പ്രോസസ്സിംഗ് ഫീസില്ല, കൂടുതൽ പലിശ ഇളവും; ഭവന വായ്പയ്ക്ക് പ്രത്യേക ഓഫറുകൾ പ്രഖ്യാപിച്ച് എസ്ബിഐ

ഡൽഹി: രാജ്യത്തെ ഏറ്റവും വലിയ പൊതുമേഖല ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) ഭവന വായ്പയ്ക്ക് പ്രത്യേക ഓഫറുകൾ പ്രഖ്യാപിച്ചു. ഭവന വായ്പയ്ക്ക് അപേക്ഷിക്കുന്നവർക്ക് മൂന്ന് ആനുകൂല്യങ്ങൾ ആണ് എസ്‌ബി‌ഐ പുതുതായി വാഗ്ദാനം ചെയ്തിരിക്കുന്നത്. പ്രോസസ്സിംഗ് ഫീസ് ഇല്ല, സിബിൽ സ്കോർ കൂടുതലുള്ള വായ്പക്കാർക്ക് പലിശ ഇളവ്, യോനോ ആപ്പ് വഴി അപേക്ഷിച്ചാൽ അധിക ഇളവ് എന്നിവയാണ് പുതുതായി പ്രഖ്യാപിച്ച മൂന്ന് ആനുകൂല്യങ്ങൾ.

30 ലക്ഷത്തിൽ കൂടുതലോ ഒരു കോടി രൂപയ്ക്ക് താഴെയോ വായ്പ എടുക്കുന്ന സിബിൽ സ്കോർ കൂടുതലുള്ള വായ്പക്കാർക്ക് 0.10 ശതമാനം പലിശ ഇളവാണ് ലഭിക്കുക. എസ്‌ബി‌ഐയുടെ യോനോ ആപ്പ് വഴി അപേക്ഷിക്കുന്നവർക്ക് 0.5 ശതമാനം അധിക ഇളവും ലഭിക്കും. കൊവിഡ് -19 പകർച്ചവ്യാധി പൊട്ടിപ്പുറപ്പെട്ടതിനുശേഷം റിസർവ് ബാങ്ക് റിപ്പോ നിരക്ക് 4 ശതമാനമായി കുറച്ചിരുന്നു. ഇതിനെത്തുടർന്ന് ഭവന വായ്പകളുടെ പലിശ നിരക്ക് ഒരു പതിറ്റാണ്ടിലെ ഏറ്റവും താഴ്ന്ന നിലയിൽ എത്തി.

Also Read: റിലയൻസ് റീട്ടയ്‍ലിൻെറ ഓഹരികൾ ആമസോൺ വാങ്ങിയേക്കും

നിലവിൽ 6.95 മുതൽ 7.45 ശതമാനം വരെയാണ് ശമ്പളം ലഭിക്കുന്ന ഉപഭോക്താക്കൾക്കളിൽനിന്ന് ഭവന വായ്പയ്ക്കായി എസ്‌ബി‌ഐ ഇടാക്കുന്ന പലിശ നിരക്ക്. സ്വയംതൊഴിൽ ചെയ്യുന്നവർക്ക് 7.10 മുതൽ 7.60 ശതനാമം നിരക്കിലാണ് ഭവന വായ്പ ലഭിക്കുക. പ്രോസസ്സിംഗ് ഫീസ് ഈടാക്കാത്തതിനാൽ വായ്പ തുകയുടെ 0.40 ശതമാനം വരെ ലാഭിക്കാൻ ഉപഭോക്താക്കൾക്ക് സാധിക്കും. അതേസമയം എം‌സി‌എൽ‌ആർ അല്ലെങ്കിൽ ബി‌പി‌എൽ‌ആർ നിരക്കിൽ വായ്പ പലിശ അടയ്ക്കുന്നവർക്ക് റിപോ നിരക്കിൽ ഭവന വായ്പ വാഗ്ദാനം ചെയ്യുന്ന ബാങ്കുകളിലേക്ക് വായ്പ മാറ്റുന്നതിനുള്ള മികച്ച അവസരമാണിതെന്ന് സാമ്പത്തിക ആസൂത്രകർ ചൂണ്ടിക്കാട്ടി.

എം‌സി‌എൽ‌ആറുമായോ ബി‌പി‌എൽ‌ആറുമായോ ലിങ്ക് ചെയ്തിട്ടുള്ള ഭവന വായ്പകൾക്ക് ആർ‌ബി‌ഐ റിപ്പോ നിരക്ക് കുറച്ചതിന്റെ മുഴുവൻ ആനുകൂല്യവും ഇതുവരെ ഉപഭോക്താക്കൾക്ക് ലഭിച്ചിട്ടില്ല.15 വർഷത്തിൽ കൂടുതൽ ശേഷിക്കുന്ന കാലാവധിയും 7.50 ശതമാനത്തിൽ കൂടുതൽ പലിശയും അടയ്ക്കുന്ന ഭവന വായ്പകൾ എസ്‌ബി‌ഐയിലേക്ക് മാറ്റുന്നത് നേട്ടമുണ്ടാകും. അതായത് 15 വർഷത്തെ ശേഷിക്കുന്ന കാലാവധിയും 7.50 ശതമാനം പലിശ നിരക്കും ഉള്ള 30 ലക്ഷം രൂപയുടെ ഭവന വായ്പ എസ്‌ബി‌ഐയിലേക്ക് മാറ്റുന്നതിലൂടെ 1.52 ലക്ഷം രൂപ വരെ ലാഭിക്കാം.