ഡീസൽ വിലയിൽ വീണ്ടും വർധന; രണ്ടുദിവസംകൊണ്ട് കൂടിയത് 31 പൈസ, പെട്രോൾ വിലയിൽ മാറ്റമില്ല

കൊച്ചി: രാജ്യത്ത് ഡീസൽ വില വീണ്ടും ഉയർന്നു. വിവിധ മെട്രോ നഗരങ്ങളിൽ 15 മുതൽ 17 പൈസ വരെയാണ് ഡീസൽ വില കൂടിയത്. കേരളത്തിൽ ഇന്ന് 15 പൈസ വർധിച്ച് ഡീസലിന് 78.57 രൂപയാണ് വില. ഇന്നലെ ഡീസലിന് 16 പൈസ ഉയർന്നിരുന്നു. കഴിഞ്ഞ ഒരാഴ്ചക്കിടെ നാലാമത്തെ തവണയാണ് ഡീസൽ വില ഉയരുന്നത്. സംസ്ഥാനത്ത് ഏഴ് ദിവസംകൊണ്ട് 55 പൈസയുടെ വർധനയാണ് ഡീസൽ വിലയിൽ രേഖപ്പെടുത്തിയത്. അതേസമയം തുടർച്ചയായ 20-ാം ദിവസവും പെട്രോൾ വിലയിൽ മാറ്റമില്ല. പെട്രോളിന് ഇന്ന് 82.15 രൂപയാണ് വില.

തിരുവനന്തപുരത്ത് ഇന്ന് ഒരു ലിറ്റർ ഡീസലിന് 78.57 രൂപയും പെട്രോളിന് 82.15 രൂപയുമാണ് വില. കൊച്ചിയിൽ ഒരുലിറ്റർ ഡീസലിന് 76.87 രൂപയാണ് വില. പെട്രോളിന് 80.37 രൂപയും. കോഴിക്കോട് ഡീസൽ ലിറ്ററിന് 77.19 രൂപയും പെട്രോളിന് 80.71 രൂപയുമാണ് വില.

ഡല്‍ഹിയില്‍ ഡീസലിന് 17 പൈസയാണ് ഉയർന്നത്. ഇതോടെ പെട്രോൾ വിലയും കടന്ന് രാജ്യതലസ്ഥാനത്ത് ഡീസൽ വില കുതിക്കുകയാണ്. 81.52 രൂപയാണ് ഡൽഹിയിൽ ഒരു ലിറ്റർ ഡീലസിന് വില. പെട്രോളിന് 80.43 രൂപയും. മുംബൈയിൽ 15 പൈസ ഉയർന്ന് ഒരു ലിറ്റർ ഡീസലിന് 79.71 രൂപയാണ് വില. പെട്രോളിന് വില 87.19 രൂപയും.

Also Read: കുതിച്ചുയർന്ന് ഡീസൽ വില, തുടർച്ചയായ 19-ാം ദിവസവും പെട്രോൾ വിലയിൽ മാറ്റമില്ല


ആഗോള വിപണിയിലെ ക്രൂഡ് ഓയിൽ വിലയും ഡോളർ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിർണയിക്കുന്നത്. രാജ്യാന്തര വിപണിയിൽ ക്രൂഡ് ഓയിൽ വില കുത്തനെ കുറയുകയും ഡോളർ വിനിമയ നിരക്ക് ഉയരുകയും ചെയ്തു. ഒരു ബാരൽ അസംസ്‌കൃത എണ്ണയ്ക്ക് (ക്രൂഡ് ഓയിൽ) ഇന്ന് 43.10 ഡോളറാണ് വില. ഇന്നലെ 43.39 ഡോളറിലായിരുന്നു വ്യാപാരം. അതേസമയം 74.93 രൂപയിലാണ് ഡോളർ വിനിമയം നടക്കുന്നത്. ഇന്നലെ 75.22 രൂപയിലായിരുന്നു ഡോളർ വിനിമയം നടന്നത്.