എൻപിഎസിന് കീഴിൽ ഉറപ്പായ വരുമാനം; പുതിയ പദ്ധതി ഉടൻ

ന്യൂഡൽഹി: എൻപിഎസിന് കീഴിൽ സ്ഥിരവരുമാനം നേടി തരുന്ന പുതിയ പദ്ധതി ഉടൻ. പെൻഷൻ ഫണ്ട് റെഗുലേറ്ററി ഡവലപ്മെൻറ് അതോറിറ്റിയാണ് ഇക്കാര്യം വ്യക്തമാക്കിയത്. 2021 സാമ്പത്തിക വര്‍ഷം അവസാനത്തോടെ പുതിയ പദ്ധതി രൂപീകരിയ്ക്കും എന്നാണ് സൂചന.
എൻപിഎസിന് കീഴിൽ പുതിയ പദ്ധതി അവതരിപ്പിയ്ക്കും എന്നും ഇതിനായി പ്രത്യേക സമിതി രൂപീകരിയ്ക്കും എന്ന് പിഎഫ്ആര്‍ഡിഎ ചെയര്‍മാൻ സുപ്രീതം ബദ്ധ്യോപധ്യായ വ്യക്തമാക്കി .

പോളിസികളിൽ നിന്ന് വരുമാനം ഉറപ്പ് നൽകുന്ന നിരവധി സ്കീമുകൾ ഇൻഷുറൻസ് കമ്പനികൾ അവതരിപ്പിച്ചിട്ടുണ്ടെങ്കിലും ഇതിനും കീഴിൽ നിക്ഷേപകര്‍ക്ക് കാര്യമായ ലാഭം ഉണ്ടാകാറില്ല. ഇതിനു പരിഹാരം ആയി ആണ് പുതിയ ഉത്പന്നം എത്തുന്നത്.

Also Read: നിങ്ങളുടെ നിക്ഷേപത്തിന് 7-8 ശതമാനം പലിശ വാഗ്ദം ചെയ്യുന്ന സര്‍ക്കാര്‍ സ്ഥാപനങ്ങൾ

എല്ലാവര്‍ക്കും പെൻഷൻ ലഭ്യമാക്കുന്ന യൂണിവേഴ്സൽ പെൻഷൻ പദ്ധതിയും ധനമന്ത്രാലയത്തിൻെറ പരിഗണയ്ക്കായി സമര്‍പ്പിച്ചിട്ടുണ്ട് എന്നാണ് സൂചന. രാജ്യത്തെ വലിയ ഒരു വിഭാഗം ആളുകൾക്ക് പെൻഷൻ ലഭ്യമാക്കുന്നതാണ് പദ്ധതി. ചെറു ബിസിനസുകൾക്കും അസംഘടിത മേഖലകളിലെ തൊഴിലാളികൾക്കും പെൻഷൻ പദ്ധതിയുടെ ഗുണം ലഭിയ്ക്കുന്ന രീതിയിലാണ് പദ്ധതി.

രാജ്യത്ത് 18 വയസ്സിനും 65 വയസ്സിനും ഇടയിൽ പ്രായം ഉള്ളവ‍ര്‍ക്കാണ് നാഷണൽ പദ്ധതിയിൽ അംഗമാകാൻ ആകുന്നത്. 500 രൂപയുടെ ഗുണിതങ്ങളായി ചുരുങ്ങിയത് 6,000 രൂപയെങ്കിലും പ്രതിവ‍ര്‍ഷം നിക്ഷേപിച്ചിരിക്കണം. എൻപിഎസ് നിക്ഷേപത്തിന് നികുതി ഇളവ് ഉണ്ട്. മൂലധന വളര്‍ച്ച കൊണ്ടും സുരക്ഷിത നിക്ഷേപം എന്ന നിലയിൽ പദ്ധതി ആകര്‍ഷകമാണ്.