പെട്രോൾ വിലയില്‍ മാറ്റമില്ല, ഡീസലിന് 22 പൈസ വർധിച്ചു

കൊച്ചി: രാജ്യത്ത് ഡീസൽ വിലയിൽ വർധന. തുടർച്ചയായ എട്ട് ദിവസം മാറ്റമില്ലാതെ തുടരുകയായിരുന്ന ഡീസലിന് കേരളത്തിൽ 22 പൈസ വർധിച്ച് ഇന്ന് 77.92 രൂപയാണ് വില. അതേസമയം പെട്രോൾ വിലയിൽ മാറ്റമില്ല. സംസ്ഥാനത്ത് 82.15 രൂപയാണ് ഒരു ലിറ്റർ പെട്രോളിന്റെ വില.

തിരുവനന്തപുരത്ത് ഒരു ലിറ്റര്‍ പെട്രോളിന് 82.15 രൂപയും ഡീസലിന് 77.92 രൂപയുമാണ് വില. കൊച്ചിയില്‍ 80.37 രൂപയാണ് ഒരുലിറ്റര്‍ പെട്രോളിന്റെ വില. ഡീസലിന് 76.19 രൂപയും. കോഴിക്കോട് പെട്രോള്‍ ലിറ്ററിന് 80.71 രൂപയും ഡീസലിന് 76.55 രൂപയുമാണ് ഇന്നത്തെ വില.

ഡല്‍ഹിയില്‍ ഇന്ന് 80.43 രൂപയാണ് ഒരു ലിറ്റര്‍ പെട്രോളിന്റെ വില. ഡീസലിന് ലിറ്ററിന് 25 പൈസ വർധിച്ച് 80.78 രൂപയും. രാജ്യതലസ്ഥാനച്ച് പെട്രോളിനെ മറികടന്ന് ഡീസൽ വില ഉയരുകയാണ്. മെട്രോ നഗരമായ മുംബൈയില്‍ പെട്രോള്‍ ലിറ്ററിന് 87.19 രൂപയും ഡീസല്‍ ലിറ്ററിന് 22 പൈസ കൂടി 79.05 രൂപയുമാണ് വില.

Also Read: തുടര്‍ച്ചയായ എട്ടാം ദിവസവും ഇന്ധനവിലയില്‍ മാറ്റമില്ല; നിരക്കുകള്‍ ഇങ്ങനെ

കൊവിഡ് പ്രതിസന്ധി തുടങ്ങിയതിന് ശേഷം മാറ്റമുണ്ടാകാതിരുന്ന ഇന്ധന വില ജൂണ്‍ ഏഴ് മുതല്‍ കൂടിയിരുന്നു. പെട്രോളിന് 9.17 രൂപയും ഡീസലിന് 11.14 രൂപയുമാണ് കൂടിയത്. കേന്ദ്ര-സംസ്ഥാന സര്‍ക്കാരുകള്‍ നികുതി നിരക്ക് വര്‍ധിപ്പിച്ചതും രാജ്യത്തെ പെട്രോളിയം കമ്പനികള്‍ നഷ്ടം നികത്താന്‍ നിരക്ക് വര്‍ധിപ്പിക്കുന്നതുമാണ് വില വര്‍ധനയ്ക്കുള്ള കാരണം.


ആഗോള വിപണിയിലെ ക്രൂഡ് ഓയില്‍ വിലയും ഡോളര്‍ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിര്‍ണയിക്കുന്നത്. രാജ്യാന്തര വിപണിയില്‍ ക്രൂഡ് ഓയില്‍ വില കുറയുകയും ഡോളര്‍ വിനിമയ നിരക്ക് ഉയരുകയും ചെയ്തു. ഇന്ന് ഒരു ബാരല്‍ അസംസ്‌കൃത എണ്ണയ്ക്ക് (ക്രൂഡ് ഓയില്‍) 42.86 ഡോളറാണ് വില. ഇന്നലെ 74.64 ഡോളറിലായിരുന്നു വ്യാപാരം. അതേസമയം 74.64 രൂപയിലാണ് ഡോളര്‍ വിനിമയം നടക്കുന്നത്. ഇന്നലെ 74.56 രൂപയിലായിരുന്നു ഡോളര്‍ വിനിമയം നടന്നത്.