ഫ്രാങ്ക്‌ളിൻ ടെമ്പിൾട്ടൺ നിക്ഷേപകർക്ക് പണം തിരികെ ലഭിച്ച് തുടങ്ങി

ഒരു വർഷത്തോളമായി പ്രവർത്തനം മരവിപ്പിച്ച ഫ്രാങ്ക്‌ളിൻ ടെമ്പിൾട്ടണിന്റെ ഡെറ്റ് ഫണ്ടുകളിലെ നിക്ഷേപകർക്ക് പണം തിരികെ ലഭിച്ച് തുടങ്ങി. അഞ്ച് ഫണ്ടുകളിലായി 9,122 കോടി രൂപയാണ് വിതരണം ചെയ്യുന്നത്. ചൊവ്വാഴ്ച മുതലാണ് ഫണ്ട് വിതരണം ചെയ്യാൻ തുടങ്ങിയത്. അൾട്രാ ഷോർട്ട് ടേം ഫണ്ടിലെ നിക്ഷേപകർക്ക് 5,075 കോടി രൂപയാണ് വിതരണം ചെയ്തത്.

ലോ ഡ്യൂറേഷൻ ഫണ്ടിലെ നിക്ഷേപകർക്ക് 1,625 കോടി രൂപയും ഡൈനാമിക് അക്രുവൽ ഫണ്ടിൽ നിക്ഷേപം നടത്തിയവർക്ക് 1,025 കോടി രൂപയും തിരികെ നൽകി. ഷോർട്ട് ടേം ഇൻകം ഫണ്ടിൽ 469 കോടി രൂപയും ക്രെഡിറ്റ് റിസ്ക് ഫണ്ടിൽ 926 കോടി രൂപയുമാണ് വിതരണം ചെയ്യാനുള്ളത്. ആറ് ഫണ്ടുകളിലായി ഏകദേശം 17,000 കോടി രൂപ ഇനിയും വിതരണം ചെയ്യാനുണ്ട്. നിലവിലെ നിക്ഷേപ തുക വിതരണം ചെയ്യുന്നതിനും ബാക്കിയുള്ളവ തിരിച്ചെടുക്കുന്നതിനും എസ്ബിഐ മ്യൂച്വൽ ഫണ്ടിനെയാണ് സുപ്രീംകോടതി ചുമതലപ്പെടുത്തിയിട്ടുള്ളത്.

Also Read: സർവകാല റെക്കോർഡ് തകർത്ത് ബിറ്റ്കോയിൻ; ഒരു കോയിന് വില 37.43 ലക്ഷം രൂപ !

ആറ് സ്കീമുകളിലായി ഏകദേശം മൂന്ന് ലക്ഷം നിക്ഷേപകരാണുള്ളത്. വിതരണ പ്രക്രിയ ഫെബ്രുവരി 22 നകം പൂർത്തിയാക്കണം. വിതരണം പൂർത്തിയാക്കുന്നതിന് എസ്‌ബി‌ഐ മ്യൂച്വൽ ഫണ്ടുമായി സഹകരിക്കാനും ആവശ്യമായ വിശദാംശങ്ങൾ നൽകാനും സുപ്രീംകോടതി ഫ്രാങ്ക്ളിൻ ടെമ്പിൾട്ടന് നിർദ്ദേശം നൽകിയിട്ടുണ്ട്. കഴിഞ്ഞവർഷം ഏപ്രിൽ 23ന് വീണ്ടെടുക്കൽ സമ്മർദ്ദവും ബോണ്ട് വിപണിയിലെ പണലഭ്യതയുടെ അഭാവവും ചൂണ്ടിക്കാട്ടിയായിരുന്നു ഫ്രാങ്ക്ളിൻ ടെമ്പിൾട്ടണിന്റെ ആറ് പദ്ധതികൾ അടച്ചത്.