മുതിര്‍ന്ന പൗരന്മാര്‍ക്കായുള്ള എസ്ബിഐയുടെ സ്ഥിര നിക്ഷേപ പദ്ധതി ഇന്നുമുതൽ; പലിശനിരക്ക് അറിയാം

മുംബൈ: മുതിര്‍ന്ന പൗരന്മാര്‍ക്ക് കൂടുതൽ പലിശ ലഭ്യമാകുന്ന സ്റ്റേറ്റ് ബാങ്ക് ഓഫ് ഇന്ത്യയുടെ പ്രത്യേക സ്ഥിര നിക്ഷേപ പദ്ധതിയ്ക്ക് ഇന്ന് തുടക്കമിട്ടു. റീടെയ്ല്‍ ടേം ഡിപ്പോസിറ്റ് വിഭാഗത്തിലാണ് 'എസ്ബിഐ വികെയര്‍ ഡിപ്പോസിറ്റ്' എന്ന പുത്തൻ പദ്ധതി അവതരിപ്പിച്ചിരിക്കുന്നത്. മുതിർന്ന പൗരൻമാർക്ക് അധിക പലിശയാണ് പദ്ധതി വാഗ്‍ദാനം ചെയ്യുന്നത്. കൊറോണ വൈറസ് വ്യാപനത്തിന്റെ പശ്ചാത്തലത്തിൽ തുടര്‍ച്ചയായി പലിശ കുറയുന്ന സാഹചര്യത്തില്‍ ആദായ നഷ്ടത്തില്‍നിന്ന് മുതിര്‍ന്ന പൗരന്മാരെ സംരക്ഷിക്കുക എന്ന ലക്ഷ്യത്തോടെയാണ് പദ്ധതി ആവിഷ്‌കരിച്ചിരിക്കുന്നത്.

പദ്ധതിപ്രകാരം മുതിര്‍ന്ന പൗരന്‍മാര്‍ക്ക് ടേം ഡിപ്പോസിറ്റുകള്‍ക്ക് 30 ബേസിസ് പോയിന്റുകൾ അധിക പലിശയായി ലഭിക്കും. അഞ്ചു വർഷം വരെയാണ് പദ്ധതിയുടെ കാലാവധി. നിലവിൽ, മുഴുവൻ കാലയളവിലുമുള്ള ടേം ഡെപ്പോസിറ്റുകളിൽ മുതിർന്ന പൗരൻമാർക്ക് എസ്‌ബി‌ഐ 50 ബേസിസ് പോയിന്റ് അധിക പലിശ നൽകുന്നുണ്ട്. പുതിയ പദ്ധതി നിലവിൽ വരുന്നതോടെ അഞ്ച് വര്‍ഷവും അതില്‍ കൂടുതലും കാലാവധിയുള്ള ടേം ഡിപ്പോസിറ്റുകള്‍ക്ക് മുതിർന്ന പൗരന്മാർക്ക് 80 ബേസിസ് പോയിന്റ് അധിക പലിശയായി ലഭിക്കുന്നു.

മുതിർന്നവർക്കുള്ള സ്ഥിര നിക്ഷേപവും പലിശനിരക്കും

7 ദിവസം മുതൽ 45 ദിവസം വരെ - 3.8%

46 ദിവസം മുതൽ 179 ദിവസം വരെ - 4.8%

180 ദിവസം മുതൽ 210 ദിവസം വരെ - 5.3%

211 ദിവസം മുതൽ 1 വർഷത്തിൽ താഴെ വരെ - 5.3%

1 വർഷം മുതൽ 2 വർഷത്തിൽ താഴെ വരെ - 6%

2 വർഷം മുതൽ 3 വർഷത്തിൽ താഴെ വരെ - 6%

3 വർഷം മുതൽ 5 വർഷത്തിൽ താഴെ വരെ - 6.2%

5 വർഷ മുതൽ 10 വർഷം വരെ - 6.5%

അതേസമയം, രാജ്യത്തെ ഏറ്റവും വലിയ ബാങ്കായ എസ്ബിഐ മൂന്ന് വർഷം വരെയുള്ള റീട്ടെയിൽ ടേം ഡിപ്പോസിറ്റിന്റെ പലിശനിരക്ക് 20 ബേസിസ് പോയിന്റ് ആയി കുറച്ചു. മൂന്ന് മുതൽ 10 വർഷം വരെയുള്ള ടേം ഡിപ്പോസിറ്റിന്റെ പലിശനിരക്കിൽ മാറ്റമില്ല.

എസ്ബിഐ സ്ഥിര നിക്ഷേപവും പലിശനിരക്കും

7 ദിവസം മുതൽ 45 ദിവസം വരെ - 3.3%

46 ദിവസം മുതൽ 179 ദിവസം വരെ - 4.3%

180 ദിവസം മുതൽ 210 ദിവസം വരെ - 4.8%

211 ദിവസം മുതൽ 1 വർഷത്തിൽ താഴെ വരെ - 4.8%

1 വർഷം മുതൽ 2 വർഷത്തിൽ താഴെ വരെ - 5.5%

2 വർഷം മുതൽ 3 വർഷത്തിൽ താഴെ വരെ - 5.5%

3 വർഷം മുതൽ 5 വർഷത്തിൽ താഴെ വരെ - 5.7%

5 വർഷം മുതൽ 10 വർഷം വരെ - 5.7%