ആരോ​ഗ്യ ഇൻഷുറൻസ് പോർട്ട് ചെയ്യാം; നിരസിക്കപ്പെടാതിരിക്കാൻ ഈ തെറ്റുകൾ ഒഴിവാക്കാം

ആരോഗ്യ ഇൻഷുറൻസ് പോളിസികൾ ഇന്ന് ഒരു അനിവാര്യ ഘടകമായി മാറിക്കഴിഞ്ഞു. ഇവയെപ്പറ്റി പലർക്കും ധാരണയുണ്ടായിട്ട് അധിക കാലമായിട്ടില്ല. ഒരു മെഡിക്കൽ എമർജൻസി വന്നാൽ ഒരു ആരോഗ്യ ഇൻഷുറൻസ് പോളിസി കയ്യിലുള്ളത് ധൈര്യമാണെന്ന് പലരും യഥാർത്ഥത്തിൽ തിരിച്ചറിഞ്ഞത് കോവിഡ് കാലത്താണ്.

ഇൻഷുറൻസ് പോളിസികളുടെ കുത്തൊഴുക്കാണ് ഇന്ന് കാണാൻ സാധിക്കുന്നത്. വിവിധ കമ്പനികൾ പലതരം പോളിസികളുമായി രംഗത്തുണ്ട്. ലൈഫ്, ടേം, ഹെൽത്ത് ഇൻഷുറൻസ് തുടങ്ങിയ വിഭാഗങ്ങളിലാണ് ആവശ്യക്കാർ കൂടുതലുള്ളത്. ഒരു വ്യക്തിക്കും, അയാളുടെ കുടുംബത്തിനും ഇതിൽ ഏതാണ് അനുയോജ്യം എന്ന് തീരുമാനിക്കുക പ്രയാസമേറിയ കാര്യമാണ്. നിരവധി ഓപ്ഷനുകൾ മാർക്കറ്റിൽ ലഭ്യമായിരിക്കുമ്പോൾ, ആളുകൾക്ക് ആശയക്കുഴപ്പം ഉണ്ടാവുന്നത് സ്വാഭാവികവുമാണ്.


പലവിധ ഓപ്ഷനുകൾ തെരഞ്ഞ് മിക്കവരും ഒടുവിൽ അവർക്ക് അനുയോജ്യമല്ലാത്ത പോളിസികളായിരിക്കും തെര‍ഞ്ഞെടുക്കുന്നത്. എന്നാൽ ഇവിടെ ഒരു പരിഹാരമുണ്ട്. നിലവിലുള്ള ആരോഗ്യ ഇൻഷുറൻസ് പോളിസി, മറ്റൊരു കമ്പനിയിലേക്ക് പോർട് ചെയ്യുക എന്നതാണത്. ആനുകൂല്യങ്ങളിൽ കുറവ് വരാതെ തന്നെ ഇത് ചെയ്യാവുന്നതാണ്.

Also Read : ആരോ​ഗ്യ ഇൻഷുറൻസ് ക്യാഷ്ലെസ് ക്ലെയിം; തടസ്സങ്ങൾ ഒഴിവാക്കാൻ ചെയ്യേണ്ട കാര്യങ്ങൾ
ഒരു പോളിസി ഉടമയ്ക്ക് തന്റെ നിലവിലെ പോളിസി, കൂടുതൽ സേവനങ്ങൾ നൽകുന്ന മറ്റൊരു കമ്പനിയിലേക്ക് മാറ്റാവുന്നതാണ്. 'ഹെൽത്ത് ഇൻഷുറൻസ് പോർട്ടബിലിറ്റി' എന്നാണ് ഇത് അറിയപ്പെടുന്നത്. ഇത്തരത്തിൽ സ്വിച്ച് ചെയ്യുമ്പോൾ പോർട്ടബിലിറ്റിക്കുള്ള അപേക്ഷ നിരസിക്കപ്പെടാതിരിക്കണമെങ്കിൽ ചില കാര്യങ്ങൾ ശ്രദ്ധിക്കേണ്ടതാണ്. അവ താഴെ നൽകിയിരിക്കുന്നു.

പോർട്ടിങ് അപേക്ഷ നൽകുമ്പോൾ മെഡിക്കൽ റെക്കോർഡുമായി ബന്ധപ്പെട്ട കൃത്യമായതും, പൂർണമായതുമായ വിവരങ്ങൾ നൽകാൻ ശ്രദ്ധിക്കാം. മെഡിക്കൽ റെക്കോർഡ് അപ്ടുഡേറ്റ് ആണെന്ന് ഉറപ്പാക്കുക. കൂടെ, പോർട്ടിങ് പൂർത്തീകരിക്കാൻ ഇൻഷുറൻസ് കമ്പനിക്ക് ആവശ്യമുള്ള വിവരങ്ങളും നൽകേണ്ടതാണ്.

Also Read : ആരോ​ഗ്യ ഇൻഷുറൻസ് പ്രീമിയത്തിൽ എങ്ങനെയൊക്കെ കുറവ് വരുത്താം?
വലിയ തോതിൽ ക്ലെയിം സെറ്റിൽ ചെയ്തു നൽകിയ കമ്പനികളെ തെരഞ്ഞു കണ്ടെത്തുക. കഴിഞ്ഞ കാലത്ത് നിരവധി ക്ലെയിമുകൾ നടത്തിയ പോളിസി ഹോൾഡർമാരുടെ പോർട്ടിങ് അപേക്ഷ നിരസിക്കാൻ സാധ്യതയുണ്ടെന്ന് അറിഞ്ഞിരിക്കാം. പോർട്ടിങ് അപേക്ഷകളിൽ, ക്ലയന്റ്സിന്റെ പ്രീമിയം പേയ്മെന്റ് ചരിത്രമാണ്, കമ്പനികൾ പ്രധാനമായും പരിശോധിക്കുന്നത്. ഏതെങ്കിലും തരത്തിലുള്ള മുടക്കമോ, വൈകിയുള്ള പേയ്മെന്റോ അപേക്ഷ നിരസിക്കാൻ കാരണമാകും.

പോർട്ടിങ് അപേക്ഷകളിൽ, പോളിസിഹോൾഡറുടെ പ്രായം ഒരു പ്രധാന ഘടകമാണ്. പ്രായപരിധിയിൽ കമ്പനികൾ തമ്മിൽ വ്യത്യാസമുണ്ടായിരിക്കും. ഒരു അപേക്ഷ സമർപ്പിക്കകുന്നതിനു മുമ്പ് പ്രായപരിധി സംബന്ധിച്ച വ്യവസ്ഥകൾ അറിഞ്ഞിരിക്കേണ്ടതാണ്.

Read Latest Business News and Malayalam News