സേവിങ്സ് അക്കൗണ്ടുണ്ടോ ? 7 ​ഗുണങ്ങൾ ഇവയാണ്..

ഇന്നത്തെക്കാലത്ത് ബാങ്ക് അക്ക‍ൗണ്ട് ഇല്ലാത്തവരായി ആരും തന്നെ ഉണ്ടായിരിക്കില്ല. ഭൂരിഭാഗം ആളുകളും ഒന്നോ അതിലധികമോ ബാങ്കുകളിൽ അക്കൗണ്ട് ഉള്ളവരാണ്. മിക്കവർക്കും സേവിങ്സ് ബാങ്ക് അക്കൗണ്ടുകളായിരിക്കും ഉണ്ടായിരിക്കുക. വളരെ ഉപയോഗമുള്ള ഒരു ടൂളാണ് ഒരു സേവിങ്സ് ബാങ്ക് അക്കൗണ്ട്. അത് എങ്ങനെയാണ് ഫലപ്രദമായ രീതിയിൽ ഉപയോഗിക്കേണ്ടതെന്ന് തീർച്ചയായും അറി‍ഞ്ഞിരിക്കേണ്ടതാണ്.

ഒരു വ്യക്തി തന്റെ സാമ്പത്തിക ജീവിതം ആരംഭിക്കുമ്പോൾ കൂടെയുണ്ടായിരിക്കേണ്ട ഏറ്റവും പ്രധാനപ്പെട്ട സാമ്പത്തിക ഉല്പന്നമാണ് ഒരു സേവിങ്സ് ബാങ്ക് അക്കൗണ്ട്. ഇത് നിങ്ങളുടെ പണം സുരക്ഷിതമായി വെയ്ക്കാൻ സഹായിക്കുകയും, മോശമല്ലാത്ത ഒരു പലിശ നൽകുകയും ചെയ്യുന്നു. നിങ്ങൾക്ക് നിങ്ങളുടെ സേവിങ്സ് അക്കൗണ്ടിൽ വളരെ എളുപ്പത്തിൽ പണം നിക്ഷേപിക്കുവാനും, അതിൽ നിന്ന് പണം പിൻവലിക്കുവാനും സാധിക്കും.

നിങ്ങളുടെ പണം എപ്പോഴൊക്കെ ആവശ്യമുണ്ടോ അപ്പോഴൊക്കെ പിൻവലിക്കാൻ സേവിങ്സ് ബാങ്ക് അക്കൗണ്ട് സൗകര്യം നൽകുന്നു. അതിനാൽത്തന്നെ ഇത്തരം അക്കൗണ്ടുകളെ എമർജൻസി ഫണ്ടുകളായി കാണാവുന്നതാണ്.

കാര്യങ്ങൾ ഇങ്ങനെയൊക്കെയാണെങ്കിലും നിക്ഷേപത്തിനു വേണ്ടിയുള്ള ഒരു ഇടമായി സേവിങ്സ് ബാങ്ക് അക്കൗണ്ടുകളെ കാണരുതെന്നാണ് വിദഗ്ധർ നിർദേശിക്കുന്നത്. അതിനാൽത്തന്നെ അധികമായുള്ള ഫണ്ട് ഇതിൽ സൂക്ഷിക്കാനാണ് വിദഗ്ധർ നിർദേശിക്കുന്നത്. നിങ്ങളുടെ ഹ്രസ്വ കാല ആവശ്യങ്ങൾ നിറവേറ്റാൻ വേണ്ടി മാത്രം സേവിങ്സ് ബാങ്ക് അക്കൗണ്ടുകളെ ഉപയോഗപ്പെടുത്തുന്നതാണ് നല്ലത്.

ഒരു സേവിങ്സ് ബാങ്ക് അക്കൗണ്ട് തുടങ്ങുന്നതിനു മുമ്പ് ചില കാര്യങ്ങൾ നിർബന്ധമായും പരിശോധിച്ചിരിക്കണം. പലിശ നിരക്ക്, മിനിമം, മാക്സിമം ബാലൻസ്, സീറോ ബാലൻസ് പിഴകളെ സംബന്ധിച്ച വിവരങ്ങൾ എന്നിവ പരിശോധിക്കാം. ചെക്ക് ബുക്ക്, എടിഎം പണം പിൻവലിക്കൽ, പണം നിക്ഷേപിക്കൽ മുതലായ സേവനങ്ങൾക്കുള്ള ചാർ‍ജുകൾ സംബന്ധിച്ച വിവരങ്ങളും അറിഞ്ഞു വെയ്ക്കാം. മുതിർന്ന പൗരൻമാർ തങ്ങളുടെ പണം സ്ഥിരനിക്ഷേപമായി സൂക്ഷിച്ചാൽ കൂടുതൽ പലിശ ലഭിക്കുമെന്ന ഗുണമുണ്ട്.

ഒരു സേവിങ്സ് അക്കൗണ്ടുള്ളതിന്റെ മെച്ചങ്ങൾ താഴെ പറയുന്നവയാണ്.

1. അധികമായുള്ള ഫണ്ട് സൂക്ഷിക്കാനുള്ള ഏറ്റവും മികച്ച മാർഗം ഒരു സേവിങ്സ് ബാങ്ക് അക്കൗണ്ടാണ്.
2. നിങ്ങളുടെ സേവിങ്സ് അക്കൗണ്ടിലുള്ള ബാലൻസിന് നിങ്ങൾക്ക് പലിശ ലഭിക്കുന്നു.
3. പലിശ നിരക്ക് ഒരു വർഷം 3% മുതൽ 6.50 ശതമാനം വരെയാകാം. ബാങ്കുകൾക്കനുസരിച്ചും, അക്കൗണ്ടിന്റെ സ്വഭാവം അനുസരിച്ചും ഇത് വ്യത്യാസപ്പെടും.
4. നിങ്ങളുടെ ഡെബിറ്റ് കാർഡ് ഉപയോഗിച്ച് ഇന്ത്യയിലെങ്ങുമുള്ള എടിഎം ഉപയോഗിക്കാം.
5. ഇന്റർനെറ്റ് ബാങ്കിങ്-മൊബൈൽ ബാങ്കിങ് സൗകര്യം
6. ബാങ്ക് ലോക്കർ വാടകയ്ക്ക് എടുക്കുമ്പോൾ ലഭ്യമാവുന്ന ഡിസ്കൗണ്ട്.
7. ചില ബാങ്കുകൾ ഇൻഷുറൻസ് കവർ ഓഫർ ചെയ്യുന്നു. പേഴസണൽ ആക്സിഡന്റ്, ഡെത്ത് കവറുകൾ ഇതിൽ ഉൾപ്പെടാറുണ്ട്.

പൊതു മേഖലാ, സ്വകാര്യ ബാങ്കുകളിലും, സഹകരണ ബാങ്കുകളിലും, പോസ്റ്റ് ഓഫീസുകളിലും സേവിങ്സ് ബാങ്ക് അക്കൗണ്ടുകൾ തുടങ്ങാം.സേവിങ്സ് ബാങ്ക് അക്കൗണ്ടുകളെക്കുറിച്ച് ബാങ്കുകളുടെ വെബ്സൈറ്റിൽ നിന്നും അറിയാൻ സാധിക്കും. ഇതോടൊപ്പം പുതിയ ബാങ്കിങ് നിയന്ത്രണങ്ങളെക്കുറിച്ചും, ആനുകൂല്യങ്ങളെക്കുറിച്ചും അവബോധമുണ്ടായിരിക്കുന്നതും ഉപകരിക്കും.