വ്യക്തി​ഗത വായ്പ; തിരിച്ചടവ് മുടങ്ങിയാൽ തിരിച്ചടി ഉറപ്പ്

ഇന്ന് വ്യക്തിഗത വായ്പകൾ എടുക്കുന്നവരുടെ എണ്ണം വർധിച്ചു വരികയാണ്. ഇത്തരം വായ്പകൾ സൗകര്യങ്ങളും, മറ്റ് വായ്പകളെ അപേക്ഷിച്ച് ചില നേട്ടങ്ങളും നൽകുന്നു. ആകർഷകമായ പലിശ നിരക്കുകളിൽ വ്യക്തിഗത വായ്പകൾ നൽകാൻ ധനകാര്യ സ്ഥാപനങ്ങൾ മത്സരിക്കുന്ന കാഴ്ച്ചയാണ് ഇന്ന്.

വിവിധ തരം ആവശ്യങ്ങൾക്ക് ഉപയോഗിക്കാൻ സാധിക്കുമെന്നത് വ്യക്തിഗത വായ്പയുടെ പ്രത്യേകതകളാണ്. എന്നാൽ മറ്റ് വായ്പകൾ പോലെ തന്നെ ഇവ യഥാസമയം തിരിച്ചടയ്ക്കേണ്ടതും ആവശ്യമാണ്. വായ്പയുടെ അടവ് തെറ്റുന്നത് ദീർഘകാലത്തേക്ക് നീണ്ടു നിൽക്കുന്ന പരിണിത ഫലങ്ങളുണ്ടാക്കും. അവയെന്തൊക്കെയാണ് എന്നതാണ് ഇവിടെ പരിശോധിക്കുന്നത്.


ക്രെഡിറ്റ് സ്കോറിലുള്ള നെഗറ്റീവ് സ്വാധീനം
ഒരു വ്യക്തിയുടെ സാമ്പത്തിക അച്ചടക്കത്തിന്റെ സൂചന കൂടിയാണ് ക്രെഡിറ്റ് സ്കോർ. വായ്പ നൽകണോ വേണ്ടയോ എന്ന തീരുമാനം എടുക്കാൻ ധനകാര്യ സ്ഥാപനങ്ങൾ ആശ്രയിക്കുന്നത് ക്രെഡിറ്റ് റിപ്പോർട്ടുകളെയാണ്. വായ്പാ തിരിച്ചടവ് തെറ്റുമ്പോൾ അത് ക്രെഡിറ്റ് സ്കോറിൽ പ്രതിഫലിക്കുകയും, സ്കോർ കുറയാൻ കാരണമാവുകയും ചെയ്യും. ഇക്കാരണത്താൽ ഭാവിയിൽ മറ്റ് ആവശ്യങ്ങൾക്ക് വായ്പ ലഭിക്കുക എന്നത് ബുദ്ധിമുട്ടുള്ളതായി മാറും.

Also Read : ആരോ​ഗ്യ ഇൻഷുറൻസ് പ്രീമിയത്തിൽ എങ്ങനെയൊക്കെ കുറവ് വരുത്താം?
പലിശ നിരക്കിലുള്ള വർധന
തിരിച്ചടവ് തെറ്റുന്നത് ബാലൻസ് ചെയ്യാൻ വേണ്ടി, ധനകാര്യ സ്ഥാപനങ്ങൾ വായ്പാ പലിശ വർധിപ്പിക്കാറുണ്ട്. ഇത് തിരിച്ചടവ് കൂടുതൽ ബുദ്ധിമുട്ടുള്ളതാക്കുകയും, വായ്പയെടുത്ത വ്യക്തിയുടെ സാമ്പത്തിക സാഹചര്യം മോശമാവാൻ കാരണമാവുകയും ചെയ്യും.

പിഴ
മിക്ക ധനകാര്യ സ്ഥാപനങ്ങളും തിരിച്ചടവ് തെറ്റുന്നതിന് പിഴ ഈടാക്കുന്നു. ഇവയ്ക്ക് കൂടുതൽ തുക ചിലവാക്കേണ്ടി വരികയും, വായ്പാ തിരിച്ചടവ് കൂടുതൽ ദുഷ്കരമാവുകയും ചെയ്യും.മാസബജറ്റിനെ അടക്കം ഇത് പ്രതികൂലമായി ബാധിക്കുന്നു. ആസ്തി പണയം വെച്ചിട്ടാണ് വായ്പയെടുത്തതെങ്കിൽ അവ ജപ്തി ചെയ്യപ്പെടുന്നു. ഇത്തരത്തിൽ റിക്കവറി നടപടികളുമായി മുന്നോട്ട് പോവാൻ വായ്പ നൽകിയ സ്ഥാപനത്തിന് സാധിക്കും.

Also Read : വീട്ടിൽ മുതിർന്ന പൗരൻമാരുണ്ടോ? സാമ്പത്തിക ആനുകൂല്യങ്ങൾ നിരവധി
നിയമ നടപടികൾ
മുകളിൽ പറഞ്ഞ നടപടികൾ കൂടാതെ അവസാന ശ്രമമെന്ന നിലയിൽ നിയമ നടപടികളിലേക്കാണ് ധനകാര്യ സ്ഥാപനങ്ങൾ കടക്കുന്നത്. വായ്പ നൽകിയ സ്ഥാപനം കോടതിയിൽ സിവിൽ കേസ് ഫയൽ ചെയ്യുന്നു. ഇത്തരത്തിൽ വായ്പ എടുത്ത വ്യക്തിക്കെതിരെ അറസ്ററ് വാറന്റ് പുറപ്പെടുവിക്കപ്പെടുന്നു. വായ്പാ തുകയുടെ കുറച്ചു ഭാഗം തിരിച്ചടച്ചിട്ടുണ്ടെങ്കിൽപ്പോലും വായ്പ നൽകിയ സ്ഥാപനത്തിന്, തിരിച്ചടവ് മുടങ്ങിയതിന്റെ പേരിൽ നിയമനടപടികൾ സ്വീകരിക്കാൻ സാധിക്കും.

Read Latest Business News and Malayalam News