പെട്രോൾ, ഡീസൽ വിലയിൽ മാറ്റമില്ല

കൊച്ചി: രാജ്യത്ത് പെട്രോൾ, ഡീസൽ വിലയിൽ മാറ്റമില്ല. കേരളത്തിൽ ഇന്ന് ഒരു ലിറ്റർ പെട്രോളിന് 82.15 രൂപയും ഡീസലിന് 77.70 രൂപയുമാണ് വില. തുടർച്ചയായ നാലാംദിവസമാണ് ഇന്ധന വില മാറ്റമില്ലാതെ തുടരുന്നത്.

തിരുവനന്തപുരത്ത് ഒരു ലിറ്റർ പെട്രോളിന് 82.15 രൂപയും ഡീസലിന് 77.70 രൂപയുമാണ് വില. കൊച്ചിയിൽ 80.37 രൂപയാണ് ഒരുലിറ്റര്‍ പെട്രോളിന്റെ വില. ഡീസലിന് 75.98 രൂപയും. കോഴിക്കോട് പെട്രോൾ ലിറ്ററിന് 80.71 രൂപയും ഡീസലിന് 76.34 രൂപയമാണ് ഇന്നത്തെ വില.

ഡൽഹിയിൽ ഇന്ന് 80.43 രൂപയാണ് ഒരു ലിറ്റർ പെട്രോളിന്റെ വില. ഡീസലിന് ലിറ്ററിന് 80.53 രൂപയും. മെട്രോ നഗരമായ മുംബൈയിൽ പെട്രോള്‍ ലിറ്ററിന് 87.19 രൂപയും ഡീസൽ ലിറ്ററിന് 78.83 രൂപയുമാണ് വില.

കൊവിഡ് പ്രതിസന്ധി തുടങ്ങിയതിന് ശേഷം മാറ്റമുണ്ടാകാതിരുന്ന ഇന്ധന വില ജൂണ്‍ ഏഴ് മുതൽ കൂടിയിരുന്നു. കേന്ദ്ര-സംസ്ഥാന സര്‍ക്കാരുകള്‍ നികുതി നിരക്ക് വര്‍ധിപ്പിച്ചതും രാജ്യത്തെ പെട്രോളിയം കമ്പനികള്‍ നഷ്‍ടം നികത്താന്‍ നിരക്ക് വര്‍ധിപ്പിക്കുന്നതുമാണ് വില വര്‍ധനയ്ക്കുള്ള കാരണം. അതേസമയം, രാജ്യത്തെ പെട്രോള്‍, ഡീസല്‍ ഉപഭോഗത്തില്‍ മെയ് മാസത്തെ അപേക്ഷിച്ച് 16 ശതമാനം വര്‍ധനയാണ് രേഖപ്പെടുത്തിയിരിക്കുന്നത്. ലോക്ക് ഡൗണില്‍ ഇളവ് നല്‍കിയതോടെ സ്വകാര്യ വാഹനങ്ങള്‍ വന്‍തോതില്‍ നിരത്തിലിറങ്ങിയതാണ് ഉപഭോഗം വര്‍ധിക്കാൻ കാരണമായത്.

Also Read: തുടർച്ചയായ നാലാംദിവസവും പെട്രോൾ, ഡീസൽ വിലയിൽ മാറ്റമില്ല

എന്നാൽ കഴിഞ്ഞവര്‍ഷം ഇതേകാലയളവിലെ ഉപഭോഗവുമായി താരതമ്യം ചെയ്യുമ്പോള്‍ 14 ശതമാനം കുറവാണിത്. മെയ് മാസത്തെ അപേക്ഷിച്ച് ജൂണില്‍ ഡീസല്‍ ഉപഭോഗത്തില്‍ 20 ശതമാനം വര്‍ധനയും പെട്രോളിന് 36 ശതമാനം വര്‍ധനയുമാണു് ഉണ്ടായിരിക്കുന്നത്.


ആഗോള വിപണിയിലെ ക്രൂഡ് ഓയിൽ വിലയും ഡോളര്‍ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിര്‍ണയിക്കുന്നത്. ക്രൂഡ് ഓയിൽ വില ദിനംപ്രതി കൂടിക്കൊണ്ടിരിക്കുമ്പോൾ ഡോളർ വിനിമയ നിരക്ക് കുത്തനെ ഇടിയുകയാണ്. ഇന്ന് ഒരു ബാരൽ അസംസ്കൃത എണ്ണയ്ക്ക് (ക്രൂഡ് ഓയിൽ) 42.89 ഡോളറാണ് വില. ഇന്നലെ 41.95 ഡോളറിലായിരുന്നു വിൽപന നടന്നിരുന്നത്. 74.75 രൂപയിലാണ് ഡോളര്‍ വിനിമയം നടക്കുന്നത്. ഇന്നലെ 75.47 രൂപയായിരുന്നു ഡോളര്‍ വിനിമയം നിരക്ക്.