ക്രൂഡ് ഓയിൽ വിലയിൽ വർധനവ്

ആഗോളവിപണിയിൽ അസംസ്കൃത എണ്ണയുടെ വിലയിൽ വർധന. കഴിഞ്ഞ ദിവസങ്ങളിൽ നേരിയ തോതിൽ വില താഴ്ന്നു നിന്നിരുന്നു. ഇന്നലെയും ഇന്നുമായി നടക്കുന്ന ഫെഡ് യോഗം വിപണികൾക്ക് നിർണായകമാണ്. ഉയരുന്ന പണപ്പെരുപ്പവും, ചില്ലറ- മൊത്ത വിലക്കയറ്റ നിരക്കും നിക്ഷേപകർക്ക് ആശങ്ക നൽകുന്ന ദിനങ്ങളിലൂടെയാണ് ഇപ്പോൾ വിപണി കടന്നു പോയിക്കൊണ്ടിരിക്കുന്നത്.

അന്താരാഷ്ട്രവിപണിയിൽ ഇതര മേഖലകളെ അപേക്ഷിച്ച് കൂടുതൽ വാല്യുവേഷനാണ് ഊർജ്ജമേഖലയ്ക്കുള്ളത്. കഴിഞ്ഞ ഏപ്രിലിൽ യൂറോപ്പ് റെക്കോർഡ് തോതിലുള്ള എൽഎൻജി ഇറക്കുമതി നടത്തിയതായി റിപ്പോർട്ടുകൾ പുറത്തു വന്നിരുന്നു. പൈപ്പ് ലൈനുകളിലൂടെയുള്ള ഗ്യാസ് വിതരണം യൂറോപ്പിന്റെ ആവശ്യങ്ങളെ തൃപ്തിപ്പെടുത്താൻ പര്യാപ്തമായിരുന്നില്ല.

റഷ്യൻ അധിനിവേശം പ്രകൃതിവാതകത്തിന്റെ അന്താരാഷ്ട്ര വ്യാപാരത്തെ മാറ്റി മറിച്ചു കഴിഞ്ഞു. അമേരിക്കൻ ദ്രവ പ്രകൃതിവാതക കയറ്റുമതി ദീർഘകാലാടിസ്ഥാനത്തിൽ വർധിക്കുമെന്നാണ് വിലയിരുത്തൽ. യൂറോപ്യൻ വിപണികൾ റഷ്യൻ പ്രകൃതിവാതകത്തിനു പകരം കണ്ടെത്താനുള്ള തിരക്കിട്ട ശ്രമത്തിലാണ്. ഇത് അമേരിക്കൻ കമ്പനികൾക്ക് വലിയ അവസരം തുറന്നു നൽകുന്നു.

വേനൽക്കാല സീസണ് മുന്നോടിയായി അമേരിക്കയിൽ ജെറ്റ് ഇന്ധനങ്ങൾ അടക്കമുള്ളവയുടെ വില വർധിക്കുന്നുമുണ്ട്. ഗ്യാസൊലിൻ ഇന്ധനങ്ങളുടെയടക്കം വില കുറയ്ക്കാനുള്ള സത്വര നടപടികൾ അമേരിക്ക തുടരുകയാണ്. ഇതിന്റെ ഭാഗമായി എണ്ണ ശുദ്ധീകരണശാലകളുടെ ഉല്പാദനക്ഷമത കൂട്ടാൻ പ്രസി‍‍ഡന്റ് ജോ ബൈഡൻ ആലോചിക്കുന്നതായുള്ള റിപ്പോർട്ടുകൾ കഴിഞ്ഞ ദിവസം പുറത്തുവന്നിരുന്നു. നിലവിൽ 94.2 ശതമാനമാണ് യുഎസ് എണ്ണ ശുദ്ധീകരണശാലകളുടെ പരമാവധി ഉല്പാദന ശേഷി. ഒരു ദിവസം 10 മില്യൺ ബാരൽ‍ ഗ്യാസൊലിനാണ് ഉല്പാദിപ്പിക്കുന്നത്. ഉല്പാദനശേഷി വർധിപ്പിക്കുക എന്നത് ദീർഘകാലം കൊണ്ട് നേടിയെടുക്കേണ്ട സങ്കീർണമായ പ്രക്രിയയാണ്. വൻതോതിലുള്ള മൂലധനനിക്ഷേപവും ഇതിനാവശ്യമാണ്. 1970 ന് ശേഷം അമേരിക്കയിൽ പുതിയ ഒരു എണ്ണശുദ്ധീകരണശാല പോലും സ്ഥാപിച്ചിട്ടില്ല.

ഇതിനിടെ ഇറാനിൽ നിന്നുള്ള കൂടുതൽ ക്രൂഡ് ഓയിൽ അന്താരാഷ്ട്ര വിപണിയിലേക്കെത്താനൊരുങ്ങുന്നു. ഇത് ഇപ്പോഴത്തെ പ്രതിസന്ധിക്ക് ഒരു പരിധി വരെ പരിഹാരമുണ്ടാക്കുമെന്നാണ് കരുതുന്നത്. സാമ്പത്തിക കാരണങ്ങളാൽ അഞ്ചു വർഷം മുമ്പ് അടച്ചുപൂട്ടിയ ബ്രിട്ടനിലെ ഏറ്റവും വലിയ നാചുറൽ ഗ്യാസ് സ്റ്റോറേജ് സൈറ്റ് വീണ്ടും തുറക്കാനുള്ള ശ്രമങ്ങളും പുരോഗമിക്കുന്നു.

ക്രൂഡ് ഓയിൽ വില
രാജ്യാന്തര വിപണിയിൽ ക്രൂഡ് ഓയിൽ വിലയിൽ വർധന. ബാരലിന് 121.5 ഡോളറിലാണ് വ്യാപാരം നടക്കുന്നത്. ഡോളറിനെതിരേ രൂപയുടെ മൂല്യത്തിൽ ഇന്നലെ കനത്ത ഇടിവാണ് സംഭവിച്ചത്. മൂല്യം ഏതാനും നാളുകളായി സ്ഥിരമായി 77 ന് മുകളിൽ തുടരുന്നത് സമ്മർദം വർധിപ്പിക്കുന്നുണ്ട്. നിലവിൽ രൂപയുടെ മൂല്യം ഡോളറിനെതിരേ 78 ആണ്.

കുതിച്ചുയരുന്ന പണപ്പെരുപ്പം നേരിടുന്നതിനായി കഴിഞ്ഞ മാസം 21നാണ് കേന്ദ്ര ധനമന്ത്രി നിർമലാ സീതാരാമൻ ഇളവുകൾ പ്രഖ്യാപിച്ചത്. എക്സൈസ് തീരുവയിലെ ഇടപെടലോടെ പെട്രോൾ ലിറ്ററിന് എട്ട് രൂപയും, ഡീസൽ ലിറ്ററിന് ആറ് രൂപയും കുറച്ചത്. ഇതോടെ പെട്രോൾ ലിറ്ററിന് 9.50 രൂപയും, ഡീസൽ ലിറ്ററിന് ഏഴു രൂപയും വില കുറയുമെന്നായിരുന്നു വിലയിരുത്തൽ. എന്നാൽ കേന്ദ്രത്തിനു പിന്നാലെ സംസ്ഥാന സർക്കാരും നികുതി കുറച്ചു. പെട്രോൾ നികുതി 2.41 രൂപയും, ഡീസലിന് 1.36 രൂപയുമാണ് കുറച്ചത്. ഇതോടെ ഫലത്തിൽ സംസ്ഥാനത്ത് പെട്രോൾ ലിറ്ററിന് 10.52 രൂപയും, ഡീസൽ ലിറ്ററിന് 7.40 രൂപയും കുറഞ്ഞു.

പ്രധാന നഗരങ്ങളിലെ ഇന്ധന വില
ന്യൂഡൽഹിയിൽ ഒരു ലിറ്റർ പെട്രോളിന് 95.91 രൂപയാണ് പുതുക്കിയ വില. ഡീസൽ ലിറ്ററിന് 89.47 രൂപയും. മുംബൈയിൽ ഒരു ലിറ്റർ പെട്രോളിന് 111.01 രൂപയും ഡീസൽ ലിറ്ററിന് 97.77 രൂപയുമാണ്. തിരുവനന്തപുരത്ത് ഒരു ലിറ്റർ പെട്രോളിന് 106.74 രൂപയും ഡീസൽ ലിറ്ററിന് 96.58 രൂപയുമാണ് വില. കൊച്ചിയിൽ പെട്രോൾ ലിറ്ററിന് 104.62 രൂപയാണ് വില. ഡീസൽ ലിറ്ററിന് 92.63 രൂപയാണ് വില. കോഴിക്കോട് ഒരു ലിറ്റർ പെട്രോളിന് ഇന്ന് 104.92 രൂപയും ഡീസലിന് 94.89 രൂപയുമാണ് വില.