ഈ ഇടപാടുകൾ‍ക്ക് ഇനി എസ്ബിഐ നിരക്ക് ഈടാക്കും; വിശദവിവരങ്ങൾ അറിയാം

ഇന്റർ-ബാങ്ക് ഫണ്ട് ട്രാൻസ്ഫർ അനുവദിക്കുന്നതിനായി ബാങ്കുകൾ നൽകുന്ന ഒരു ജനപ്രിയ പേയ്‌മെന്റ് സേവനമാണ് ഐഎംപിഎസ്, അത് ഞായറാഴ്ചകളിലും അവധി ദിവസങ്ങളിലും ഉൾപ്പെടെ 24 X 7 ഈ സേവനങ്ങൾ ലഭ്യമാണ്.

ഐഎംപിഎസ് വഴി തികച്ചും സുരക്ഷിതമായാണ് ഫണ്ട് കൈമാറുന്നത്. മൊബൈൽ, ഇന്റർനെറ്റ് ബാങ്കിങ്, എടിഎം, എസ്എംഎസ് തുടങ്ങിയ വിവിധ വഴികളിലൂടെ ഫണ്ട് കൈമാറ്റം നടത്താൻ ഈ സംവിധാനത്തിലൂടെ സഹായിക്കും. നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യയാണ് ഈ സൗകര്യം ഏർപ്പെടുത്തിയത്.

2021 ഒക്ടോബർ മാസത്തിലാണ് ഒരു ബാങ്കിൽ നിന്നും മറ്റൊരു ബാങ്കിലേക്ക് എളുപ്പം ഫണ്ട് കൈമാറാൻ സാധിക്കുന്ന ഐഎംപിഎസ് സംവിധാനത്തിന്റെ ഇടപാട് പരിധി റിസർവ് ബാങ്ക് രണ്ടിൽ നിന്നും അഞ്ചിലേക്ക് ഉയർത്തിയിരുന്നു. രണ്ട് മുതൽ അഞ്ച് ലക്ഷം രൂപയുടെ വരെയുള്ള ഓരോ ഇടപാടുകൾക്കും 20 രൂപയും ജിഎസ്ടിയുമാണ് ഈടാക്കുന്നത്.

രണ്ട് ലക്ഷം വരെയുള്ള ഇടപാടുകൾക്ക് പഴയ ചാർജുകൾ തന്നെയാണ് ഈടാക്കുന്നത്. ഇതനുസരിച്ച് ആയിരം മുതൽ പതിനായിരം വരെയുള്ള ഫണ്ട് ട്രാൻസ്ഫറിന് രണ്ട് രൂപയും ജിഎസ്ടിയുമാണ് ഈടാക്കുന്നത്. പതിനായിരം രൂപ മുതൽ ഒരു ലക്ഷം രൂപ വരെയുള്ള ഇടപാടുകൾക്ക് നാല് രൂപയും ജിഎസ്ടിയുമാണ് ഈടാക്കുന്നത്. ഒന്ന് മുതൽ രണ്ട് ലക്ഷം വരെയുള്ള ഇടപാടുകൾക്ക് 12 രൂപയും ജിഎസ്ടിയുമാണ് ഈടാക്കുന്നത്. രണ്ട് മുതൽ അഞ്ച് ലക്ഷം വരെയുള്ള ഇടപാടുകളാണ് പുതിയ സ്ലാബിൽ വരുന്നത്. ഇത് 20 രൂപയും ജിഎസ്ടിയുമാണ് ഈടാക്കുന്നത്.