ഐ‌സി‌ഐ‌സി‌ഐ ബാങ്ക് ഉപഭോക്താക്കൾക്ക് ഇനി വാട്സ്ആപ്പ് വഴി ബിൽ അടയ്ക്കാം, എഫ്ഡി തുറക്കാം

കൊച്ചി: കൊവിഡ് കാലത്ത് ഉപഭോക്താക്കൾക്കായി പുതിയ സേവനങ്ങൾ ആരംഭിച്ച് രാജ്യത്തെ ഏറ്റവും വലിയ സ്വകാര്യ ബാങ്കായ ഐസിഐസിഐ ബാങ്ക്. സ്ഥിര നിക്ഷേപം (എഫ്ഡി) ആരംഭിക്കൽ, യൂട്ടിലിറ്റി ബില്ലുകള്‍ അടയ്ക്കല്‍, വ്യാപാര സാമ്പത്തിക വിവരങ്ങള്‍ ലഭ്യമാക്കല്‍ തുടങ്ങിയ സേവനങ്ങള്‍ വാട്സ്ആപ്പിലൂടെ ലഭ്യമാക്കാനുള്ള സൗകര്യം ഒരുക്കുകയാണ് ബാങ്ക്. ഇന്ത്യയില്‍ ഈ സേവനങ്ങള്‍ വാട്ട്‌സ്ആപ്പില്‍ ലഭ്യമാക്കുന്ന ആദ്യ ബാങ്കാണ് ഐസിഐസിഐ ബാങ്ക്. ഇതോടൊപ്പം ഉപഭോക്താക്കള്‍ക്ക് വീട്ടിലോ ഓഫീസിലോ ഇരുന്ന് സാമൂഹ്യ അകലം പാലിച്ച് സുരക്ഷിതമായി നടത്താവുന്ന നിരവധി സേവനങ്ങളും ബാങ്ക് വാട്ട്‌സ്ആപ്പില്‍ ലഭ്യമാക്കുന്നുണ്ട്.

റീട്ടെയില്‍ ഉപഭോക്താക്കള്‍ക്ക് ഇനി എഫ്ഡി ഇടാനും വൈദ്യുതി ബില്‍ അടയ്ക്കാനും കൂക്കിങ് ഗ്യാസ്, പോസ്റ്റ് പെയ്ഡ് ഫോണ്‍ ബില്‍ തുടങ്ങിയവ അടയ്ക്കാനും വാട്ട്‌സ്ആപ്പില്‍ ഏതാനും ക്ലിക്കുകളിലൂടെ ലളിതമായി സാധിക്കും. കോര്‍പറേറ്റുകള്‍ക്കും എംഎസ്എംഇ ഉടമകള്‍ക്കും അവരുടെ വ്യാപാര സാമ്പത്തിക ഇടപാടുകളുമായി ബന്ധപ്പെട്ട കസ്റ്റമര്‍ ഐഡി, കയറ്റുമതി, ഇറക്കുമതി കോഡുകള്‍, ബാങ്കിന്റെ വായ്പാ സൗകര്യം, ശേഷിക്കുന്ന ഇന്‍വേര്‍ഡ് റെമിറ്റന്‍സ്, ഇന്‍വേര്‍ഡ് റെമിറ്റന്‍സ് തുടങ്ങിയവയെല്ലാം അറിയാനുമാകും.

Also Read: നിങ്ങളുടെ നിക്ഷേപത്തിന് 7-8 ശതമാനം പലിശ വാഗ്ദം ചെയ്യുന്ന സര്‍ക്കാര്‍ സ്ഥാപനങ്ങൾ

നിലവിൽ എഫ്ഡി ആരംഭിക്കല്‍, ബില്ലുകള്‍ അടയ്ക്കല്‍ തുടങ്ങിയ സേവനങ്ങള്‍ ഉപഭോക്താക്കള്‍ക്ക് ലഭ്യമാണ്. വ്യാപാര സാമ്പത്തിക സേവനങ്ങള്‍ ഏതാനും ദിവസങ്ങള്‍ക്കുള്ളില്‍ ഉപഭോക്താക്കള്‍ക്ക് ലഭ്യമാകും. ഇതോടെ ഐസിഐസിഐ ബാങ്ക് ഉപഭോക്താക്കള്‍ക്ക് വാട്ട്‌സ്ആപ്പില്‍ ലഭ്യമായ ബാങ്കിംഗ് സേവനങ്ങളുടെ എണ്ണം 25 ആകും. ആറു മാസം മുമ്പാണ് ബാങ്ക് നിരവധി സേവനങ്ങള്‍ വാട്ട്‌സ്ആപ്പില്‍ ലഭ്യമാക്കി തുടങ്ങിയത്.

സേവിംഗ്സ് അക്കൗണ്ട് ബാലന്‍സ് പരിശോധിക്കല്‍, അവസാന മൂന്ന് മാസത്തെ ഇടാപാടുകള്‍, ക്രെഡിറ്റ് കാര്‍ഡ് പരിധി, അടിയന്തര വായ്പാ വിവരങ്ങള്‍, സുരക്ഷിതമായി ക്രെഡിറ്റ്/ഡെബിറ്റ് കാര്‍ഡ് ബ്ലോക്ക് ചെയ്യല്‍, സേവിംഗ്സ് അക്കൗണ്ട് ആരംഭിക്കല്‍, വായ്പാ മൊറട്ടോറിയത്തിന് അപേക്ഷിക്കല്‍, പത്ര/മാസികകളുടെ പിഡിഎഫ്, അടുത്തുള്ള പലചരക്ക് സ്റ്റോറുകളുടെ വിവരങ്ങള്‍ തുടങ്ങിയ സേവനങ്ങളെല്ലാം ലഭ്യമാണ്. ഉപഭോക്താക്കള്‍ക്ക് ബാങ്കില്‍ രജിസ്റ്റര്‍ ചെയ്തിട്ടുള്ള നമ്പറില്‍ നിന്നും 86400 86400 നമ്പറിലേക്ക് ഒരു സന്ദേശം അയച്ച് സേവനം ഉടനടി ലഭ്യമാക്കാം.