ഗൂഗിൾപേയിലൂടെ എത്രരൂപ വരെ അയക്കാം?
എല്ലാ യുപിഐ ആപ്പുകളിലൂടെയും ഒരു ദിവസം പരമാവധി ഒരു ലക്ഷം രൂപയാണ് അയയ്ക്കാൻ ആകുക. മിക്ക പ്ലാറ്റ്ഫോമുകളിലൂടെയും ഒരു ദിവസം പരമാവധി 10-20 ഇടപാടുകളാണ് നടത്താൻ ആകുക. ഓരോ ബാങ്ക് അനുസരിച്ച് യുപിഐ വഴി അയക്കാൻ ആകുന്ന പണത്തിൻെറ പരിധിയിൽ വ്യത്യാസമുണ്ടാകും. ഉപഭോക്താക്കൾക്ക് ഫോൺ നമ്പർ ഉപയോഗിച്ചും ക്യുആർ കോഡ് സ്കാൻ ചെയ്തുമൊക്കെ പണം ഇടപാടുകൾ നടത്താം. പണം ഇടപാടുകളുടെ വിശദാംശങ്ങളും ആപ്പിലൂടെ ലഭിക്കും.. ഓരോ തവണ പണം അയക്കുമ്പോഴും പ്രത്യേക റിവാർഡ് പോയിന്റുകളും ഓഫറുകളും ഗൂഗിൾ പേ ഉപഭോക്താക്കൾക്ക് ലഭിക്കും. പ്രമോഷനും പ്രതിഫലം ലഭിക്കും.
ഗൂഗിൾ പേ റിവാർഡ് പ്രോഗ്രാം ഉപയോഗിച്ച് ഉത്പന്നങ്ങൾക്ക് ക്യാഷ്ബാക്കുകളും കിഴിവുകളും നേടാനാകും. നിശ്ചിത കാലാവധിയിൽ ഉപയോഗിക്കാനാകുന്ന ഒറ്റത്തവണ കൂപ്പണുകളായിരിക്കാം ഇവ . ചിലപ്പോൾ കാഷ് ബാക്കായി പണവും ലഭിക്കും. ഗൂഗിൾ പേ ഇടപാടുകൾ സൗജന്യമാണ് എന്നതാണ് ഒരു പ്രധാന മെച്ചം.
ഫോൺപേ ഇടപാടുകൾ എളുപ്പമാണ്
ഗൂഗിൾ പേ ഇടപാടുകൾ ഇടയ്ക്ക് തടസപ്പെടുന്നതിനാൽ മിക്കവരും ഇപ്പോൾ ഫോൺപേയും ഉപയോഗിക്കുന്നുണ്ട്. ഫോൺപേ യുപിഐ പണം ഇടപാട് പരിധി 1,00000 രൂപയായി നിശ്ചയിച്ചിട്ടുണ്ട്. എങ്കിലും, ഓരോ ബാങ്കിൻെറയും ഇടപാട് പരിധി വ്യത്യസ്തമാണ് കൂടാതെ, ബാങ്കുകളുടെ മാർഗ്ഗനിർദ്ദേശങ്ങൾ അനുസരിച്ച് ഒരു വ്യക്തിക്ക് പ്രതിദിനം പരമാവധി 20 ഫോൺപേ ഇടപാടുകൾ വരെ നടത്താനാകും.
ഇന്ത്യയിൽ ദശലക്ഷക്കണക്കിന് വ്യാപാരികൾ ഫോൺപേ ഉപയോഗിക്കുന്നുണ്ട്.. ആപ്ലിക്കേഷൻ സാമ്പത്തിക ഇടപാടുകൾ കൂടുതൽ എളുപ്പമാക്കുന്നു. ആപ്പ് ഉപയോഗിച്ച് ഗൂഗിൾ പേയിലേതു പോലെ തന്നെ വിവിധ ബില്ലുകൾ അയയ്ക്കാനും അടയ്ക്കാനുമൊക്കെയാകും. ഓരോ ഉപയോക്താവിന്റെയും ആവശ്യങ്ങൾക്ക് അനുസൃതമായി, ഫോൺപേ ഡവലപ്പർമാർ വിവിധ ഭാഷകളിൽ സേവനങ്ങൾ നൽകുന്നുണ്ട്. ഒരു ദിവസം ഒരു ലക്ഷം രൂപയാണ് അടയ്ക്കാൻ ആകുക.
ഒട്ടേറെ ഓഫറുകളുമായി ആമസോൺ പേ
മൊബൈൽ റീചാർജിനും ഡിഷ് ചാർജ് ചെയ്യുന്നതിനുമൊക്കെ ആകർഷകമായ ക്യാഷ്ബാക്ക് ഇപ്പോൾ ആമസോൺ പേ നൽകുന്നുണ്ട്. അതുപോലെ വാലറ്റ് ഉപയോഗിക്കുന്നവർക്ക് ആമസോൺ പ്ലാറ്റ്ഫോമിൽ നടത്തുന്ന ബിൽ പെയ്മന്റുകൾക്ക് ആകർഷകമായ ഇളവുകൾ ലഭിക്കും. ആമസോൺ പേയിൽ ലഭിക്കുന്ന റിവാർഡ് പോയിന്റുകൾ റെഡീ ചെയ്ത് ആമസോണിൽ ഉത്പന്നങ്ങൾ വാങ്ങുമ്പോൾ കിഴിവ് നേടാനുമാകും. മറ്റ് പ്ലാറ്റ്ഫോമുകളിൽ നിന്ന് വ്യത്യസ്തമായി കാഷ്ബാക്ക് ലഭിക്കുന്നതും തുക ക്രെഡിറ്റ് ആമസോൺ വാലറ്റിലായിരിക്കും. മൊബൈൽ റീചാർജിന് ലാഭകരമായ ആമസോൺ പേയിൽ റീചാർജിന് 30 രൂപ വരെ ക്യാഷ് ബാക്ക് ലഭിക്കും. ആമസോൺ പേ വാലറ്റ് ഉപയോഗിക്കുമ്പോൾ വിജയകരമായ ആദ്യ ഇടപാട് നടത്തി 24 മണിക്കൂറിനുള്ളിൽ പരമാവധി 5000 രൂപ മാത്രമേ ഉപഭോക്താക്കൾക്ക് ട്രാൻസ്ഫർ ചെയ്യാൻ കഴിയൂ. അതിന് ശേഷമുള്ള ഒരു മാസത്തെ ഇടപാട് പരിധി 1,000,000 രൂപയാണ്.