഇതു സാധ്യമല്ല.
- എസ്.ഡബ്ല്യു.പികളുടെ കാര്യത്തില്‍, കാലാകാലങ്ങളില്‍ എത്ര തുക പിന്‍വലിക്കണമെന്ന് ഉപയോക്താക്കള്‍ക്ക് തീരുമാനിക്കാം. എന്നാല്‍ ഇന്‍കം ഡിസ്ട്രിബ്യൂഷന്‍ കം ക്യാപിറ്റല്‍ പിന്‍വലിക്കല്‍ (ഐ.ഡി.സി.ഡബ്ല്യു) പേ- ഔട്ട് ഓപ്ഷനുകളുടെ കാര്യത്തില്‍ ഇതു സാധ്യമല്ല.
Also Read: മാസം ലക്ഷങ്ങൾ വരെ സമ്പാദിക്കാം; വീട്ടിലും ആരംഭിക്കാം ബെഡ്ഷീറ്റ് ബിസിനസ്
- ലാഭം/ നഷ്ടം പരിഗണിക്കാതെ മുഴുവന്‍ പണമൊഴുക്കിന്മേലും ഐ.ഡി.സി.ഡബ്ല്യു ഓപ്ഷൻ നികുതി ചുമത്തുന്നു. അതേ സമയം, എസ്.ഡബ്ല്യു.പിക്ക്, റിഡീം ചെയ്ത യൂണിറ്റുകള്‍ക്ക് മാത്രം ഉപയോക്താവിന് ബാധ്യതയുള്ളു.
- ഐ.ഡി.സി.ഡബ്ല്യു. വിതരണത്തില്‍ ടി.ഡി.എസ്. ഈടാക്കുന്നു. ഇത് നികുതി വ്യവഹാരത്തിന്റെ അധിക ഘട്ടത്തിലേക്ക് ഉപയോക്താവിനെ നയിക്കുന്നു. എസ്.ഡബ്ല്യു.പിയുടെ കാര്യത്തില്‍ ഇത് അങ്ങനെയല്ല. കാരണം നികുതി കാര്യങ്ങള്‍ പൂര്‍ണമായും നിക്ഷേപകന്റെ കൈകളിലാണ്.
എസ്.ഡബ്ല്യു.പിയും നികുതിയും
എസ്.ഡബ്ല്യു.പി. തുക പിന്‍വലിക്കുമ്പോള്‍ മൂലധന നേട്ടത്തിന് നികുതി ബാധ്യതയുണ്ട്. യൂണിറ്റ് വാങ്ങിയ വിലയേക്കാള്‍ വില്‍ക്കുന്ന സമയത്തുള്ള എന്‍.എ.വി. കൂടുതലാണെങ്കിലാകും ഇത് ബാധകമാകുക. മൂലധന നേട്ടത്തെ താഴെ പറയുന്ന വ്യവസ്ഥകള്‍ അനുസരിച്ച് ഹ്രസ്വകാലം അല്ലെങ്കില്‍ ദീര്‍ഘകാലമായി നിര്‍വചിക്കാം.
ഇക്വിറ്റി ഓറിയന്റഡ് ഫണ്ടുകള്‍- നിക്ഷേപ തീയതി മുതല്‍ 12 മാസത്തിനുള്ളില്‍ റിഡീം ചെയ്താല്‍, ഇവ ഹ്രസ്വകാല നേട്ടമായി കണക്കാക്കുകയും 15 ശതമാനം നികുതി ചുമത്തുകയും ചെയ്യും. നിക്ഷേപ തീയതി മുതല്‍ 12 മാസത്തിനു ശേഷമുള്ള നേട്ടങ്ങള്‍ ദീര്‍ഘകാലാടിസ്ഥാനത്തിലും, ഒരു സാമ്പത്തിക വര്‍ഷത്തില്‍ ഒരു ലക്ഷം രൂപ വരെ നികുതി രഹിതമായും കണക്കാക്കുന്നു. ഒരു ലക്ഷം രൂപയില്‍ കൂടുതലുള്ള ദീര്‍ഘകാല മൂലധന നേട്ടത്തിന് 10 ശതമാനം മാത്രമേ നികുതിയുള്ളൂ.
Also Read: പി.എഫ്. നിക്ഷേപങ്ങള്‍ക്കു നികുതി? ഉപയോക്താക്കള്‍ അറിയേണ്ട കാര്യങ്ങള്‍
നോണ്‍ ഇക്വിറ്റി ഫണ്ടുകള്‍- നിക്ഷേപ തീയതി മുതല്‍ 36 മാസത്തിനുള്ളില്‍ (ഹ്രസ്വകാല മൂലധന നേട്ടമായി കണക്കാക്കുന്നു) റിഡീം ചെയ്താല്‍, നേട്ടങ്ങള്‍ നിക്ഷേപകന്റെ വരുമാനത്തില്‍ ചേര്‍ക്കുകയും അയാള്‍ക്ക്/ അവര്‍ക്ക് ബാധകമായ നിരക്കില്‍ നികുതി ചുമത്തുകയും ചെയ്യും. മൂന്നു വര്‍ഷത്തിനു ശേഷമുള്ള നേട്ടങ്ങള്‍ ദീര്‍ഘകാലമായി കണക്കാക്കുകയും ഇന്‍ഡെക്‌സേഷന്‍ ആനുകൂല്യങ്ങള്‍ അനുവദിച്ചതിന് ശേഷം 20 ശതമാനം നികുതി ചുമത്തുകയും ചെയ്യും.