മുതിർന്ന പൗരൻമാർക്ക് ഇരട്ടി വരുമാനം; ആനുകൂല്യം ഈ മാസംകൂടി

മുതിർന്ന പൗരന്മാർക്കായി എസ്ബിഐ അവതരിപ്പിച്ച പ്രത്യേക സ്ഥിര നിക്ഷേപ പദ്ധതിയാണ് 'എസ്ബിഐ വികെയർ'. പദ്ധതി പ്രകാരം മുതിര്‍ന്ന പൗരന്മാര്‍ക്ക് നിലവിൽ ലഭിക്കുന്ന 50 ബേസിസ് പോയന്റിന് (ബിപിഎസ്) പുറമെ 30 ബിപിഎസ് അധിക പലിശ ലഭിക്കും. പൊതുജനങ്ങൾക്ക് ബാധകമായ നിരക്കിനേക്കാൾ 80 ബേസിസ് പോയിന്റ് അധിക പലിശയാണ് വികെയർ മുതിർന്ന പൗരൻമാർക്ക് വാഗ്ദാനം ചെയ്യുന്നത്.

5 വർഷം മുതൽ 10 വര്‍ഷം വരെയാണ് പദ്ധതി കാലാവധി. സാധാരണ അഞ്ച് വര്‍ഷം കാലാവധിയുള്ള സ്ഥിര നിക്ഷേപങ്ങൾക്ക് 5.4 ശതമാനം പലിശയാണ് നൽകുന്നതെങ്കില്‍ വികെയർ നിക്ഷേപങ്ങൾക്ക് 6.2 ശതമാനം പലിശയാണ് എസ്ബിഐ വാഗ്ദാനം ചെയ്യുന്നത്. മെച്യൂരിറ്റി കാലാവധിക്ക് മുമ്പ് നിക്ഷേപം പിൻവലിക്കുകയാണെങ്കിൽ 30 ബിപിഎസ് അധിക പലിശ ലഭിക്കില്ല. കൂടാതെ നിക്ഷേപത്തിന് 5.9 ശതമാനം പലിശ മാത്രമേ ലഭിക്കുകയുമുള്ളൂ.

Also Read: വീടോ സ്റ്റോക്കോ സ്വർണമോ? ഇന്ത്യയിലെ സ്ത്രീകൾക്ക് എന്തൊക്കെയാണ് വേണ്ടത്?; ഈ സർവേ പറയും ഉത്തരം

മാസത്തിൽ ഒരിക്കലോ വര്‍ഷം നാല് തവണയായിട്ടോ ആണ് പലിശ ലഭിക്കുക. 50,000 രൂപയില്‍ കൂടുതലാണ് പലിശ വരുമാനമെങ്കില്‍ ടിഡിഎസ് പിടിച്ചതിന് ശേഷമായിരിക്കും തുക അക്കൗണ്ടില്‍ ക്രെഡിറ്റ് ചെയ്യുക. അറുപത് വയസിന് മുകളിലുള്ള എന്‍ആര്‍ഐ അല്ലാത്തവര്‍ക്ക് മാത്രമാണ് പദ്ധതിയിൽ നിക്ഷേപം നടത്താനാകൂ. അടുത്തുള്ള എസ്ബിഐ ശാഖ സന്ദര്‍ശിച്ചോ യോനോ ആപ്പ് വഴിയോ നെറ്റ് ബാങ്കിങിലൂടെയോ പദ്ധതിയിൽ ചേരാം.

മുതിർന്ന പൗരന്മാർക്കായി ബാങ്ക് ഓഫ് ബറോഡയും പ്രത്യേക എഫ്ഡി പദ്ധതി ആരംഭിച്ചിട്ടുണ്ട്. 100 ബിപിഎസ് പലിശയാണ് പദ്ധതി വാഗ്ദാനം ചെയ്യുന്നത്. അഞ്ച് മുതല്‍ 10 വര്‍ഷം വരെയാണ് പദ്ധതി കാലാവധി. 6.25 ശതമാനമാണ് പലിശ.

മുതിർന്ന പൗരന്മാർക്കായി ഐസിഐസിഐ ബാങ്ക് അവതരിപ്പിച്ച പ്രത്യേക എഫ്ഡി സ്കീമാണ് ഗോള്‍ഡൻ ഇയേഴ്‌സ്. മുതിർന്ന പൗരന്മാർക്ക് പ്രതിവർഷം 6.30 ശതമാനം പലിശ നിരക്കാണ് പദ്ധതി വാഗ്ദാനം ചെയ്യുന്നത്. സാധാരണ ലഭിക്കുന്നതിനേക്കാൾ 80 ശതമാനം അധിക പലിശയാണ് പദ്ധതി വാഗ്ദാനം ചെയ്യുന്നത്. 5 വർഷം മുതൽ 10 വർഷം വരെയാണ് പദ്ധതി കാലാവധി.

മുതിർന്ന പൗരന്മാർക്കായി എച്ച്‌ഡിഎഫ്‌സി ബാങ്ക് പ്രഖ്യാപിച്ച പ്രത്യേക സ്ഥിര നിക്ഷേപ പദ്ധതിയാണ് എച്ച്‌ഡിഎഫ്‌സി സീനിയർ സിറ്റിസൺ കെയർ. പദ്ധതി പ്രകാരം മുതിര്‍ന്ന പൗരന്മാര്‍ക്ക് നിലവിൽ ലഭിക്കുന്ന 50 ബേസിസ് പോയന്റിന് (ബിപിഎസ്) പുറമെ 25 ബിപിഎസ് അധിക പലിശ ലഭിക്കും. പൊതുജനങ്ങൾക്ക് ബാധകമായ നിരക്കിനേക്കാൾ 75 ബേസിസ് പോയിന്റ് അധിക പലിശയാണ് സീനിയർ സിറ്റിസൺ കെയർ മുതിർന്ന പൗരൻമാർക്ക് വാഗ്ദാനം ചെയ്യുന്നത്.

Also Read: കൊവിഡ് വാക്സിനേഷൻ; ജീവനക്കാരുടെ മുഴുവൻ ചെലവും കമ്പനി വഹിക്കും, ഒപ്പം കുടുംബത്തിന്റെയും

5 വർഷം മുതൽ 10 വര്‍ഷം വരെയാണ് പദ്ധതി കാലാവധി. കാലാവധിയെത്തും മുമ്പ് നിക്ഷേപം പിന്‍വലിച്ചാല്‍ അധികമായി നല്‍കുന്ന 25 ബേസിസ് പോയന്റ് ലഭിക്കില്ല. 5 വർഷമോ അതിനുമുമ്പോ നിക്ഷേപം പിൻവലിക്കുകയാണെങ്കിൽ ഒരു ശതമാനം പിഴ ഈടാക്കും. 5 വർഷത്തിന് ശേഷം നിക്ഷേപം പിൻവലിക്കുകയാണെങ്കിൽ 1.25 ശതമാനം പിഴയാണ് ഈടാക്കുക.