ഇന്ധനവില കിതക്കാതെ കുതിക്കുന്നു; ഡീസല്‍ വില 81 ലേക്ക്

തിരുവനന്തപുരം: സംസ്ഥാനത്ത് പെട്രോൾ ഡീസൽ വില ഇന്നും വര്‍ധിച്ചു. പെട്രോളിന് തലസ്ഥാനത്ത് 87 രൂപ കടന്നു. ഡീസല്‍വില ഉടന്‍ തന്നെ 81 ലേക്ക് എത്തുമെന്നാണ് വിലയിരുത്തല്‍. ഇന്ന് പെട്രോളിന് 15 പൈസയും ഡീസലിന് 21 പൈസയുമാണ് വര്‍ധിച്ചിരിക്കുന്നത്. ദിനപ്രതിയുള്ള വര്‍ധനവും കേന്ദ്ര-സംസ്ഥാന സര്‍ക്കാരിന്‍റെ മൗനവും ജനത്തെ ആശങ്കയിലാക്കിയിരിക്കുകയാണ്.

തിരുവനന്തപുരത്ത് പെട്രോള്‍ ലിറ്ററിന് 87.4 രൂപയും ഡീസല്‍ ലിറ്ററിന്
80.75 രൂപയുമാണ് വില. കൊച്ചിയില്‍ പെട്രോളിന് 85.88 രൂപയും ഡീസലിന് 79.22 രൂപയുമാണ്.

കോഴിക്കോട് പെട്രോളിന് 86.25 രൂപയിലും ഡീസലിന് 79.59 രൂപയിലുമാണ് വ്യാപാരം പുരോഗമിക്കുന്നത്. സാംസ്കാരിക നഗരത്തിൽ പെട്രോളിന് 86.47 രൂപയും ഡീസലിന് 79.77 രൂപയുമാണ് വില.

രാജ്യാന്തര വിപണിയിൽ എണ്ണവില വ്യതിയാനമുണ്ടാകുന്നതിന്‍റെ പ്രതിഫലനമായാണ് ഇന്ത്യയിലും പെട്രോൾ-ഡീസൽ വിലയിൽ മാറ്റമുണ്ടാകുന്നത്. കഴിഞ്ഞ ജൂലൈ ഒന്നിനു പെട്രോളിന് 78.63 രൂപയും ഡീസലിന് 72.14 രൂപയുമായിരുന്നു. ജൂണില്‍ ഒന്നിനു പെട്രോളിന് 81.44 രൂപയും ഡീസലിന് 74.05 രൂപയുമായിരുന്നു.