ഇതു കൊണ്ടൊക്കെത്തന്നെയാണ് കോവിഡ് കാലത്തെ മാന്ദ്യം പോലും വലിയ തോതിൽ കാർ വില്പനയെ ബാധിക്കാഞ്ഞത്. മാത്രമല്ല ഒരു തരത്തിൽ കോവിഡ് ഭീഷണി യൂസ്ഡ് കാർ വിപണിക്ക് അനുഗ്രഹമാവുകയാണ് ചെയ്തത്.
എന്തു കൊണ്ട് യൂസ്ഡ് കാർ ?
ഒരു യൂസ്ഡ് കാർ വാങ്ങുക എന്ന തീരുമാനം പലരും എടുക്കുന്നത് പല കാരണങ്ങളാലാവും. ഉദാഹരണത്തിന് പുതിയ ഒരു കാർ വാങ്ങാനുള്ള ഫണ്ട് കയ്യിൽ ഇല്ലാത്തവർ സെക്കൻഡ് ഹാൻഡ് കാറുകൾ സ്വന്തമാക്കാനാണ് നോക്കുന്നത്. ഭാവിയിൽ ഇ-കാറുകൾ നിരത്തു വാഴുമെന്ന് വിശ്വസിക്കുന്നവരുണ്ട്. അതിനാൽ പുതിയ കാർ പിന്നെ നോക്കാം, തൽക്കാലം ഒരു സെക്കന‍്ഡ്ഹാൻഡ് കാർ മതി എന്നു വെക്കുന്നവരുണ്ട്. ഡ്രൈവിങ് പഠിക്കുക എന്ന ഉദ്ദേശത്തിൽ ചെറിയ യൂസ്ഡ് കാറുകൾ വാങ്ങുന്നവരുമുണ്ട്. കോവിഡ് പോലെയുള്ള പകർച്ച വ്യാധികളുടെ ഗുരുതര സ്വഭാവം മനസ്സിലാക്കി സുരക്ഷിതമായി യാത്ര ചെയ്യാം എന്നു കരുതി യൂസ്ഡ് കാർ പെട്ടെന്നു വാങ്ങുന്ന ആളുകളുണ്ട്.
വിലക്കുറവ് മാത്രം പരിഗണിച്ചു വാങ്ങുന്നവരും, വാങ്ങി മറിച്ചു വിറ്റ് ബിസിനസ് നടത്തുന്നവരുമെല്ലാം ഒരു സെക്കൻഡ് ഹാൻഡ് കാറിന്റെ ഉപഭോക്താക്കളുടെ ഗണത്തിൽ വരും. പുതിയ കാറുകളുമായി താരതമ്യം ചെയ്യുമ്പോൾ കുറഞ്ഞ വിലയാണെന്നത് ആദ്യമായി കാർ വാങ്ങുന്ന ഭൂരിഭാഗത്തെയും യൂസ്ഡ് കാറുകളിലേക്ക് നോട്ടമിടാൻ പ്രേരിപ്പിക്കാറുണ്ട്.
എന്നാൽ ഇക്കാര്യത്തിൽ എടുത്തു ചാടുന്നത് ഭാവിയിൽ സാമ്പത്തിക നഷ്ടത്തിൽ കൊണ്ടു ചെന്നെത്തിക്കും. ഒരു യൂസ്ഡ് കാറിന് ഇന്ന് വായ്പ ലഭിക്കാൻ പ്രയാസമൊന്നുമില്ല. ഒരു സെക്കൻഡ് ഹാൻഡ് കാർ വാങ്ങുമ്പോൾ ശ്രദ്ധിക്കേണ്ട വിവരങ്ങൾ വിശദമായി പരിശോധിക്കുകയാണിവിടെ.
യൂസ്ഡ് കാർ ലോൺ
ആദ്യമായി ഒരു കാർ വാങ്ങുന്ന വ്യക്തിയെ സംബന്ധിച്ച് അത് ചിലവേറിയ ഒരു തീരുമാനമാണ്. വണ്ടിയുടെ മെയിന്റനൻസിനും, ഇൻഷുറൻസിനും വലിയ തോതിൽ പണച്ചിലവുണ്ട്. എന്നാൽ ഒരു യൂസ്ഡ് കാർ വളരെ ആകർഷകമായ വിലയിൽ ലഭിക്കുന്നു. സമയം കടന്നു പോയി മൂല്യത്തിൽ തേയ്മാനം കണക്കു കൂട്ടുന്നതിനാൽ ഇൻഷുറൻസ് പ്രീമയവും താരതമ്യേന കുറവായിരിക്കും.
സാമ്പത്തികത്തിൽ വലിയ സമ്മർദ്ദം ചെലുത്താതെ ഒരു യൂസ്ഡ് കാർ ലോൺ ഇന്ന് ലഭിക്കും. ഇത്തരം വായ്പകൾ ലഭിക്കാനുള്ള കുറഞ്ഞ പ്രായപരിധി 21 വയസ്സും, കൂടിയ പ്രായപരിധി 65 വയസ്സുമാണ്.
വായ്പാ കാലാവധി
ഭൂരിഭാഗം യൂസ്ഡ് കാർ വായ്പകളിലും പരമാവധി തിരിച്ചടവ് കാലാവധി ഒരു വർഷം മുതൽ അഞ്ചു വർഷം വരെയാണ്. ചില കേസുകളിൽ ബാങ്കുകൾ ഏഴു വർഷം വരെയുള്ള തിരിച്ചടവ് അനുവദിക്കാറുണ്ട്. വായ്പ എടുക്കുന്ന വ്യക്തിയുടെ മാസ-വാർഷിക വരുമാനം, ക്രെഡിറ്റ് സ്കോർ, ലോൺ ടു വാല്യു (എൽടിവി) മുതലായ തിരിച്ചടവു കപ്പാസിറ്റി വിലയിരുത്തിയാണ് വായ്പ അനുവദിക്കുക.
മറ്റ് ഫണ്ടിങ് മാർഗങ്ങൾ
സ്വന്തം കയ്യിലെ പണവും, യൂസ്ഡ് കാർ ലോണുമല്ലാതെ മറ്റു ചില ഫണ്ടിങ് മാർഗങ്ങളും ആലോചിക്കാവുന്നതാണ്. സെക്വേർഡ്-അൺ സെക്വേർഡ് വായ്പകൾ ഒരു യൂസ്ഡ് കാറിനു വേണ്ടി എടുക്കാം. അതായത് വ്യക്തിഗതവായ്പ, ഗോൾഡ് ലോൺ, സ്ഥിരനിക്ഷേപത്തിലെ പണമോ, അതിലെ വായ്പയോ ഇതിനായി ഉപയോഗിക്കാവുന്നതേയുള്ളൂ.
എന്നാൽ ഇവിടെ ശ്രദ്ധിക്കേണ്ട കാര്യം പലിശനിരക്ക് എവിടെയാണ് കുറവ് എന്നുള്ളത് പരിശോധിക്കണമെന്നുള്ളതാണ്. സാധാരണ ഗതിയിൽ യൂസ്ഡ് കാർ വായ്പയുടെ പലിശ നിരക്ക് വ്യക്തിഗത വായ്പയേക്കാളും, ഗോൾഡ് ലോൺ വായ്പയേക്കാളും കുറവായിരിക്കും. എന്നാൽ കെഎസ്എഫ്ഇ പോലെയുള്ള സർക്കാർ സ്ഥാപനങ്ങളിൽ മാസത്തവണ ഇഎംഐ ആയി ലഭ്യമാവുന്ന ഗോൾഡ് ലോണുകൾക്ക് പൊതുവെ പലിശ കുറവാണ്. പൊതു മേഖലാ ബാങ്കുകളിലും സ്വർണ്ണവായ്പയ്ക്ക് പലിശനിരക്ക് കുറവായിരിക്കും ഇവയും പരിഗണിക്കാവുന്നതാണ്.
ഉപഭോക്താക്കൾക്കുള്ള ചില ടിപ്സ്
ഒരു യൂസ്ഡ് കാർ വാങ്ങാനുള്ള വായ്പയ്ക്ക് അപേക്ഷിക്കുമ്പോൾ പരിഗണിക്കുന്ന പ്രധാന ഘടകമാണ് ലോൺ ടു വാല്യു (എൽടിവി). ഇതിന് വായ്പ നൽകുന്ന സ്ഥാപനങ്ങൾക്കനുസരിച്ച് മാറ്റം വരാം. കൂടാതെ യൂസ്ഡ് കാറിന്റെ വിലയിരുത്തിയ മൂല്യത്തിന്റെ 50% മുതൽ 90% വരെ ഇത് വ്യത്യാസപ്പെടാം.
നിങ്ങൾ ഒരു ബാങ്കിന്റെ പ്രീ ഓൺഡ് കാർ ഡീലറിൽ നിന്നാണ് വായ്പ എടുക്കുന്നതെങ്കിൽ മെച്ചപ്പെട്ട എൽടിവി അനുപാതവും, കുറഞ്ഞ പലിശയും അനുവദിച്ചു കിട്ടാൻ സാധ്യതയുണ്ട്.
കാറിന്റെ ഫിസിക്കൽ കണ്ടീഷൻ ഒരു മെക്കാനിക്കിനെ കൊണ്ട് വിശദമായി പരിശോധിപ്പിക്കാൻ മറക്കരുത്. വാഹനത്തിന്റെ സർവീസ് ഹിസ്റ്ററിയും പരിഗണിക്കാം. . വാഹനത്തിന്റെ മോഡൽ നിർത്തിയതാണോ ? സ്പെയർ പാർട്സുകൾ ലഭ്യമാണോ ? നിങ്ങൾ എത്രാമത്തെ ഉടമയാണ് ? ആക്സിഡന്റിൽ പെട്ട വണ്ടിയാണോ ? വെള്ളത്തിൽ മുങ്ങിയ വാഹനമാണോ ? നിങ്ങൾ ഇനി ഇത് വിൽക്കുകയാണെങ്കിൽ റീ സെയിൽ വാല്യു എത്രയുണ്ടാവും? എന്നെല്ലാം പരിശോധിച്ചിരിക്കണം. കേന്ദ്രസർക്കാരിന്റെ സ്ക്രാപ്പേജ് പോളിസി നിലവിലുണ്ടെന്നതും ഇനി എത്ര നാൾ ആർസി റിന്യൂ ചെയ്യാതെ വാഹനം ഓടിക്കാം എന്നതും ചെക്ക് ചെയ്യാം
ഇതിനെല്ലാമുപരി നിങ്ങൾക്ക് ഒരു സെക്കൻഡ് കാർ വാങ്ങുന്നത് ആവശ്യത്തിനാണോ അതോ മറ്റുള്ളവരെ ഇംപ്രസ് ചെയ്യിക്കാനാണോ എന്ന ചോദ്യവും സ്വയം ചോദിക്കണം. ആവശ്യത്തിനാണ് നിങ്ങൾ മുൻഗണന നൽകുന്നതെങ്കിൽ അത് യുക്തിക്ക് നിരക്കുന്ന തീരുമാനമായിരിക്കാൻ സാധ്യത കൂടുതലാണ്.