എങ്ങനെ പദ്ധതിയില്‍ അംഗമാകാം
പി.എം. കിസാന്റെ ഔദ്യോഗിക വെബ്‌സൈറ്റ്(https://pmkisan.gov.in/) സന്ദര്‍ശിക്കുക. ഇതില്‍നിന്ന് 'ഫാര്‍മേഴസ് കോര്‍ണര്‍' തെരഞ്ഞെടുക്കുക. വരുന്ന പേജില്‍ 'ന്യൂ ഫാര്‍മര്‍ രജിസ്‌ട്രേഷന്‍' ക്ലിക്ക് ചെയ്യുക. തുറന്ന വരുന്ന ജാലകത്തില്‍ ആധാര്‍ നമ്പര്‍ നല്‍കുക. വിവരങ്ങള്‍ ഉറപ്പുവരുത്തിയ ശേഷം ക്യപ്ച നല്‍കി അടുത്ത പേജിലേക്ക് പോകാം. തുറന്നു വരുന്ന ജാലകത്തില്‍ അടിസ്ഥാന വിവരങ്ങളാണു നല്‍കേണ്ടത്. ഇതോടൊപ്പം ബാങ്ക് വിവരങ്ങളും കൃഷി സംബന്ധിച്ച് വിവരങ്ങളും നല്‍കണം. എല്ലാ വിവരങ്ങളും ഉറപ്പുവരുത്തിയശേഷം സബ്മിറ്റ് ക്ലിക്ക് ചെയ്യുക.
പി.എം. കിസാന്‍ യോജന
2018 ഡിസംബര്‍ ഒന്നിനാണ് രാജ്യത്തെ കര്‍ഷകരുടെ ഉന്നമനത്തിനായി കേന്ദ്ര സര്‍ക്കാര്‍ പദ്ധതി അവതരിപ്പിച്ചത്. 100 ശതമാനം വിഹിതവും കേന്ദ്ര സര്‍ക്കാര്‍ തന്നെയാണു നല്‍കുന്നത്. നിലവില്‍ 2000 രൂപയുടെ മൂന്നു ഗഡുക്കളായി 6000 രൂപയാണ് നല്‍കുന്നത്. ചെറുകിട കര്‍ഷകര്‍ മുതല്‍ അഞ്ച് ഏക്കര്‍ വരെ കൃഷി ഭൂമിയുള്ളവര്‍ക്ക് പദ്ധതിയില്‍ അംഗമാകാം. ഒരു കുടുംബത്തിലെ ഒരു വ്യക്തിക്കു മാത്രമേ പദ്ധതിയില്‍ അംഗമാകാനാകു. പദ്ധതി നിബന്ധകള്‍ അനുസരിച്ച് സംസ്ഥാന സര്‍ക്കാരുകളാകും ഗുണഭോക്താക്കളെ കണ്ടെത്തുക. ഫണ്ട് നേരിട്ട് ഗുണഭോക്താക്കളുടെ അക്കൗണ്ടിലെത്തും.
രണ്ടു ശതമാനം പലിശയില്‍ വായ്പ
കിസാന്‍ ക്രെഡിറ്റ് യോജനയുടെ പ്രധാന ആകര്‍ഷണമാണ് കിസാന്‍ ക്രെഡിറ്റ് കാര്‍ഡ്. ഇത്തരം ഉപയോക്താക്കള്‍ക്കു രാജ്യത്തെ വിവിധ പൊതുമേഖലാ- സ്വകാര്യമേഖലാ ബാങ്കുകള്‍ നിരവധി വായ്പകളാണ് മുന്നോട്ടുവയ്ക്കുന്നത്. എസ്.ബി.ഐ, പഞ്ചാബ് നാഷണല്‍ ബാങ്ക്, എച്ച്.ഡി.എഫ്.സി, ആക്സിസ് ബാങ്ക് എന്നിവരാണ് കിസാന്‍ ക്രെഡിറ്റ് കാര്‍ഡില്‍ വായ്പ നല്‍കുന്ന മേഖലയിലെ പ്രമുഖര്‍. ഈടില്ലാതെ മൂന്നു ലക്ഷം രൂപ വരെ വായ്പ ലഭിക്കും. മൂന്നു മുതല്‍ അഞ്ചുലക്ഷം വരെയുള്ള ഹ്രസ്വകാല വായ്പകള്‍ക്കു നാലു ശതമാനമാണ് പലിശ. കിസാന്‍ ക്രെഡിറ്റ് കാര്‍ഡുകള്‍ വഴി രണ്ടു ശതമാനം വാര്‍ഷിക പലിശയില്‍ വരെ ബാങ്കുകള്‍ വായ്പകള്‍ വാഗ്ദാനം ചെയ്യുന്നുണ്ട്. ഇവ കൂടാതെ തിരിച്ചടവുകള്‍ കൃത്യമായ കര്‍ഷകര്‍ക്ക് പലിശനിരക്കിലും ഗഡുക്കളിലും ബാങ്കുകള്‍ ഇളവുകള്‍ അനുവദിക്കും.