വസ്തു ലേലത്തിലൂടെ വീടും സ്ഥലവും കുറഞ്ഞ വിലയിൽ സ്വന്തമാക്കാം. പൊതുമേഖലാ ബാങ്കുകൾ ജപ്തി നടപടികളുടെ ഭാഗമായി വീടും സ്ഥലവും ഓൺലൈനിലൂടെ ലേലം ചെയ്യുന്നു. ഇ-പ്രോപ്പർട്ടി ലേലത്തിലൂടെ മിതമായ നിരക്കിൽ പ്രോപ്പർട്ടി കണ്ടെത്താൻ ആകും. അഞ്ച് ലക്ഷം വീടുകളാണ് അടുത്ത അഞ്ച് വർഷത്തിനുള്ളിൽ പുതിയ ലേലത്തിൽ ഉൾപ്പെടുത്തുക. ഓൺലൈൻ ലേലത്തിനായി
ഇന്ത്യയിലെ പൊതുമേഖലാ ബാങ്കുകൾ ഒരു ഇ-ഓക്ഷൻ ആപ്പ് അവതരിപ്പിക്കുകയാണ്. ആപ്പ് ഉപയോക്താക്കൾക്ക് വീട്ടിലിരുന്ന് തന്നെ സ്വത്തുക്കളുമായി ബന്ധപ്പെട്ട വിവരങ്ങൾ അറിയാനാകും. സ്ഥലം, ലേലത്തിൻെറ ആരംഭ തുക തുടങ്ങിയ വിശദാംശങ്ങൾ എല്ലാം ആപ്പിൽ ഉൾപ്പെടുത്തും. വസ്തു വാങ്ങാൻ ആഗ്രഹിക്കുന്നവർക്ക് ഒരേസമയം മുഴുവൻ വിവരങ്ങളും ലഭിക്കാൻ ആപ്പ് സഹായകരമാകും. വസ്തു വാങ്ങൽ എളുപ്പമാകുന്നതിനൊപ്പം ഇടനിലക്കാർ മുഖേനയുള്ള തട്ടിപ്പുകൾ കുറയ്ക്കാനും ഈ നീക്കം സഹായകരമാകുമെന്നാണ് പ്രതീക്ഷ.
ആപ്പിലോ വെബ് പോർട്ടലിലോ ലോഗിൻ ചെയ്യുന്നതിലൂടെ, ഉപയോക്താക്കൾക്ക് പ്രോപ്പർട്ടിയുമായി ബന്ധപ്പെട്ട ഡാറ്റ, ഡോക്യുമെന്റുകൾ, വിവരങ്ങൾ എന്നിവ എളുപ്പത്തിൽ ലഭിക്കും. വ്യക്തികൾക്ക് സ്മാർട്ട്ഫോണുകളിലൂടെ തന്നെ വീടുകളുടെ വിവരങ്ങൾ ലഭിക്കുകയും റിയൽ എസ്റ്റേറ്റ് ഇടപാടുകൾ എളുപ്പമാക്കുകയും ചെയ്യും.
ഇടപാട് പ്രക്രിയ വേഗത്തിൽ നടക്കും എന്ന മെച്ചവുമുണ്ട്. വാങ്ങുന്നവർക്കും വിൽക്കുന്നവർക്കും ഇടപാടുകൾ സുതാര്യമായിരിക്കും. വിൽപ്പനയ്ക്കുള്ള പ്രോപ്പർട്ടികളുടെ വിശദാംശങ്ങൾ എല്ലാം ഒറ്റ ക്ലിക്കിൽ ലഭ്യമാകാൻ ആപ്പ് സഹായിക്കും. ഇന്ത്യയിൽ എവിടെയുമുള്ള വസ്തുവകകൾ കുറഞ്ഞ വിലയിൽ വാങ്ങുന്നതിനും വിൽക്കുന്നതിനുമുള്ള പ്രക്രിയ കാര്യക്ഷമമാക്കുന്നതിന് ഇ- ഓക്ഷൻ ആപ്പ് സഹായകരമാകും. നിലവിൽ ബാങ്ക് സംഘടനകളുടെ e-Bkray എന്ന പോർട്ടലിലൂടെയും ഇത്തരം വസ്തു ലേലത്തിൻെറ വിവരങ്ങൾ ലഭ്യമാണ്.