ഡൗണ്പേയ്മെന്റിന് എത്രയുണ്ട് കൈയ്യില്?
ഒരു വീടിന്റെ നിര്മാണത്തിന് ആവശ്യമായി വരുന്ന ചെലവിന്റെ 75 ശതമാനം മുതല് 90 ശതമാനം വരെ ഭവന വായ്പ അനുവദിക്കും. ബാക്കി തുക അപേക്ഷകര് സ്വന്തമായി കണ്ടെത്തണം.നിങ്ങള് ഒരു ഭവന വായ്പക്കായി ആലോചിക്കുന്നുണ്ടെങ്കില് ഡൗണ് പേയ്മെന്റിനായി ആസ്തി മൂല്യത്തിന്റെ പത്ത് ശതമാനം മുതല് 25 ശതമാനം വരെ നിങ്ങള് കണ്ടെത്തണം. ഡൗണ്പേയ്മെന്റായി വലിയ തുക നീക്കിവെച്ചാല് അതിന്റേതായ ഗുണങ്ങളുമുണ്ട്. ഇത് കുറഞ്ഞ പലിശ നിരക്കില് ഭവന വായ്പ നേടാനുള്ള സാധ്യത വര്ധിപ്പിക്കുന്നു. ഉയര്ന്ന ഡൗണ്പേയ്മെന്റ് വായ്പക്കാരന്റെ ക്രെഡിറ്റ് റിസ്ക് കുറയ്ക്കുന്നതിനാലാണ് ധനകാര്യ സ്ഥാപനങ്ങള് കുറഞ്ഞ പലിശ വാഗ്ദാനം ചെയ്യുന്നത്.
മികച്ച ക്രെഡിറ്റ് സ്കോര് ഉണ്ടോ?
ക്രെഡിറ്റ് സ്കോര് 750 ഉം അതിന് മുകളിലുമാണ് ഉള്ളതെങ്കില് നിങ്ങളെ സാമ്പത്തികമായി അച്ചടക്കമുള്ളവരാണെന്ന് കണക്കാക്കാം. അതിനാല് വായ്പ ലഭിക്കാനുള്ള സാധ്യതയും കൂടുതലാണ്. അതിനാല് വായ്പ നല്കുന്നവര്ക്ക് ക്രെഡിറ്റ് റിസ്ക് കുറവാണ്. വായ്പ കൊടുക്കുന്നവരുടെ ക്രെഡിറ്റ് റിസ്ക് കുറയുന്നത് ഉയര്ന്ന ക്രെഡിറ്റ് സ്കോര് ഉള്ള അപേക്ഷകര്ക്ക് വളരെ കുറഞ്ഞ പലിശ നിരക്കില് വായ്പ നല്കാന് സ്ഥാപനങ്ങളെ പ്രേരിപ്പിക്കും.നിങ്ങള് ഭാവിയില് ഭവന വായ്പ എടുക്കാന് ആലോചിക്കുന്നുണ്ടെങ്കില് ഇപ്പോള് തന്നെ ക്രെഡിറ്റ് സ്കോര് മെച്ചപ്പെടുത്താന് ആലോചിക്കുക.
ക്രെഡിറ്റ് ബ്യൂറോകളില് നിന്നോ ഓണ്ലൈന് ഫിനാന്ഷ്യല് മാര്ക്കറ്റ് പ്ലേസില് നിന്നോ ആനുകാലിക ഇടവേളകളില് നിങ്ങളുടെ ക്രെഡിറ്റ് റിപ്പോര്ട്ട് ലഭ്യമാക്കിക്കൊണ്ട് നടപടികള് ആരംഭിക്കുക.
എമര്ജന്സി ഫണ്ടില് ഭവന വായ്പയുടെ ഇഎംഐ
നിങ്ങള് എമര്ജന്സി ഫണ്ടില് കുറഞ്ഞത് ആറ് മാസത്തെ ഇഎംഐ അടക്കാനുള്ള തുക നീക്കിവെക്കണം. കാരണം ഏതെങ്കിലും കാരണവശാല് ഭവന വായ്പയുടെ ഇഎംഐ മുടങ്ങിയാല് അത് ദീര്ഘകാലത്തിലുള്ള സാമ്പത്തികാവസ്ഥയെ ബാധിക്കും. അസുഖം കാരണമോ ജോലി നഷ്ടമായാലോ മറ്റ് അപകടങ്ങള് മൂലമോ വരുമാനനഷ്ടം ഉണ്ടായാല് ഭാവിയില് വായ്പാ തിരിച്ചടവിനെ ബാധിക്കും. ഇത് നിശ്ചിത തീയതില് വായ്പ തിരിച്ചടക്കാന് പരാജയപ്പെടുന്നത് കനത്ത പിഴ ഈടാക്കുന്നതിലേക്കാണ് കൊണ്ടെത്തിക്കുക. ഇത് ഭാവിയില് വായ്പ ലഭിക്കാനും ക്രെഡിറ്റ് സ്കോര് നിലനിര്ത്തുന്നതിലുള്ള യോഗ്യത കുറയ്ക്കാനും ഇടയാക്കും.
തിരിച്ചടക്കാനുള്ള ശേഷിയുണ്ടോ?
പുതിയ ഭവന വായ്പയുടെ ഇഎംഐ അടക്കാന് നിങ്ങള്ക്ക് സാമ്പത്തിക ശേഷിയുണ്ടോ എന്ന് ആദ്യം പരിശോധിക്കുക. നിങ്ങളുടെ പ്രതിമാസ വരുമാനത്തിന്റെ അമ്പത് മുതല് അറുപത് ശതമാനം വരെ വായ്പ നല്കാനാണ് ഭവന വായ്പ നല്കുന്ന ധനകാര്യ സ്ഥാപനങ്ങള് താല്പ്പര്യപ്പെടുന്നത്. ഈ പരിധിയിലുള്ള തുകയുടെ വായ്പകള് നിങ്ങള്ക്ക് നേരത്തെയുണ്ടെങ്കില് അവര് വായ്പ നല്കില്ല. അതുകൊണ്ട് പല വായ്പകളും നിങ്ങള് മുന്കൂട്ടി ക്ലോസ് ചെയ്യുക. ഇത് സാധ്യമല്ലെങ്കില് ദീര്ഘകാലത്തേക്കുള്ള ഭവന വായ്പക്ക് അപേക്ഷിക്കുക. കാരണം ഇഎംഐ കുറഞ്ഞുകിട്ടും. ഇത് വായ്പ നല്കാനുള്ള സാധ്യത വര്ധിപ്പിക്കും.
കുറഞ്ഞ പലിശ വാഗ്ദാനം ചെയ്യുന്നവരെ പരിഗണിക്കുക
ഭവന വായ്പയെ കുറിച്ച് ആലോചിച്ച് തുടങ്ങുമ്പോള് തന്നെ കാര്യങ്ങള് സ്വയം പഠിക്കാന് ശ്രമിക്കുക. പല സ്ഥാപനങ്ങളെയും സമീപിക്കുക. ഏറ്റവും കുറവ് പലിശ വാഗ്ദാനം ചെയ്യുന്നവരും പ്രൊസ്സസിങ് ചാര്ജ് കുറവ് ഈടാക്കുന്നതും ഏത് സ്ഥാപനമാണെന്ന് തിരിച്ചറിയുക. ഭാവിയില് വലിയ സാമ്പത്തിക ബാധ്യതയില്ലാതെ കാര്യങ്ങള് കൊണ്ടുപോകാന് ഏത് സ്ഥാപനമാണ് സഹായിക്കുകയെന്ന് മനസിലാക്കുക. ഇതിന് ശേഷം മാത്രം വായ്പക്ക് അപേക്ഷിക്കുക. നിലവില് മുപ്പത് ലക്ഷംരൂപയ്ക്ക ്താഴെയുള്ള ഭവന വായ്പകള്ക്ക് 7.60-10.25 ശതമാനമാണ് സാധാരണയായി ബാങ്കുകള് പലിശ ഈടാക്കുന്നത്.