പേടിഎം ഉപയോ​ഗിക്കാറുണ്ടോ? എങ്കിൽ നേടാം എസ്ബിഐ ക്രെഡിറ്റ് കാർഡ്

കൊച്ചി: ഡിജിറ്റൽ പേയ്‌മെന്റ് പ്ലാറ്റ്‌ഫോമായ പേടിഎമ്മുമായി സഹകരിച്ച് ക്രെഡിറ്റ് കാർഡുകൾ പുറത്തിറക്കിയതായി എസ്‌ബി‌ഐ കാർഡ് അറിയിച്ചു. പേടിഎം എസ്‌ബി‌ഐ കാർഡ്, പേടിഎം എസ്‌ബി‌ഐ കാർഡ് സെലക്റ്റ് എന്നിങ്ങനെ രണ്ട് കാർഡുകളാണ് പുറത്തിറക്കിയത്. പേടിഎമ്മിലൂടെയുള്ള ഇടപാടുകൾ അടിസ്ഥാനമാക്കിയാണ് ഉപയോക്താക്കൾക്ക് ക്രെഡിറ്റ് കാർഡ് ലഭ്യമാക്കുക. മികച്ച ഇടപാട് ഹിസ്റ്ററിയുള്ളവർ ക്രെഡിറ്റ് കാർഡിന് അർഹരാണ്.

സുരക്ഷിതവും മെച്ചപ്പെട്ടതുമായ ഉപഭോക്തൃ അനുഭവത്തിനും ഡിജിറ്റൽ രൂപത്തിലുള്ള പേയ്‌മെന്റുകൾ പ്രോത്സാഹിപ്പിക്കുന്നതിനുമാണ് പുതിയ ക്രെഡിറ്റ് കാ‍ർഡുകൾ അവതരിപ്പിച്ചതെന്ന് എസ്‌ബി‌ഐ കാർഡ് എം‌ഡിയും സി‌ഇ‌ഒയുമായ അശ്വിനി കുമാർ തിവാരി പറഞ്ഞു. പുതുതായി ക്രെഡിറ്റ് കാർഡ് ഉപയോഗിക്കുന്ന ഉപയോക്താക്കളെ ഔപചാരിക സമ്പദ്‌വ്യവസ്ഥയിലേക്ക് കൊണ്ടുവരികയും സാമ്പത്തിക ഇടപാടുകൾ നിയന്ത്രിക്കാൻ അവരെ പ്രാപ്തരാക്കുകയും ചെയ്യുക എന്നതാണ് എസ്ബിഐ കാർഡ്-പേടിഎം പങ്കാളിത്തം ലക്ഷ്യമിടുന്നത്. പേടിഎം ഇക്കോസിസ്റ്റം, തേർഡ് പാർട്ടി പ്ലാറ്റ്ഫോം, ഓഫ്‌ലൈൻ റീട്ടെയിൽ സ്റ്റോറുകൾ എന്നിവയിലുടനീളം ഈ കാർഡുകൾ ഉപയോഗിക്കാൻ കഴിയും.

Also Read: സർക്കാർ ഉദ്യോഗസ്ഥനാണോ? മഹീന്ദ്ര വാഹനം വാങ്ങാം 11,500 രൂപ കിഴിവിൽ, ഒപ്പം ഈസി ഇഎംഐയും

കൊറോണ വൈറസിനെ തുടർന്ന് സുരക്ഷിതവും പണരഹിതവുമായ ഇടപാടുകളാണ് ആളുകൾ കൂടുതലായും തിരഞ്ഞെടുക്കുന്നത്. ഇതിനെ തുടർന്ന് തടസ്സമില്ലാത്തതും സമ്പർക്കമില്ലാത്തതുമായ പേയ്‌മെന്റുകൾക്കായി ടാപ്പ് ടു പേ സവിശേഷത കാർഡുകളിൽ ഒരുക്കിയിട്ടുണ്ട്. പേടിഎം വഴിയുള്ള ഇടപാടുകളുടെ ഹിസ്റ്ററി അണ്ടർ‌റൈറ്റിംഗ് നടത്തിയതിനുശേഷമാണ് ഉപയോക്താക്കൾക്ക് എസ്ബിഐ കാർഡ് ലഭ്യമാക്കുക. ഇന്ത്യയിലെ യുവാക്കൾക്കും പ്രൊഫഷണലുകൾക്കും പ്രയോജനപ്പെടുന്നതിനാണ് കാർഡ് രൂപകൽപ്പന ചെയ്തതെന്നും അശ്വിനി കുമാർ പറഞ്ഞു.