Petrol Rate: സംസ്ഥാനത്ത് പെട്രോൾ, ഡീസൽ വിലയിൽ നേരിയ കുറവ്

തിരുവനന്തപുരം: സംസ്ഥാനത്ത് പെട്രോൾ, ഡീസൽ വിലയിൽ നേരിയ കുറവ്. പെട്രോളിന് എട്ട് പൈസയും ഡീസലിന് അഞ്ച് പൈസയും കുറഞ്ഞു. പെട്രോള്‍ ലിറ്ററിന് 76.332 രൂപയും ഡീസൽ ലിറ്ററിന് 70.947 രൂപയിലുമാണ് വ്യാപാരം ആരംഭിച്ചിരിക്കുന്നത്. ആഗോള വിപണിയിലെ വ്യതിയാനങ്ങളാണ് ആഭ്യന്തര വിപണിയിലും പ്രതിഫലിച്ചത്.

ഇന്നലെ പെട്രോളിന് 11 പൈസയും ഡീസലിന് ആറ് പൈസയും കുറഞ്ഞിരുന്നു. ഈ മാസം ഇന്ധനവിലയിൽ വൻ വ്യതിയാനങ്ങള്‍ ദൃശ്യമായിരുന്നു. ഒക്ടോബറിലെ ആദ്യ ദിവസം മാത്രമാണ് ഇന്ധനവില വര്‍ധിച്ചത്. എന്നാൽ കഴിഞ്ഞ മാസം ഇന്ധനവിലയിൽ വൻ വ‍ര്‍ധനവാണ് ഉണ്ടായത്. ആഗോള വിപണിയിലെ എണ്ണ വിലയിൽ ഉണ്ടായ വ്യതിയാനമാണ് ഇതിന് കാരണം.

നേരത്തെ കേന്ദ്ര സര്‍ക്കാരിൻ്റെ ആദ്യ ബജറ്റിൽ എക്സൈസ് നികുതിയും സെസും വര്‍ധിപ്പിച്ചതിനെ തുടര്‍ന്നാണ് ഇന്ധനവില കുത്തനെ ഉയര്‍ന്നത്. ഇന്ധന നിരക്കിൽ ഒരു രൂപ വീതം എക്സൈസ് നികുതിയും റോഡ് അടിസ്ഥാന സൗകര്യ സെസുമാണ് കേന്ദ്ര സർക്കാർ ചുമത്തിയത്.

തിരുവനന്തപുരത്ത് പെട്രോള്‍ ലിറ്ററിന് 76.33 രൂപയിലും ഡീസൽ ലിറ്ററിന് 70.95 രൂപയിലുമാണ് ഇന്ന് വ്യാപാരം നടക്കുന്നത്. കൊച്ചിയിൽ പെട്രോള്‍ ലിറ്ററിന് 75 രൂപയും ഡീസൽ 69.6 രൂപയുമാണ്. കോഴിക്കോട് പെട്രോൾ ലിറ്ററിന് 75.33 രൂപയും ഡീസൽ ലിറ്ററിന് 69.93 രൂപയുമാണ് ഇന്നത്തെ നിരക്ക്.

രാജ്യതലസ്ഥാനമായ ഡൽഹിയിൽ പെട്രോളിന് 72.98 രൂപയും ഡീസലിന് 65.95 രൂപയുമാണ്. രാജ്യവ്യാപാര തലസ്ഥാനമായ മുംബൈയിൽ പെട്രോളിന് 78.6 രൂപയും ഡീസലിന് 69.11 രൂപയുമാണ് വില നിലവാരം.

വിവിധ നഗരങ്ങളിലെ ഇന്ധനവില അറിയാം:



ആഗോള വിപണിയിലെ ക്രൂഡ് ഓയിൽ വിലയും ഡോളര്‍ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിര്‍ണയിക്കുന്നത്. ഇന്ന് ഒരു ബാരൽ ക്രൂഡ് ഓയിലിന് 62.03 ഡോളറാണ് വില. അതേസമയം ഇന്ന് ഡോളര്‍ 70.84 രൂപയിലാണ് വിനിമയം നടക്കുന്നത്.