സ്വയം തൊഴിൽ ചെയ്യണോ? സബ്‍സിഡിയോടെ അഞ്ച് ശതമാനം പലിശ നിരക്കിൽ ഒരു ലക്ഷം രൂപ

കൊച്ചി: സ്വയം തൊഴിൽ ചെയ്യാൻ ആഗ്രഹിക്കുന്നവര്‍ക്ക് കുറഞ്ഞ പലിശ നിരക്കിൽ ഒരു ലക്ഷം രൂപ വരെ ധനസഹായം. അഞ്ച് ശതമാനം പലിശ നിരക്കിൽ പിന്നോക്ക വിഭാഗത്തിലെ വനിതകൾക്കാണ് ലോൺ ലഭിക്കുക. പിന്നോക്ക വിഭാഗ വികസന കോര്‍പ്പറേഷനാണ് പ്രത്യേക ലോൺ നൽകുന്നത്. വിവിധ ചെറുകിട സംരംഭങ്ങൾ തുടങ്ങാൻ തുക പ്രയോജനപ്പെടുത്താം.

പദ്ധതി ചെലവ്, കൈവശമുള്ള തുക, ആവശ്യമായ വായ്പാ തുക എന്നിവ വ്യക്തമാക്കി നിര്‍ദ്ധിഷ്ട അപേക്ഷ ഫോം പൂരിപ്പിച്ച് നൽകണം. ഉദ്യോഗസ്ഥ ജാമ്യം,10 സെൻറിൽ കുറയാത്ത ഭൂമിയുള്ളവരുടെ ആൾ ജാമ്യം എന്നിവ വായ്പക്ക് ആവശ്യമാണ്.പ്രോജക്ട് സംബന്ധിച്ച ഒരു ലഘു വിവരണവും അപേക്ഷയിൽ തന്നെ നൽകണം. അപേക്ഷാ ഫോം പിന്നോക്ക വിഭാഗ വികസന കോര്‍പ്പറേഷൻെറ വെബ്സൈറ്റിൽ ലഭ്യമാണ്.

Also Read: മുതിര്‍ന്ന പൗരൻമാര്‍ക്ക് പ്രത്യേക സ്ഥിരനിക്ഷേപ പദ്ധതി; ഏറ്റവുമധികം പലിശ എവിടെ?

സൂക്ഷ്മ ചെറുകിട സംരംഭങ്ങൾക്കും, പച്ചക്കറി കൃഷി, മത്സ്യ കൃഷി എന്നിവക്കും തുക വിനിയോഗിക്കാം. തയ്യൽക്കട തുടങ്ങാനും മെഴുകുതിരി നിര്‍മാണം, പപ്പട നിര്‍മാണം,കരകൗശല വസ്തു നിര്‍മാണം, ബുക്ക് ബൈൻഡിങ്, കച്ചവടം തുടങ്ങിയവക്കും വായ്പാ തുക വിനിയോഗിക്കാം. വായ്പാ തിരിച്ചടവ് കാലാവധി മൂന്ന് വര്‍ഷമാണ്. സമയ ബന്ധിതമായി തുക തിരിച്ചടച്ചാൽ പരമാവധി 25,000 രൂപ സബ്‍സിഡി ലഭിക്കും.

കുടിശ്ശിക മുടക്കുന്നവര്‍ക്ക് പിഴപലിശ ഉണ്ടായിരിക്കും. സബ്‍സിഡി ആനുകൂല്യവും ലഭ്യമാകും. ആറ് ശതമാനമാണ് പിഴ പലിശ ഈടാക്കുക. 25 വയസു മുതൽ 55 വയസു വരെ പ്രായ പരിധിയിൽ ഉള്ള വനിതകൾക്ക് വായ്പക്കായി അപേക്ഷിക്കാം.