പെട്രോൾ, ഡീസൽ വില വീണ്ടും കൂട്ടി; വർധനവ് തുടർച്ചയായ പതിനൊന്നാം ദിനം

കൊച്ചി: സംസ്ഥാനത്ത് വീണ്ടും ഇന്ധനവിലയിൽ വര്‍ധനവ്. തുടര്‍ച്ചയായ 11ാം ദിനമാണ് ഇന്ധന വിലയില്‍ വർധനവ് രേഖപ്പെടുത്തുന്നത്. പത്ത് ദിവസത്തിനുള്ളില്‍ പെട്രോളിന് 5 രൂപ 48 പൈസയാണ് കൂട്ടിയത്. ഡീസലിന് വർധിച്ചത് 5 രൂപ 51 പൈസയാണ്. ഇന്നലത്തെ വിലയിൽ നിന്നും 52 പൈസ വര്‍ധിച്ച് 74.75 രൂപയ്ക്കാണ് ഇന്ന് സംസ്ഥാനത്ത് പെട്രോള്‍ വിൽപന നടക്കുന്നത്. ഡീസലിന് 57 പൈസ വർധിച്ച് 73.09 രൂപയാണ് ഇന്നത്തെ വില.

കൊച്ചിയിൽ ലിറ്ററിന് ഇന്ന് 77.63 രൂപയാണ് പെട്രോള്‍ വില. ഡീസലിന് 71.83 രൂപയ്ക്ക് വിൽപന നടക്കുന്നു. തലസ്ഥാന നഗരമായ തിരുവനന്തപുരത്ത് ഒരു ലിറ്റര്‍ പെട്രോളിന് 79.01 രൂപയാണ് ഇന്നത്തെ വില. ഡീസലിന് റീടെയിൽ നിരക്ക് 73.23 രൂപ. കോഴിക്കോട് നഗരത്തിൽ ഇന്ന് പെട്രോള്‍ ലിറ്ററിന് 77.97 രൂപയ്ക്കും ഡീസൽ ലിറ്ററിന് 72.176 രൂപയ്ക്കും വിൽപ്പന നടക്കുന്നു.

Also Read: ചൈനയുമായുണ്ടായ സംഘര്‍ഷം: 20 ഇന്ത്യന്‍ സൈനികര്‍ കൊല്ലപ്പെട്ടതായി വിവരം

രാജ്യതലസ്ഥാനമായ ന്യൂഡൽഹിയിൽ ഇന്ന് 77.28 രൂപയാണ് ഒരു ലിറ്റര്‍ പെട്രോളിന്‍റെ വില. ഡീസലിന് 75.79 രൂപയാണ് ഇന്നത്തെ വില. മുംബൈയിൽ പെട്രോള്‍ ലിറ്ററിന് 84.15 രൂപയ്ക്കും ഡീസൽ ലിറ്ററിന് 74.31 രൂപയ്ക്കും വിൽപ്പന നടക്കുന്നു.

ലോക്ക്ഡൗൺ കാലം ആരംഭിച്ച് 83 ദിവസത്തോളം ഇന്ധനവിലയിൽ മാറ്റമുണ്ടായിരുന്നില്ല എന്നാൽ വിലവർധനവ് നടപ്പിൽ വന്നതിനുശേഷം തുടർച്ചയായ പത്ത് ദിനങ്ങളിലും വർധനവ് രേഖപ്പെടുത്തുകയായിരുന്നു. മുൻപ് ചില സംസ്ഥാനങ്ങള്‍ വാറ്റ് വര്‍ധിപ്പിച്ചത് വില വര്‍ധനവിന് ഇടയാക്കിയിരുന്നു. കൊവിഡ്-19 പ്രതിസന്ധി മൂലം ക്രൂഡ് ഓയിൽ വില കുത്തനെ ഇടിഞ്ഞെങ്കിലും കേന്ദ്ര സര്‍ക്കാര്‍ ആനുപാതികമായി എക്സൈസ് തീരുവ വര്‍ധിപ്പിച്ചതിനാൽ ഇത് റീടെയിൽ വിലയിൽ പ്രതിഫലിച്ചിരുന്നില്ല.

ഇന്നത്തെ ഇന്ധനവില അറിയാം



ആഗോള വിപണിയിലെ ക്രൂഡ് ഓയിൽ വിലയും ഡോളര്‍ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിര്‍ണയിക്കുന്നത്. ഇന്ന് ഒരു ബാരൽ അസംസ്കൃത എണ്ണയ്ക്ക് (ക്രൂഡ് ഓയിൽ) 40.24 ഡോളറാണ് വില. അതേസമയം ഇന്ന് ഡോളര്‍ 76.32 രൂപയിലാണ് വിനിമയം നടക്കുന്നത്.