ബുക്കിങ് സമയം പ്രധാനമാണ്
യാത്രാ തീയതികളും സ്ഥലവുമൊക്കെ നിശ്ചയിച്ചിട്ടുണ്ടെങ്കിൽ ആദ്യ പടി, എത്രയും വേഗം ഫ്ലൈറ്റ് ടിക്കറ്റുകൾ ബുക്ക് ചെയ്യുക എന്നതാണ്. കാരണം യാത്രാ തീയതി അടുക്കുന്തോറും, ഫ്ലൈറ്റ് നിരക്കുകൾ ഉയരാം. ടിക്കറ്റുകൾ മുൻകൂട്ടി ബുക്ക് ചെയ്യുന്നതിലൂടെ, ധാരാളം പണം ലാഭിക്കാനും തുക മറ്റ് ആവശ്യങ്ങൾക്കായി ചെലവഴിക്കാനും കഴിയും.
യാത്ര ചെയ്യാൻ തിരക്കു കുറഞ്ഞ ദിവസം തിരഞ്ഞെടുക്കുകയാണ് മറ്റൊരു വഴി. തിങ്കൾ മുതൽ ബുധൻ വരെയുള്ള ദിവസങ്ങളിൽ അര്‍ദ്ധരാത്രിയിൽ ടിക്കറ്റ് ബുക്ക് ചെയ്യുന്നത് താരതമ്യേന കുറഞ്ഞ നിരക്കിൽ ടിക്കറ്റ് കിട്ടാൻ സഹായകരമാകുമെന്ന് ട്രാവൽ റിപ്പോര്‍ട്ടുകൾ സൂചിപ്പിക്കുന്നു.
നിരക്കുകൾ താരതമ്യം ചെയ്യാം
ടിക്കറ്റ് ബുക്ക് ചെയ്യാൻ നിരവധി വെബ്സൈറ്റുകൾ ഉള്ളതിനാൽ, ടിക്കറ്റ് ബുക്ക് ചെയ്യുന്നതിന് മുമ്പ് വിവിധ കമ്പനികളുടെ നിരക്കുകൾ താരതമ്യം ചെയ്യാം. ഏറ്റവും കുറഞ്ഞ നിരക്കിൽ ഫ്ലൈറ്റ് ടിക്കറ്റുകൾ ബുക്ക് ചെയ്യാൻ, നിങ്ങൾ അവ ഓരോ സൈറ്റുകളും നോക്കുകയും വ്യത്യസ്ത എയര്‍ലൈൻ കമ്പനികളുടെ നിരക്കുകൾ താരതമ്യം ചെയ്യുകയും വേണം.
എയർലൈൻ വെബ്സൈറ്റുകൾ സന്ദർശിക്കുമ്പോൾ അലേർട്ടുകൾ നൽകുന്നത് ഉറപ്പാക്കുക. കുറഞ്ഞ നിരക്കിലെ ഫ്ലൈറ്റ് ടിക്കറ്റുകൾ ലഭിക്കാൻ പ്രത്യേക ഓഫറുകൾ സഹായകരമാകും. ഇത്തരം സന്ദര്‍ഭങ്ങളിൽ ഓഫര്‍ ടിക്കറ്റുകൾ വിറ്റഴിയുന്നതിന് മുമ്പ് തന്നെ ടിക്കറ്റുകൾ ബുക്ക് ചെയ്യാം.ഗോഎയര്‍, എയര്‍ഏഷ്യ, ജെറ്റ്സ്റ്റാര്‍, ഇൻഡിഗോ തുടങ്ങിയ എയർലൈനുകളുടെ സോഷ്യൽ മീഡിയ ഹാൻഡിലുകൾ പിന്തുടരുന്നതിലൂടെയും വിവിധ ഓഫറുകളെ കുറിച്ച് അറിയാം.
ഒരു ഇൻകഗ്നിറ്റോ ട്രിക്ക്
നിരവധി തവണ ടിക്കറ്റുകൾ സേര്‍ച്ച് ചെയ്യുമ്പോൾ വെബ്സൈറ്റുകൾ പിന്നീട് നിരക്ക് വർദ്ധിപ്പിച്ച് കാട്ടുന്നതിനാൽ കുറഞ്ഞ ടിക്കറ്റുകൾ ഉടൻ തന്നെ ബുക്ക് ചെയ്യാം. ഫ്ലൈറ്റു ടിക്കറ്റുകൾക്കായി തിരയുമ്പോൾ, ഇൻകഗ്നിറ്റോ മോഡ് ഉപയോഗിക്കുക. മുൻകാല സേര്‍ച്ച് ഹിസ്റ്ററി ലഭിക്കില്ല. കുറഞ്ഞ നിരക്കുകൾ ലഭിക്കുന്നതിന് മറ്റൊരു ലാപ്‌ടോപ്പിൽ നിന്നോ കമ്പ്യൂട്ടറിൽ നിന്നോ ടിക്കറ്റ് നിരക്കുകൾ ബ്രൗസ് ചെയ്യാം. ഓഫര്‍ ടിക്കറ്റുകൾ, തിരക്കുകുറഞ്ഞ സമയത്തെ ടിക്കറ്റ് ബുക്കിങ് എന്നിവ പോലെ തന്നെ കുറഞ്ഞ നിരക്കിൽ ടിക്കറ്റ് ലഭിക്കാൻ ഈ മാര്‍ഗവും സഹായകരമാകും.