സ്വർണം പണയംവച്ച് വായ്പ എടുത്തവർക്കും മൊറട്ടോറിയം ക്യാഷ്ബാക്ക് ലഭിക്കും

കൊച്ചി: മൊറട്ടോറിയം കാലത്തെ പലിശ ഒഴിവാക്കൽ പദ്ധതിക്ക് സ്വർണ വായ്പ എടുത്തവരും അർഹരാണെന്ന് ധനമന്ത്രാലയം അറിയിച്ചു. ലോക്ക് ഡൗൺ കാലത്ത് ബാങ്കുകൾ ഈടാക്കിയ പലിശയ്ക്ക് ഇളവ് നൽകുന്ന 'പലിശയുടെ പലിശ' എന്ന പദ്ധതിയുടെ ഭാഗമായാണ് സ്വർണ വായ്പക്കാർക്കും സർക്കാർ ഇളവുകൾ പ്രഖ്യാപിച്ചത്. സുപ്രീംകോടതിയുടെ നിർദേശപ്രകാരമാണ് കൂട്ടുപലിശയും സാധാരണ പലിശയും തമ്മില്‍ വ്യത്യാസമുള്ള തുക എക്സ് ഗ്രേഷ്യ പേയ്മെന്റായി നൽകാൻ അനുവദിക്കുന്ന പദ്ധതിക്ക് കേന്ദ്ര സര്‍ക്കാര്‍ അംഗീകാരം നല്‍കിയത്.

2020 മാർച്ച് 1 മുതൽ ഓഗസ്റ്റ് 31 വരെയായിരുന്നു കൊറോണ വൈറസിനെ തുടർന്ന് രാജ്യത്ത് ലോക്ക് ഡൗൺ പ്രഖ്യാപിച്ചത്. രണ്ട് കോടി രൂപ വരെ കുടിശ്ശികയുള്ള വായ്പകൾക്കാണ് പദ്ധതിയുടെ ഭാഗമായി പലിശ ഇളവ് ലഭിക്കുക. 2020 ഫെബ്രുവരി 29 വരെ അക്കൗണ്ട് സ്റ്റാൻഡേർഡ് ആയിരിക്കണം. റീഫണ്ടിനായി കണക്കാക്കിയ കാലയളവ് 2020 മാർച്ച് 1 മുതൽ ഓഗസ്റ്റ് 21വരെ ആയിരിക്കും. അതായത് ആറുമാസ കാലയളവ് അല്ലെങ്കിൽ 184 ദിവസങ്ങൾ.

Also Read: ക്രെഡിറ്റ് കാർഡ് ഉപയോഗിച്ച് എടിഎമ്മിൽനിന്ന് പണം പിൻവലിക്കരുത്, വലിയ വില കൊടുക്കേണ്ടിവരും

എക്സ്-ഗ്രേഷ്യ പേയ്മെന്റ് ലഭിക്കുന്നതിന് വായ്പ നൽകുന്ന സ്ഥാപനം ഒന്നുകിൽ ബാങ്കിംഗ് കമ്പനി, പൊതുമേഖലാ ബാങ്ക്, സഹകരണ ബാങ്ക്, പ്രാദേശിക ഗ്രാമീണ ബാങ്ക്, അഖിലേന്ത്യാ ധനകാര്യ സ്ഥാപനം, ബാങ്കിംഗ് ഇതര ധനകാര്യ കമ്പനി, റിസർവ് ബാങ്കിൽ രജിസ്റ്റർ ചെയ്തിട്ടുള്ള ഹൗസിങ് ഫിനാൻസ് കമ്പനി എന്നിവ ആയിരിക്കണം.

മൈക്രോ, ചെറുകിട, ഇടത്തരം സംരംഭങ്ങൾ (എംഎസ്എംഇ) വായ്പകൾ, വിദ്യാഭ്യാസ വായ്പകൾ, ഭവന വായ്പകൾ, ഉപഭോക്തൃ ഡ്യൂറബിൾ വായ്പകൾ, ക്രെഡിറ്റ് കാർഡ് കുടിശ്ശിക, ഓട്ടോ വായ്പകൾ, വ്യക്തിഗത, പ്രൊഫഷണൽ വായ്പകൾ, ഉപഭോഗ വായ്പകൾ എന്നിങ്ങനെ എട്ട് വിഭാഗങ്ങളിലാണ് വായ്പ ആനുകൂല്യങ്ങൾ ലഭിക്കുക. അതേസമയം, കൃഷിയും അനുബന്ധമേഖലകളിലെയും വായ്പകള്‍ക്ക് പലിശ ഇളവ് ലഭിക്കില്ല.

Also Read: സുസ്മിത സെൻ, ശിൽപ്പ ഷെട്ടി..ബിസിനസിലൂടെ ഈ താരങ്ങൾ നേടുന്നത് കോടികൾ

ക്രെഡിറ്റ് കാർഡ് ഉപയോക്താക്കൾക്കും പലിശ ഒഴിവാക്കൽ പദ്ധതിയുടെ ആനുകൂല്യങ്ങളും ലഭിക്കും. ഒരു സ്ഥാപനത്തിൽനിന്ന് മറ്റൊന്നിലേക്ക് മാറ്റുന്ന വ്യക്തിഗത വായ്പകൾക്കും പലിശ ഇളവ് നേടാം. ഫോർ വീലർ ടാക്സി ഉൾപ്പെടെയുള്ള വാഹന വായ്പകൾക്കും പദ്ധതി ആനുകൂല്യം ലഭിക്കുമെന്നും ധനമന്ത്രാലയം വ്യക്തമാക്കി. അതേസമയം യോഗ്യരായ വായ്പക്കാർക്ക് ബാങ്കുകൾ ഇതിനകം തന്നെ ക്യാഷ്ബാക്ക് ലഭ്യമാക്കി തുടങ്ങി. പലിശ ഒഴിവാക്കൽ പദ്ധതി നവംബർ 5 നകം നടപ്പാക്കാൻ റിസർവ് ബാങ്ക് ബാങ്കിംഗ് ഇതര ധനകാര്യ കമ്പനികൾ ഉൾപ്പെടെയുള്ള വായ്പ നൽകുന്ന മുഴുവൻ സ്ഥാപനങ്ങളോടും ആവശ്യപ്പെട്ടിട്ടുണ്ട്.