നിങ്ങളുടെ സ്വന്തം പ്രോപർട്ടിയുടെ വില ഉയരുന്നതെങ്ങനെ ?

ഇന്ത്യയിലെ റിയൽ എസ്റ്റേറ്റ് രംഗം കാലങ്ങളായി വളർച്ചയുടെ പാതയിലാണ്. കോവിഡ് കാലത്തു പോലും വലിയ തകർച്ചയില്ലാതെ അതിജീവിച്ച ചുരുക്കം ചില മേഖലകളിലൊന്നും റിയൽ എസ്റ്റേറ്റാണ്. വർധിച്ചു വരുന്ന ഡിമാൻഡ് സ്ഥലലഭ്യത കുറയ്ക്കുകയും, വില വർധിപ്പിക്കുകയും ചെയ്യുന്നു. കേരളത്തിലെയും സ്ഥിതി വ്യത്യസ്തമല്ല. പഴയ കാലത്തിൽ നിന്ന് വ്യത്യസ്തമായി കേരളത്തിലെ ഉൾനാടൻ പ്രദേശങ്ങളിൽ പോലും ഒരു സെന്റ് ഭൂമി വാങ്ങാൻ ലക്ഷക്കണക്കിന് രൂപ കൊടുക്കേണ്ട സാഹചര്യമാണ് നിലവിലുള്ളത്.

നിരവധി ഘടകങ്ങൾ റിയൽ എസ്റ്റേറ്റ് മേഖലയെ സ്വാധീനിക്കുന്നുണ്ട്. കാലം മാറിയപ്പോൾ കൂട്ടു കുടുംബ വ്യവസ്ഥിതി ഇല്ലാതെയായി. സംസ്ഥാനത്തെ മികച്ച വിദ്യാഭ്യാസ സൗകര്യങ്ങൾ തൊഴിൽ ചെയ്യാൻ അനുയോജ്യരായ നിരവധി ആളുകളെ വാർത്തെടുത്തു. ആഗോളവൽക്കരണത്തിന്റെ ഭാഗമായി നിരവധി കമ്പനികൾ ഇവിടേക്ക് ചുവടുറപ്പിച്ചു. ജ്യോഗ്രഫിക്കലായുള്ള ആനുകൂല്യവും, സമാധാനപരമായ അന്തരീക്ഷവും, ഉയർന്ന സാമൂഹ്യ ബോധമുള്ള ജനങ്ങളും കേരളത്തിന്റെ നേട്ടങ്ങളാണ്. പ്രവാസികളും, ജോലി നേടുന്ന ചെറുപ്പക്കാരിൽ നല്ല വിഭാഗവും ഈ നാട്ടിൽ തന്നെ താമസിക്കാൻ ഇഷ്ടപ്പെടുന്നു. ഭവനവായ്പകൾ പോലെയുള്ള മാർഗങ്ങങിലൂടെയാണെങ്കിലും സ്വന്തമായ ഒരു വീട് എന്നത് ഒരു ശരാശരി മലയാളിയുടെ സ്വപ്നമാണ്.

ആളുകളുടെ വരുമാനം വർധിച്ചത് വിപണിയിലെ ഡിമാൻഡ് വർധിക്കാൻ കാരണമായി. യുവാക്കളുടെ എണ്ണത്തിലുള്ള വർധന ഇവിടത്തെ മാർക്കറ്റിനെ എപ്പോഴും ചലനാത്മകമാക്കി നിർത്തുന്നു. പണം ചിലവഴിക്കാൻ തയ്യാറുള്ള വരുമാനമുള്ള ജനങ്ങളുടെ ഇടയിൽ ബിസിനസ് വർധിക്കുക സ്വാഭാവികമാണ്. വിദേശ മലയാളികളുടെ വലിയ തോതിലുള്ള ഫണ്ട് ഇവിടെ ബിസിനസിലേക്ക് ഒഴുകുന്നു. സ്ഥലത്തിന് വില കൂടിയ സ്ഥലങ്ങൾ ഒഴിച്ചു നിർത്തി വികസന സാധ്യതയുള്ള പ്രദേശങ്ങളിൽ വ്യക്തികളും, ബിസിനസുകളും സ്ഥലം വാങ്ങിയിടുന്നതാണ് നാളുകളായുള്ള ട്രെൻഡ്. ഇത് താഴെ നൽകിയിരിക്കുന്ന ഉദാഹരണത്തിലൂടെ വിശദമാക്കാം.

ഉദാഹരണത്തിന് കേരളത്തിൽ ഗതാഗത സൗകര്യം കുറവുള്ള കുന്നോ, മലയോ പോലെയുള്ള പ്രദേശങ്ങളിലോ, ഉൾനാടുകളിലോ ഒരു വലിയ ഹോസ്പിറ്റൽ വരുന്നു എന്നു കരുതുക. ആ ഹോസ്പിറ്റിലിനു വേണ്ടി സ്ഥലം വാങ്ങുന്നത് തുച്ഛമായ വില നൽകിയായിരിക്കും. എന്നാൽ പിന്നീടാണ് കാര്യങ്ങൾ മാറുന്നത്. അവിടേക്ക് ടാക്സികളും, ബസുകളും സർവീസ് നടത്തും. സ്വാഭാവികമായും അവിടേക്കുള്ള റോഡ് വികസിക്കും.ഹോസ്പിറ്റിലിൽ വരുന്നവർക്ക് വേണ്ട ഷോപ്പുകൾക്കായി ബിൽഡിംഗുകൾ ഉയരും‌. ഇവിടെ ഹോട്ടൽ, മെഡിക്കൽ ഷോപ്പ്, ബാങ്ക്, ലോഡ്ജ്, സൂപ്പർമാർക്കറ്റ് പോലെയുള്ള ബിസിനസുകൾ ആരംഭിക്കും. അങ്ങനെ ആ പ്രദേശം ചെറിയ ഒരു പട്ടണമായി മാറുന്നു. ഇതെല്ലാം അവിടത്തെ സ്ഥലത്തിന്റെ വില ഉയർത്തുന്നു. തൊട്ടടുത്ത ടൗൺ കുറച്ചു ദൂരെയായിരിക്കും. ആ ഡിസ്റ്റൻസിൽ താമിസിക്കുന്നവർക്ക് വേണ്ടി മറ്റു ബിസിനസുകൾ അവിടെ വരുന്നു. അങ്ങനെ ആ രണ്ടു ടൗണുകൾ ബന്ധപ്പെടുന്നു. ഈ രീതിയിൽ നഗരങ്ങളും, സിറ്റികളും രൂപപ്പെടുന്നു. കേരളത്തിൽ ഒരു സ്ഥലത്തിന്റെ വില നിശ്ചയിക്കുന്നതിൽ ജലലഭ്യത,സഞ്ചാര സൗകര്യം എന്നിവയ്ക്കും വലിയ പങ്കുണ്ട്. ഒരു സ്ഥലത്തിന്റെ വില വർധിക്കുമ്പോൾ തൊട്ടടുത്തുള്ള സ്ഥലത്തിന്റെ വില വർധിക്കുന്നതും ഇവിടത്തെ പ്രവണതയാണ്. വലിയ ടൗണുകളിൽ വില വർധിക്കുന്നത് വിദൂര പ്രദേശങ്ങളെ പോലും സ്വാധീനിക്കുന്നുമുണ്ട്.