ലോകത്തിലെ ഏറ്റവും പ്രായം കുറഞ്ഞ കോടീശ്വരന് 25 വയസ് മാത്രം; ആസ്തി 1,76,65 കോടി രൂപ

ഓസ്റ്റിൻ റസ്സൽ ലോകത്തിലെ ഏറ്റവും പ്രായം കുറഞ്ഞ ശതകോടീശ്വരന് പ്രായം 25 വയസ് മാത്രമാണ്. ആസ്തി 1,76,65 കോടി രൂപയും. ഫോബ്‍സ് നൽകുന്ന വിവരങ്ങൾ അനുസരിച്ച് ലൂമിനാര്‍ എന്ന സ്ഥാപനത്തിൻെറ സിഇഒ ഈ പണം എല്ലാം സ്വന്തം പ്രയത്നത്തിലൂടെ ഉണ്ടാക്കിയതാണ്. ഭാവി കാറുകൾ ഡ്രൈവറില്ലാതെ ഓടുന്നവയായിരിയ്ക്കും എന്നാണല്ലോ പ്രവചനങ്ങൾ. റസലിൻെറ സ്റ്റാര്‍ട്ടപ്പ് സെൽഫ് ഡ്രൈവിങ് കാറുകൾ വികസിപ്പിയ്ക്കുന്ന സംരംഭം ആണ്.

17 വയസ് മാത്രം പ്രായമുള്ളപ്പോഴാണ് പയ്യൻസ് ഈ സ്റ്റാര്‍ട്ടപ്പ് തുടങ്ങുന്നത്. കാറുകളുടെ ലേസര്‍ സെൻസറുകൾ വികസിപ്പിയ്ക്കാൻ ആയിരുന്നു സംരംഭം. 780 കോടി ഡോളറിൽ അധികം വിപണി മൂല്യം ഇപ്പോൾ ഈ കമ്പനിയ്ക്ക് ഉണ്ട് എന്നാണ് കണക്കാക്കുന്നത്. ഓഹരി വിലയിൽ 28 ശതമാനത്തിൽ ഏറെയാണ് വര്‍ധന.

Also Read: കോര്‍പ്പറേറ്റ് ജോലി വിട്ട് ഗ്രാമങ്ങളിലേയ്ക്ക്; സ്വന്തം സംരംഭത്തിലൂടെ മികച്ച വരുമാനവുമായി ഈ വനിതകൾ

റസലിൻെറ കമ്പനിയുടെ ഓഹരികൾ ഉയര്‍ന്നതാണ് ഏറ്റവും പ്രായം കുറഞ്ഞ ശതകോടീശ്വരനാകാൻ സഹായകരമായത്. കമ്പനിയുടെ 240 കോടി ഡോളറോളം വില വരുന്ന 10 കോടിയിൽ അധികം ഓഹരികളും ഈ യുവാവിൻെറ കൈവശമാണ്. ഈ ഓഹരികളാണ് ഓസ്റ്റിൻ റസലിനെ ലോകത്തെ തന്നെ ഏറ്റവും പ്രായം കുറഞ്ഞ ശതകോടീശ്വരൻ ആക്കിയത്.

യാഥാര്‍ത്ഥ്യവും സ്വപ്നവും ഇടകലര്‍ന്നതാണ് തൻെറ ബിസിനസ് യാത്രയെന്ന ഓസ്റ്റിൻ റസ്സൽ തന്നെ വ്യക്തമാക്കിയിട്ടുണ്ട്. സ്വന്തം സ്വപ്ന സാക്ഷാത്കാരത്തിനായി പഠനം ഉപേക്ഷിച്ച റസ്സൽ 2012-ലാണ് ബിസിനസ് തുടങ്ങുന്നത്.സ്റ്റാൻഫോര്‍ഡ് സര്‍വകലാശാലയിൽ ഫിസ്ക്സ് വിദ്യാര്‍ത്ഥി ആയിരുന്നെങ്കിലും പഠനം ഉപേക്ഷിയ്ക്കുകയായിരുന്നു. പേ പാൽ സഹസ്ഥാപകൻ പീറ്റര്‍ തീൽ നൽകിയ 73 ലക്ഷം രൂപയുടെ ഫെലോഷിപ്പ് പ്രയോജനപ്പെടുത്തിയായിരുന്നു ആദ്യം ബിസിനസ്. ലേസര്‍ സെൻസറുകൾ ഉപയോഗിച്ച് വാഹനങ്ങളുടെ നാലുചുറ്റും കാണാൻ ആകുന്ന സംവിധാനം വികസിപ്പിച്ചതോടെ സ്റ്റാര്‍ട്ടപ്പ് ക്ലിക്ക് ആകുകയായിരുന്നു.