ഒമാൻ കടലിൽനിന്നും എണ്ണക്കപ്പൽ ഇറാൻ പിടിച്ചെടുത്തു; ക്രൂഡോയിൽ വിപണി കലങ്ങിമറിയുമോ?

പശ്ചിമേഷ്യൻ സംഘർഷം കൂടുതൽ മേഖലയിലേക്ക് വ്യാപിക്കുമോയെന്ന ആശങ്ക കനക്കുന്നു. ഒമാൻ പുറംകടലിലൂടെ ഇറാഖിൽ നിന്നുള്ള ക്രൂഡോയിൽ തുർക്കിയിലേക്ക് കൊണ്ടുപോകുകയായിരുന്ന എണ്ണക്കപ്പൽ ഇറാൻ പി‌‌ടിച്ചെടുത്തതോടെയാണ് ആശങ്ക ഉയരുന്നത്. കഴിഞ്ഞ വർഷം ഇറാന്റെ ക്രൂഡോയിൽ കടത്തുമ്പോൾ അമേരിക്ക ഇതേ കപ്പൽ പിടിച്ചെടുത്തിരുന്നു. ഇതിനുള്ള തിരിച്ചടിയായാണ് കഴിഞ്ഞ ദിവസം എണ്ണക്കപ്പൽ ഇറാൻ പിടിച്ചെടുത്തതെന്നാണ് വിലയിരുത്തൽ. ഇതോടെ ക്രൂഡോയിൽ വിലയും ഉയർന്നു. വ്യാഴാഴ്ചത്തെ വ്യാപാരത്തിനൊ‌ടുവിൽ ഒരു ശതമാനം വർധനയാണ് പ്രധാനപ്പെട്ട ക്രൂഡോയിൽ കോൺട്രാക്‌ടുകളിൽ രേഖപ്പെടുത്തിയത്. ബ്രെന്റ് ക്രൂഡോയിൽ ഫ്യൂച്ചേഴ്സ് 0.8 ശതമാനം വർധനയോടെ 77.41 ഡോളറിലും യുഎസ് ഡബ്ല്യുടിഐ ക്രൂഡോയിൽ ഫ്യൂച്ചേഴ്സ് 0.9 ശതമാനം ഉയർന്ന് 72.02 ഡോളറിലുമാണ് വ്യാപാരം അവസാനിപ്പിച്ചത്.


ഒമാൻ കടലിൽനിന്നും എണ്ണക്കപ്പൽ ഇറാൻ പിടിച്ചെടുത്തെന്ന വാർത്ത പുറത്തുവന്ന ആദ്യ ഘട്ടത്തിൽ ക്രൂഡോയിൽ വിലയിൽ രണ്ട് ശതമാനത്തിലധികം വർധന കുറിച്ചിരുന്നു. എന്നാൽ വിപണി പൊതുവിൽ പ്രതീക്ഷിച്ചിരുന്നതിലും ഉയർന്ന നിലയിൽ അമേരിക്കയുടെ പണപ്പെരുപ്പം പുറത്തുവന്നതോടെ ക്രൂഡോയിൽ വില താഴുകയായിരുന്നു. യുഎസ് ഫെഡറൽ റിസർവ് പലിശ നിരക്കുകൾ താഴ്ത്തിത്തുടങ്ങുന്നത് ഇനിയും വൈകിയേക്കുമെന്ന ആശങ്കയാണ് കാരണം.

അയോധ്യയിലേക്ക് തീർത്ഥാടകർ എത്തുമ്പോൾ നേട്ടമുണ്ടാക്കുന്ന 5 ഓഹരികൾ
ഇതിനോടൊപ്പം ലോകത്തെ ഏറ്റവും വലിയ ക്രൂഡോയിൽ ഇറക്കുമതി രാജ്യമായ ചൈനയിൽ നിന്നും കുറഞ്ഞ തോതിലുള്ള ക്രൂഡോയിൽ ഓർഡറാണ് ഇത്തവണ സൗദി അറേബ്യയ്ക്ക് ലഭിച്ചതെന്ന വാർത്തയും തിരിച്ചടിയായി. കഴിഞ്ഞ 13 മാസത്തിനിടയിലെ താഴ്ന്ന നിരക്കാണ് ഫെബ്രുവരി മുതൽ വിപണിയിലേക്ക് എത്തിക്കുന്ന ക്രൂഡോയിലിന്റെ വിൽപന വിലയായി സൗദി അറേബ്യ നിശ്ചയിച്ചിട്ടുള്ളത്. ചൈനയുടെ സാമ്പത്തിക പ്രതിസന്ധിയാണ് ക്രൂഡോയിൽ ആവശ്യകത താഴ്ത്തുന്നതെന്ന നിഗമനമാണ് കാരണം.

ഈ നാല് അബദ്ധങ്ങൾ ഒഴിവാക്കുക; ഇഎംഐ ലോൺ ബാധ്യതയാകില്ല
പെട്രോൾ, ഡീസൽ നിരക്ക്

ഇന്ത്യയിലെ വാഹന ഇന്ധന നിരക്കുകളിൽ വെള്ളിയാഴ്ചയും പൊതുവായുള്ള വർധന റിപ്പോർട്ട് ചെയ്തിട്ടില്ല. ഡൽഹി, ഉത്തർപ്രദേശ്, പഞ്ചാബ് തുടങ്ങിയ സംസ്ഥാനങ്ങളിൽ 96 രൂപ നിലവാരത്തിലും കർണാടകയിൽ 102 രൂപ നിലവാരത്തിലും പെട്രോൾ നിരക്ക് മാറ്റമില്ലാതെ തുടരുന്നു. അതുപോലെ രാജ്യത്തെ മറ്റ് സംസ്ഥാനങ്ങളിലും പ്രധാന നഗരങ്ങളിലും 106 രൂപ നിലവാരത്തിലാണ് പെട്രോൾ നിരക്ക് തുടരുന്നത്. കേരളത്തിൽ ഒരു ലിറ്റർ പെട്രോളിന്റെ നിരക്ക് 108 - 109 രൂപയും ഒരു ലിറ്റർ ഡീസലിന്റെ നിരക്ക് 96- 98 രൂപയിലും മാറ്റമില്ലാതെ തുടരുന്നു.