ഡെബിറ്റ് കാർഡ് ഉപയോ​ഗിച്ച് ഷോപ്പിം​ഗ് ചെയ്യുന്നവർക്ക് നേടാം സ്പോട്ട് ഇഎംഐ സൗകര്യം

കൊച്ചി: ഈ ഉത്സവ സീസണിൽ ഡെബിറ്റ് കാർഡ് ഉപയോഗിച്ച് ഷോപ്പിംഗ് നടത്തുന്ന മുഴുവൻ ഉപഭോക്താക്കൾക്കും സ്പോട്ട് ഇഎംഐ സൗകര്യം വാഗ്ദാനം ചെയ്ത് എസ്‌ബി‌ഐ. ഡെബിറ്റ് കാർഡ് ഉപയോഗിച്ച് ഏതെങ്കിലും പിഒഎസ് ടെർമിനലിലോ ആമസോൺ, ഫ്ലിപ്കാർട്ട് തുടങ്ങിയ ഇ-കൊമേഴ്‌സ് പോർട്ടലുകളിലോ പേയ്‌മെന്റ് നടത്തുന്നവർക്കാണ് സ്പോട്ട് ഈസി ഇഎംഐ സൗകര്യം ലഭിക്കുക.

ഡെബിറ്റ് കാർഡ് ഇ‌എം‌ഐകളെക്കുറിച്ച് കൂടുതൽ അറിയാനായി https://sbi.co.in/web / പേഴ്സണൽ-ബാങ്കിംഗ് / ഇ-കൊമേഴ്‌സ്-ലോൺ എന്ന വെബ്സൈറ്റ് ലോഗിൻ ചെയ്യാൻ എസ്ബിഐ ട്വീറ്റിലൂടെ ഉപഭോക്താക്കളോട് ആവശ്യപ്പെട്ടു. സ്പോട്ട് ഇഎംഐ സൗകര്യത്തെക്കുറിച്ച് എസ്‌ബി‌ഐയുടെ ഔദ്യോഗിക വെബ്‌സൈറ്റിൽ വിശദമായ വിവരങ്ങൾ നൽകിയിട്ടുണ്ട്. മുൻകൂട്ടി അംഗീകാരം ലഭിച്ച ഉപയോക്താക്കൾക്ക് കടകളിൽനിന്ന് പി‌ഒ‌എസിൽ സ്വൈപ്പ് ചെയ്ത് പേയ്മെന്റ് നടത്തുമ്പോൾ ഈ ഇഎംഐ സൗകര്യം ലഭിക്കും.


അതുപോലെ ഫ്ലിപ്കാർട്ട്, ആമസോൺ തുടങ്ങിയ പോർട്ടലുകളിൽനിന്ന് പർച്ചേസ് നടത്തുന്ന ഉപഭോക്താക്കൾക്ക് ഡെബിറ്റ് കാർഡ് ഉപയോഗിച്ച് പേയ്‌മെന്റ് എളുപ്പത്തിൽ ഇഎംഐകളാക്കി മാറ്റാനാകും. നവരാത്രി, ദീപാവലി തുടങ്ങിയ ആഘോഷങ്ങൾക്ക് മുന്നോടിയായാണ് എസ്ബിഐ പുതിയ സേവനം അവതരിപ്പിച്ചത്.

ഇതുകൂടാതെ റീട്ടെയിൽ ഉപഭോക്താക്കൾക്ക് സന്തോഷം പകരുകയെന്ന ലക്ഷ്യത്തോടെ കഴിഞ്ഞ ആഴ്ച എസ്‌ബി‌ഐ പ്രത്യേക ഓഫറുകൾ പ്രഖ്യാപിച്ചിരുന്നു. ഭവന, വാഹന വായ്പകള്‍ക്കുള്ള പ്രോസസ്സിങ് ഫീസ് ഇളവ് ഉള്‍പ്പെടെ ചെറുകിട ഉപഭോക്താക്കള്‍ക്കായി നിരവധി ആനുകൂല്യങ്ങളാണ് എസ്ബിഐ പ്രഖ്യാപിച്ചത്.