മറക്കരുത് ; കോവിഡ് കാലം കാശിനെപ്പറ്റി പറഞ്ഞു തന്നതൊന്നും

കോവിഡ് പ്രതിസന്ധിയിൽ ജോലി നഷ്ടപ്പെട്ടവർ അനവധിയാണ്. മാസം തോറും കൃത്യമായി കിട്ടിയിരുന്ന ശമ്പളം നേർപകുതിയായി കുറഞ്ഞവരും, മാസങ്ങളായി മുടങ്ങിയവരും നമ്മുടെ ഇടയിൽ തന്നെയുണ്ട്. ഒരു തൊഴിൽ ജോലി സുരക്ഷിതമാക്കും എന്ന പരമ്പരാഗത ധാരണയുടെ മുഖമടച്ചുള്ള അടിയായിരുന്നു കോവിഡ് നൽകിയത്. വിദ്യാഭ്യാസത്തിന്റെ പ്രാധാന്യവും, അധികമായി സ്കിൽസെറ്റുകൾ ഉണ്ടാവേണ്ടതിന്റെയും ആവശ്യവും ആളുകൾ തിരിച്ചറിഞ്ഞു. സർക്കാർ ജോലി സ്ഥിരവരുമാനം ഉറപ്പു തരുമെന്ന ചിന്ത കൂടുതൽ ആളുകളെ ആ മേഖലയിലേക്ക് തിരിച്ചു വിട്ടു. പി എസ് സി കോച്ചിങ് സെന്റർ, പബ്ലിഷിങ് ബിസിനസുകൾക്ക് കോവിഡ് കാലം പുഷ്കല കാലമായി മാറി.

Also Read : സിബിൽ സ്കോർ കുറഞ്ഞാലും പേഴ്സണൽ ലോൺ ലഭിക്കാൻ 5 മാർഗങ്ങൾ

ഭാവി ആവശ്യത്തിനായി പണം കരുതേണ്ടതിന്റെ പ്രാധാന്യം ജനങ്ങളെ മനസ്സിലാക്കുന്നതിൽ കോവിഡ് കാലം വലിയ പങ്കാണ് വഹിച്ചത്. പരമ്പരാഗത നിക്ഷേപ മാർഗത്തിൽ നിന്നു മാറി മ്യൂച്വൽ ഫണ്ട് പോലെയുള്ള നിക്ഷേപങ്ങളിലേക്ക് നിരവധിയാളുകൾ ചുവടു മാറ്റി. സ്വർണ്ണം എല്ലാക്കാലത്തും, പ്രത്യേകിച്ച് പ്രതികൂലമായ സാമ്പത്തിക സാഹചര്യങ്ങളിൽ വിശ്വസിക്കാനാവുന്ന സുഹൃത്താണെന്ന് ആളുകൾക്ക് ബോധ്യപ്പെട്ടു. മൊബൈൽ ഫോണിന്റെയും, ഇന്റർനെറ്റിന്റെയും ഉപയോഗം പുതിയ നിക്ഷേപ അവസരങ്ങളെപ്പറ്റി വിശദമായി മനസ്സിലാക്കാൻ സഹായകമായി.

സാമ്പത്തിക ലക്ഷ്യങ്ങൾ നിശ്ചയിക്കേണ്ടതിന്റെയും, അതിലേക്ക് എത്താനുള്ള മാർഗങ്ങളിൽ അച്ചടക്കം പാലിക്കേണ്ടതിന്റെയും പ്രാധാന്യം വെളിവാക്കപ്പെട്ടു. എമർജൻസി ഫണ്ട് കൈവശം ഉണ്ടാവേണ്ടതിന്റെ ആവശ്യകതയും നിരവധി പേർക്ക് നേരിട്ട് ബോധ്യപ്പെട്ടു.

Also Read : ഈ 5 നിക്ഷേപ ബ്രഹ്മാസ്ത്രങ്ങൾ നിങ്ങളെ തുണയ്ക്കും

ആരോഗ്യ രംഗത്ത് കുതിച്ചുയരുന്ന ചിലവുകൾ ആളുകളെ ചിന്തിപ്പിച്ചു. ഹെൽത്ത് ഇൻഷുറൻസ് പോളിസികൾ ജനപ്രിയമാവുന്നതിൽ കോവിഡ് വലിയ പങ്കാണ് വഹിച്ചത്. വിവിധ സ്കീമുകൾ പുറത്തിറക്കാൻ ഇത് കമ്പനികളെ പ്രേരിപ്പിച്ചു. ആധുനിക സാങ്കേതിക വിദ്യ താഴേത്തട്ടിലേക്കിറങ്ങി ചെന്നത് ഇൻഷുറൻസ് പോളിസികൾ പാവപ്പെട്ടവരിലേക്കും എത്താൻ സഹായിച്ചു.

ആരോഗ്യമാണ് സർവ്വധനാൽ പ്രധാനമെന്നത് വെറുമൊരു ചൊല്ലല്ല എന്ന് ബോധ്യപ്പെട്ടത് ബിസിനസുകളെയും വലിയ തോതിൽ സഹായിച്ചിട്ടുണ്ട്. ക്ലീനിങ് ലോഷനുകൾ, ഗ്ലൗസുകൾ, ബ്ലീച്ചിങ് പൗഡർ, മാസ്ക്, സാനിറ്റൈസർ, പ്രതിരോധ മരുന്നുകൾ എന്നിവയുടെയെല്ലാം വില്പനയുടെ വോളിയം വലിയ തോതിൽ വർധിച്ചു.

Also Read : നിങ്ങൾക്ക് എത്ര രൂപയുടെ ഹെൽത്ത് ഇൻഷുറൻ‍സ് ആവശ്യമുണ്ട് ?

സാധാരണക്കാർക്ക് അപ്രാപ്യമായ എന്തോ ഒന്ന് എന്ന നിലയിൽ നിന്ന് ഓഹരി നിക്ഷേപത്തെ കോവിഡ് കാലം മാറ്റിമറിച്ചു. ഇന്ന് നിരവധിയാളുകൾ ഓഹരിവിപണിയുടെ നേട്ട സാധ്യതകളിൽ ആകൃഷ്ടരാണ്. ലക്ഷക്കണക്കിന് പുതിയ ഡീമാറ്റ് അക്കൗണ്ടുകളാണ് ‌ഇന്ത്യയിൽ കോവി‍ഡ് പ്രതിസന്ധിക്കിടെ തുറക്കപ്പെട്ടത്. വീട്ടിലിരുന്നു കൊണ്ടു തന്നെ മറ്റൊരു വരുമാനം എന്ന ചിന്തയാണ് ഭൂരിഭാഗം പേരെയും ഷെയർ മാർക്കറ്റിലേക്ക് ആകർഷിച്ചത്. നിരവധി യൂട്യൂബ് ചാനലുകളിലും, വെബ്സൈറ്റുകളിലും, സോഷ്യൽ മീഡിയയിലും ലഭ്യമാവുന്ന വിവരങ്ങളും ആളുകൾ ഉപയോഗപ്പെടുത്തി. ആഗോള ഓഹരി വിപണികൾ തകർന്നടിഞ്ഞ സാഹചര്യങ്ങളിലെല്ലാം ഇത്തരം റീടെയിൽ നിക്ഷേപകരുടെ സാന്നിദ്ധ്യവും, ആത്മവിശ്വാസവും ഇന്ത്യൻ ഓഹരി വിപണികൾക്കു തുണയായി മാറി.

Also Read : ക്രെഡിറ്റ് കാർഡ് നിങ്ങളുടെ ജീവിതം നശിപ്പിക്കും..അതേ കാർഡ് നിങ്ങളുടെ ഉറ്റ സുഹൃത്തുമായിരിക്കും