സോവറിന്‍ ഗോള്‍ഡ്‌ ബോണ്ടിന്റെ നാലാം ഇഷ്യു തിങ്കളാഴ്ച മുതല്‍: അറിയാം ഇക്കാര്യങ്ങൾ

മുംബൈ: സർക്കാരിനുവേണ്ടി റിസർവ് ബാങ്ക് പുറത്തിറക്കുന്ന സ്വര്‍ണ നിക്ഷേപ പദ്ധതിയായ സോവറിന്‍ ഗോള്‍ഡ് ബോണ്ടിന്റെ (എസ്ജിബി) ഈ വർഷത്തെ നാലാം ഇഷ്യു ജൂലൈ 6 (തിങ്കളാഴ്ച) മുതൽ ആരംഭിക്കും. അ‍ഞ്ച് ദിവസം നടക്കുന്ന സബ്സ്‌ക്രിപ്ഷൻ ജൂലൈ 10ന് അവസാനിക്കും. ഒരു ഒരു ഗ്രാം സ്വര്‍ണത്തിന് 4,852 രൂപയാണ് വിലയിട്ടിരിക്കുന്നതെന്ന് റിസർവ് ബാങ്ക് അറിയിച്ചു.

ഒരു സാമ്പത്തിക വർഷത്തിൽ ആറുതവണയാണ് സോവറിന്‍ ഗോള്‍ഡ് ബോണ്ട് പുറത്തിറക്കുക. ഈ വര്‍ഷത്തെ സോവറിന്‍ ഗോള്‍ഡ് ബോണ്ടിന്റെ ആദ്യ ഇഷ്യു ഏപ്രില്‍ 20നും രണ്ടാം ഇഷ്യു മെയ് 11നും മൂന്നാം ഇഷ്യു ജൂൺ 8നുമായിരുന്നു ആരംഭിച്ചിരുന്നത്. മൂന്നാം ഇഷ്യുവിൽ സ്വർണ വില ഗ്രാമിന് 4,677 രൂപയായിരുന്നു.

സോവറിന്‍ ഗോള്‍ഡ് ബോണ്ട് വാങ്ങുന്നവർ അറിയേണ്ട പ്രധാനകാര്യങ്ങൾ

1. സർക്കാർ സുരക്ഷിതത്വത്തിൽ സ്വർണം വാങ്ങാനാകുന്ന പദ്ധതിയാണ് സോവറിന്‍ ഗോള്‍ഡ് ബോണ്ട്. മെച്യുരിറ്റി സമയത്ത് ബോണ്ടും അതിന്റെ പലിശയും പണമായി തിരികെ ലഭിക്കും. 2015 ഒക്ടോബറിലാണ് ആദ്യമായി എസ്ജിബി പദ്ധതി ആർബിഐ പുറത്തിറക്കിയത്. അന്ന് 9.14 ലക്ഷം യൂണിറ്റുകളിലായി നിക്ഷേപം നടത്തി 245 കോടി രൂപയുടെ വിൽപനയായിരുന്നു നടന്നിരുന്നത്.

2. എസ്ജിബി പദ്ധതിപ്രകാരം വ്യക്തികള്‍ക്ക് പരമാവധി നാലു കിലോഗ്രാം വരെയാണ് സ്വർണം വാങ്ങാനാവുക. രണ്ടര ശതമാനമാണ് നിക്ഷേപങ്ങള്‍ക്ക് ലഭിക്കുന്ന പലിശ. ഇത് ആറുമാസ ഇടവേളകളിലായി ലഭിക്കും. ബാങ്കുകള്‍,സ്റ്റോക്ക് ഹോള്‍ഡിങ് കോര്‍പറേഷന്‍, നിര്‍ദിഷ്ട പോസ്റ്റ് ഓഫിസുകള്‍, എന്‍എസ്ഇ, ബിഎസ്ഇ എന്നിവ വഴി എസ്ജിബി ബോണ്ടുകൾ വാങ്ങാനാകും. ഇവയുടെ വെബ്‌സൈറ്റുകൾ വഴിയോ ബ്രാഞ്ചുകളിൽ നിന്നോ ഏജന്റുമാരു വഴിയോ ബോണ്ടുകള്‍ ലഭ്യമാകും.

3. ഇന്ത്യയിലെ താമസക്കാരായ മുഴുവൻ ആളുകൾക്കും സോവറിൻ ഗോൾഡ് ബോണ്ട് വാങ്ങാനാകും. ഇവരെകൂടാതെ എച്ച്‍യുഎഫ്, ട്രസ്റ്റുകൾ, സർവ്വകലാശാലകൾ, ചാരിറ്റബിൾ സ്ഥാപനങ്ങൾ എന്നിവർക്കും എസ്ജിബി വാങ്ങിക്കാം. വ്യക്തികൾക്കും ഒന്നിൽ കൂടുതൽ ആളുകൾക്കും ഒരുമിച്ച് വാങ്ങാനാകും എന്നത് എസ്ജിബിയുടെ പ്രത്യേകതയാണ്. കൊവിഡിന്റെ പശ്ചാത്തലത്തിൽ ഓൺലൈൻ വഴി ബോണ്ട് വാങ്ങുന്നതാണ് മികച്ച ഓപ്ഷൻ.

4. ബോണ്ടുകളുടെ ഇഷ്യു വില പണമായി (20,000 രൂപ വരെ), ചെക്ക്, ബോണ്ടുകൾ, ഡിഡി അല്ലെങ്കിൽ ഇലക്ട്രോണിക് ട്രാൻസ്ഫർ എന്നിവ വഴി അടയ്ക്കാവുന്നതാണ്. ഓൺലൈനായി വാങ്ങുന്നവർക്ക് ഒരു ഗ്രാമിന് 50 രൂപ വരെ കിഴിവ് ലഭിക്കും. എട്ടു വര്‍ഷ കാലാവധിയുള്ള ബോണ്ടുകൾക്ക് അഞ്ചു വര്‍ഷത്തിനുശേഷം പിന്‍വലിക്കാനുള്ള സൗകര്യവുമുണ്ട്. കുറഞ്ഞത് ഒരു ഗ്രാമും അതിന്റെ ഗുണിതങ്ങളായും നിക്ഷേപിക്കാം.

5. ബാങ്കുകൾ, സ്റ്റോക്ക് ഹോൾഡിംഗ് കോർപ്പറേഷൻ ഓഫ് ഇന്ത്യ (എസ്എച്ച്സിഐഎൽ) ഓഫീസുകൾ, നിയുക്ത പോസ്റ്റ് ഓഫീസുകൾ, ഏജന്റുമാർ എന്നിവരാണ് അപേക്ഷാ ഫോം വിതരണം ചെയ്യുന്നത്. ഇതുകൂടാതെ ആർ‌ബി‌ഐയുടെ വെബ്‌സൈറ്റിൽ നിന്നും ഫോം ഡൗൺലോഡ് ചെയ്തെടുക്കാവുന്നതാണ്. ബാങ്കുകൾ ഓൺലൈൻ അപേക്ഷാ സൗകര്യവും ഒരുക്കിയിട്ടുണ്ട്.