ചെക്കുകൾ ഇനി ​പതിവിലും വേ​ഗത്തിൽ മാറികിട്ടും; കാരണമിതാണ്

ഡൽഹി: ചെക്ക് ക്ലിയറൻസ് പ്രക്രിയ ത്വരിതപ്പെടുത്താൻ രാജ്യത്തുടനീളമുള്ള എല്ലാ ബാങ്ക് ശാഖകളിലും 2021 സെപ്റ്റംബറോടെ ചെക്ക് ട്രങ്കേഷൻ സിസ്റ്റം (സിടിഎസ്) കൊണ്ടുവരുമെന്ന് റിസർവ് ബാങ്ക്. പേപ്പർ അധിഷ്ഠിത ക്ലിയറിംഗിന്റെ പ്രവർത്തനക്ഷമത വർധിപ്പിക്കുന്നതിനും ചെക്കുകളുടെ വാങ്ങൽ, മാറ്റി കൊടുക്കൽ പ്രക്രിയകൾ വേഗത്തിലാക്കുന്നതിനും ഇതിലൂടെ മികച്ച ഉപഭോക്തൃ സേവനം സാധ്യമാക്കുന്നതിനും വേണ്ടിയാണ് രാജ്യത്തെ മുഴുവൻ ബാങ്ക് ശാഖകളും സിടിഎസ് ക്ലിയറിംഗ് സംവിധാനത്തിന് കീഴിൽ കൊണ്ടുവരാൻ റിസർവ് തീരുമാനിച്ചത്.

ഇതുസംബന്ധിച്ചുള്ള പ്രത്യേക പ്രവർത്തന മാർഗ്ഗനിർദ്ദേശങ്ങൾ ഒരു മാസത്തിനുള്ളിൽ പുറത്തിറക്കും. ചെക്ക് മുഖേനയുള്ള പണമിടപാടുകൾക്ക് കൂടുതല്‍ സുരക്ഷിതത്വവും വേഗവും ഉറപ്പാക്കാൻ 2010ലാണ് സിടിഎസ് സംവിധാനം ഏർപ്പെടുത്തിയത്. മൂന്ന് ചെക്ക് പ്രോസസ്സിംഗ് ഗ്രിഡുകളിലായി 1,50,000 ബാങ്ക് ശാഖകൾ സിസ്റ്റത്തിന് കീഴിൽ പ്രവർത്തിക്കുന്നുണ്ട്. 1,219 പഴയ നോൺ സിടിഎസ് ക്ലിയറിംഗ് ഹൗസുകളും ഇപ്പോൾ പൂർണമായും സിടിഎസിലേക്ക് മാറിയിട്ടുണ്ട്. നിലവിൽ 18,000 ഓളം ബാങ്ക് ശാഖകൾ ഔപചാരിക ക്ലിയറിംഗ് ക്രമീകരണത്തിന് പുറത്താണ്. സെപ്റ്റംബറോടെ ഈ ശാഖകളെയെല്ലാം സിടിഎസ് ക്ലിയറിംഗിന് കീഴിൽ കൊണ്ടുവരാനാണ് ഉദ്ദേശിക്കുന്നതെന്നും വികസന, നിയന്ത്രണ നയങ്ങൾ സംബന്ധിച്ച പ്രസ്താവനയിൽ റിസർവ് ബാങ്ക് പറഞ്ഞു.

Also Read: ഭാരതരത്നം; സമൂഹമാധ്യമങ്ങളിലെ ക്യാംപെയ്ൻ അവസാനിപ്പിയ്ക്കാൻ ആരാധകരോട് രത്തൻ ടാറ്റ

ഡ്രോയർ നൽകുന്ന ഫിസിക്കൽ ചെക്കിന്റെ ഒഴുക്ക് തടയുന്ന പ്രക്രിയയാണ് സിടിഎസ്. സാധാരണ പേപ്പര്‍ ചെക്കുകള്‍ ക്ലിയര്‍ ചെയ്യുന്ന അതേ സംവിധാനമാണ് സിടിഎസിനും ബാങ്ക് ബ്രാഞ്ചുകള്‍ സ്വീകരിക്കുക. പക്ഷേ ഇവിടെ യഥാര്‍ത്ഥ ചെക്കുകളുടെ ഇലക്ട്രോണിക് ഇമേജ് ഉപയോഗിച്ചാണ് ക്ലിയറിങ് പ്രക്രിയ നടത്തുക എന്ന് മാത്രം. കൂടാതെ എംഐസിആര്‍ ഡാറ്റ, ചെക്ക് സമര്‍പ്പിച്ച തിയ്യതി, സമര്‍പ്പിച്ച ബാങ്ക് എന്നീ വിവരങ്ങളും ബാങ്കിൽ നൽകും. ഇത്രയും വിവരങ്ങൾ നൽകുന്നതോടെ മണിക്കൂറുകള്‍ക്കകം ബാങ്ക് അക്കൗണ്ടിലേക്ക് പണം ക്രെഡിറ്റ് ചെയ്യപ്പെടും.