റിക്കറിങ് ഡെപ്പോസിറ്റ്
സര്‍ക്കാര്‍ ഗ്യാരണ്ടി നല്‍കുന്ന നിക്ഷേപ മാര്‍ഗമാണ് പോസ്റ്റ് ഓഫീസ് റിക്കറിങ് ഡെപ്പോസിറ്റ്. 100 രൂപ മുതല്‍ പദ്ധതിയില്‍ നിക്ഷേപം സാധ്യമാണ്. നിക്ഷേപത്തിനു ഉയര്‍ന്ന പരിധിയില്ല. 5.8 ശതമാനമാണ് പലിശ ലഭിക്കുക. അഞ്ചു വര്‍ഷമാണ് റിക്കറിങ് ഡെപ്പോസിറ്റുകളുടെ കാലാവധിയെങ്കിലും അഞ്ചുവര്‍ഷം കൂടി തുടരാന്‍ സാധിക്കും. ഈ തുടരുന്ന കാലയളവില്‍ നിക്ഷേപകര്‍ നിക്ഷേപം നടത്തണമെന്നില്ല. നിക്ഷേപം നടത്താതെ തന്നെ നിങ്ങളുടെ നിക്ഷേപങ്ങള്‍ക്കു പലിശ ലഭിക്കും.
10000 നിക്ഷേപിച്ചാല്‍ 16 ലക്ഷം ഉറപ്പ്
മാസം 10,000 രൂപ നിക്ഷേപിക്കാന്‍ നിങ്ങള്‍ തയ്യാറാണെങ്കില്‍ പത്തുവര്‍ഷത്തിനുള്ളില്‍ 16 ലക്ഷം നിങ്ങള്‍ക്കു തിരികെ ലഭിക്കും. നിലവില്‍ 5.8 ശതമാനമാണ് പദ്ധതിയുടെ പലിശനിരക്കെന്നു പറഞ്ഞു കഴിഞ്ഞലോ. പാദാടിസ്ഥാനത്തിലാണ് സര്‍ക്കാര്‍ ഇത്തരം പദ്ധതികളുടെ പലിശ നിരക്ക് നിശ്ചയിക്കുന്നത്. കഴിഞ്ഞ കാലങ്ങളില്‍ നിക്ഷേപകര്‍ക്കു മികച്ച നേട്ടം സമ്മാനിച്ച ചരിത്രമാണ് പോസ്റ്റ് ഓഫീസ് നിക്ഷേപങ്ങള്‍ക്കുള്ളത്. മാസം 10000 രൂപ വച്ചു നിക്ഷേപിക്കുമ്പോള്‍ 10 വര്‍ഷംകൊണ്ട് നിങ്ങളുടെ നിക്ഷേപത്തുക 1,200,000 രൂപയാണ്. അതായത് നാലു ലക്ഷത്തിനു മുളകില്‍ നിങ്ങള്‍ക്കു പലിശ വരുമാനം ലഭിക്കും.
ഈടില്ലാതെ വായ്പ
പുതിയ നിബന്ധകള്‍ പ്രകാരം റിക്കറിങ് ഡെപ്പോസിറ്റ് ഉടമകള്‍ക്ക് ഈടില്ലാതെ തന്നെ വായ്പ ലഭിക്കും. നേരത്തേ ഈ സവിശേഷത നിക്ഷേപത്തിനുണ്ടായിരുന്നില്ല. ഒരു വായ്പയ്ക്കായി ബാങ്കുകളെ സമീപിച്ചാല്‍ ഈടില്ലാതെ ലഭിക്കില്ലെന്ന അവസ്ഥയായിട്ടുണ്ട്. എന്നാല്‍ റിക്കറിങ് ഡെപ്പോസിറ്റുള്ള ഏതൊരാള്‍ക്കും പോസ്റ്റ് ഓഫീസ് ഇനി വായ്പ നല്‍കും. ഉപയോക്താക്കളുടെ നിരന്തര ആവശ്യം കണക്കിലെടുത്താണു വായ്പാ സേവനം പ്രഖ്യാപിച്ചത്. റിക്കറിങ് ഡെപ്പോസിറ്റ് തുടങ്ങി 12 തവണകള്‍ അടച്ചവര്‍ക്കു മാത്രമേ വായ്പ ലഭിക്കൂ. നിക്ഷേപത്തിന്റെ 50 ശതമാനമാകും വായ്പയായി ലഭിക്കുക. തുടര്‍ന്നുള്ള മാസത്തവണകള്‍ക്കൊപ്പം വായ്പാ അടച്ചുതീര്‍ത്താല്‍ മതി. രണ്ടു ശതമാനം മാത്രമാണ് പലിശ.
ശ്രദ്ധിക്കേണ്ട കാര്യങ്ങള്‍
മികച്ച നേട്ടത്തിനായി മാസത്തവണകളില്‍ മുടക്കം വരുത്താതിരിക്കുക. റിസ്‌ക് ഒട്ടുമില്ലാത്ത നിക്ഷേപമാണിത്. അതിനാല്‍ തന്നെ മാസത്തവണകളില്‍ മുടക്കം വന്നാല്‍ നിക്ഷേപത്തിന്റെ ഒരു ശതമാനം പിഴ ഈടാക്കും. നാലു തവണ മുടങ്ങിയാല്‍ അക്കൗണ്ട് നിര്‍ജീവമാകും. അക്കൗണ്ട് പുതുക്കുന്നതിനു രണ്ടാമാസമാകും ലഭിക്കുക. ഇതിനുള്ളില്‍ നടപടികള്‍ പൂര്‍ത്തീകരിച്ചില്ലെങ്കില്‍ എന്നന്നേക്കുമായി പദ്ധതിയില്‍നിന്നു പുറത്തുപോകും. നിക്ഷേപങ്ങളുടെ നോമിനിയെ ഏതു നിമിഷം വേണമെങ്കിലും മാറ്റാനുള്ള അവസരമുണ്ട്. 18 വയസ് പൂര്‍ത്തിയായ ഏതൊരു ഇന്ത്യന്‍ പൗരനും പദ്ധതിയില്‍ അംഗമാകാം.