എടിഎം കാർഡ് കൈയിൽ കരുതാൻ മറന്നോ? യുപിഐ ആപ്പ് ഉപയോ​ഗിച്ച് പണം പിൻവലിക്കാം, എങ്ങനെയെന്നറിയാം

ഇന്ന് പണം കൈയിൽ വെച്ച് പുറത്തു പോകുന്നവർ ചുരുക്കമായിരിക്കും. ഒന്നുകില് എടിഎം അല്ലെങ്കിൽ യുപിഐ പേയ്മെന്റ് എന്ന രീതിയിലാണ് അനുദിനം വളർന്നു കൊണ്ടിരിക്കുന്ന ഡിജിറ്റൽ യുഗത്തിൽ പേയ്മെന്റ് സംവിധാനങ്ങൾ മാറി കൊണ്ടിരിക്കുന്നത്. പേയ്മെന്റിനായി എടിഎമ്മിനെ ആശ്രയിക്കുന്നവർ നിരവധിയാണ്. ചില സമയത്ത് എന്തെങ്കിലും ആവശ്യത്തിനായി പണം എടുക്കാനായി എടിഎം സെന്റർ വരെ എത്തുമ്പോഴായിരിക്കും ഡെബിറ്റ് കാർഡ് അല്ലെങ്കിൽ ക്രെഡിറ്റ് കാർഡ് എടുക്കാൻ മറന്ന കാര്യം ഓർമ്മ വരിക.

യൂണിഫൈഡ് പേയ്‌മെന്റ് ഇന്റർഫേസ് (യുപിഐ) ഇതിനകം കാർഡ്-ലെസ് ഇടപാടുകളും പ്രാപ്തമാക്കിയിട്ടുണ്ട്. അതിനാൽ തന്നെ വാങ്ങലുകളും പേയ്മെന്റുകളും എളുപ്പത്തിലായിട്ടുണ്ട്. ഇപ്പോൾ നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (എൻപിഐസി) യുപിഐയുടെ പരിധിയിൽ വരുന്ന എടിഎമ്മുകളിൽ നിന്ന് യുപിഐ വഴി പണം പിൻവലിക്കാൻ ഉപയോക്താക്കളെ അനുവദിക്കുന്നു. Interoperable Cardless Cash Withdrawal (ICCW) എന്ന ഫീച്ചർ കാർഡുകൾ കൈവശം വച്ചില്ലെങ്കിലും എടിഎമ്മുകളിൽ നിന്ന് പണം എടുക്കാൻ നിങ്ങളെ അനുവദിക്കുന്നു.

ക്ലോണിംഗ്, സ്‌കിമ്മിംഗ്, ഉപകരണങ്ങളുടെ കൃത്രിമത്വം എന്നിവ ഉൾപ്പെടെയുള്ള കാർഡ് തട്ടിപ്പുകൾ തടയാൻ എടിഎമ്മുകൾക്ക് ഐസിസിഡബ്ല്യു ഓപ്ഷൻ നൽകാൻ റിസർവ് ബാങ്ക് ഇതിനോടകം തന്നെ രാജ്യത്തെ ബാങ്കുകളോട് ആവശ്യപ്പെട്ടിട്ടുണ്ട്. സ്റ്റേറ്റ് ബാങ്ക് ഓഫ് ഇന്ത്യ (എസ്‌ബിഐ), പഞ്ചാബ് നാഷണൽ ബാങ്ക് (പിഎൻബി), എച്ച്‌ഡിഎഫ്‌സി ബാങ്ക് എന്നിവയുടെ എടിഎമ്മുകളിൽ കാർഡ് ഇല്ലാതെ പണം പിൻവലിക്കൽ സൗകര്യം ലഭ്യമാണ്. GooglePay, PhonePe, Paytm, മറ്റ് യുപിഐ ആപ്പുകൾ, ബാങ്കിംഗ് ആപ്പുകൾ എന്നിങ്ങനെയുള്ള ക്യൂആർ കോഡ് നൽകുന്ന ഏത് യുപിഐ പേയ്‌മെന്റ് സേവനവും ഉപയോഗിച്ച് പണം പിൻവലിക്കൽ സൗകര്യം പ്രയോജനപ്പെടുത്താം.

Also Read : ഫ്ലിപ്കാർട്ടിൽ ഷോപ്പിംഗ് നടത്താം, ആകർഷക ആനുകൂല്യങ്ങളോടെ; പുതിയ ക്രെഡിറ്റ് കാർഡുമായി ആക്സിസ് ബാങ്ക്

എടിഎമ്മുകളിൽ നിന്ന് യുപിഐ ഉപയോഗിച്ച് പണം പിൻവലിക്കുന്നതെങ്ങനെ എന്ന് ഘട്ടം ഘട്ടമായി അറിഞ്ഞിരിക്കാം.

സ്റ്റെപ്പ് 1 : ഏതെങ്കിലും എടിഎം മെഷീൻ സന്ദർശിച്ച് സ്ക്രീനിൽ 'Withdraw Cash' ഓപ്ഷൻ കണ്ടെത്തി തിരഞ്ഞെടുക്കുക.

സ്റ്റെപ്പ് 2 : അടുത്തതായി, UPI ഓപ്ഷൻ തിരഞ്ഞെടുക്കുക.

സ്റ്റെപ്പ് 3 : എടിഎം സ്ക്രീനിൽ ഒരു ക്യൂ ആർ കോഡ് തെളിഞ്ഞു വരും

സ്റ്റെപ്പ് 4 : നിങ്ങളുടെ മൊബൈലിലെ യുപിഐ ആപ്പ് തുറന്ന് എടിഎം മെഷീനിൽ തെളിഞ്ഞു വന്ന കോഡ് സ്കാൻ ചെയ്യുക

സ്റ്റെപ്പ് 5 : നിങ്ങൾ പിൻവലിക്കാൻ ആഗ്രഹിക്കുന്ന പണം എത്രയെന്ന് നൽകുക. നിങ്ങൾക്ക് ഒരു രൂപ 5,000 രൂപ വരെ യുപിഐ വഴി എടിഎമ്മിലൂടെ പിൻവലിക്കാം.

സ്റ്റെപ്പ് 6 : യുപിഐ പിൻ നൽകി 'Proceed' ബട്ടൺ ക്ലിക്ക് ചെയ്യുക.
എടിഎം മെഷീനിൽ നിന്ന് നിങ്ങൾക്ക് പണം ലഭിക്കും.

Also Read : ഇഎംഐകൾക്ക് ചെലവേറും; വായ്പാ പലിശ നിരക്ക് ഉയർത്തി എച്ച്‌ഡിഎഫ്‌സി ബാങ്ക്

യുപിഐ ഉപയോഗിച്ച് എടിഎമ്മുകളിൽ നിന്ന് കാർഡ് ഇല്ലാതെ പണം പിൻവലിക്കുന്നതിന് ബാങ്കുകൾ അധിക ഫീസ് ഈടാക്കുന്നില്ല എന്ന കാര്യം ശ്രദ്ധേയമാണ്. ആർബിഐ പറയുന്നതനുസരിച്ച്, ഓൺ-യുസ്/ഓഫ്-യുസ് ഐസിസിഡബ്ല്യു ഇടപാടുകൾ, നിർദ്ദേശിച്ചിട്ടുള്ളതല്ലാതെ മറ്റു ചാർജുകൾ ഈടാക്കാതെ തന്നെ ഇടപാട് പ്രോസസ്സ് ചെയ്യും.

എന്നിരുന്നാലും, യുപിഐ ഉപയോഗിച്ച് മറ്റൊരു ബാങ്കിൽ നിന്ന് എടിഎം ഉപയോഗിക്കുന്നതിനുള്ള നിരക്കുകൾ നിലവിലെ കാർഡ് പിൻവലിക്കൽ നിരക്കുകൾക്ക് തുല്യമായിരിക്കും. ഉപഭോക്താക്കൾക്ക് അവരുടെ ബാങ്കുകളുടെ എടിഎമ്മുകളിൽ പ്രതിമാസം അഞ്ച് സൗജന്യ ഇടപാടുകൾ അനുവദിക്കുകയും, മറ്റ് ബാങ്കുകളുടെ എടിഎമ്മുകളിൽ നിന്ന് മൂന്ന് തവണ സൗജന്യമായി പിൻവലിക്കാൻ അനുവദിക്കുകയും ചെയ്യുന്നു. അതിന് ശേഷം ഓരോ ഇടപാടിനും 21 രൂപ ഈടാക്കും.

Read Latest Business News and Malayalam News