കേരളത്തില്‍ നാളെ പെട്രോള്‍ ലിറ്ററിന് 105 കടക്കാന്‍ സാധ്യത

കൊച്ചി: പതിവു തെറ്റിയില്ല, ഇന്ധനവില ഇന്നും കുതിച്ചു. രാജ്യത്ത് പെട്രോള്‍- ഡീസല്‍ വില പ്രതിദിനം റെക്കോഡ് കുറിക്കുന്ന അവസ്ഥയാണ് നിലവിലുള്ളത്. രാജ്യാന്തര വിപണിയില്‍ എണ്ണവിലക്കയറ്റം തന്നെയാണു പ്രാദേശിക സൂചികകള്‍ക്കും ഭീഷണി. ഡോളറിനെതിരേ രൂപ നഷ്ടത്തിലാകുന്നതും തിരിച്ചടി തന്നെ. ഈ മാസം എല്ലാ ദിവസങ്ങളിലും ഇന്ധനവില വര്‍ധിച്ചിരുന്നു. ഇന്ന് പെട്രോള്‍ ലിറ്ററിന് 25 പൈസയും ഡീസല്‍ ലിറ്ററിന് 32 പൈസയുമാണ് വര്‍ധിച്ചത്. തിരുവനന്തപുരത്ത് ഒരു ലിറ്റര്‍ പെട്രോളിന് 104.88 രൂപയും ഡീസലിന് 97.98 രൂപയുമാണ് വില. എട്ടു ദിവസംകൊണ്ട് പെട്രോള്‍ ലിറ്ററിന് 1.46 രൂപയും ഒമ്പതു ദിവസംകൊണ്ട് ഡീസല്‍ ലിറ്ററിന് 2.11 രൂപയും ഇതുവരെ വര്‍ധിച്ചു. നിലവിലെ വർധന നാളെയും തുടർന്നാൽ കേരളത്തിൽ പെട്രോൾ ലിറ്ററിന് 105 കടക്കും.

രാജ്യാന്തര എണ്ണവിലക്കയറ്റം പ്രാദേശിക ഇന്ധനവില കുതിക്കാന്‍ വഴിവയ്ക്കുമെന്നാണു നിഗമനം. ഇന്ധനവില നിര്‍ണയ അധികാരം സര്‍ക്കാര്‍ തിരിച്ചെടുക്കണമെന്ന ആവശ്യം ശക്തമാകുന്നുണ്ട്. 21 ദിവസത്തെ ഇടവേളയ്ക്കു ശേഷം ഇക്കഴിഞ്ഞ 28-നാണ് പെട്രോള്‍ വില ഉയര്‍ന്നത്. രാജ്യാന്തര എണ്ണവിലയ്ക്കനുസരിച്ച് ദിനംപ്രതി പ്രാദേശിക വില മാറുന്ന രീതിയാണു നിലവില്‍ ഇന്ത്യയില്‍ അവലംബിക്കുന്നത്. 15 ദിവസത്തെ ശരാശരിയുടെ അടിസ്ഥാനത്തിലാണ് വില നിര്‍ണയിക്കുന്നത്.

Alos Read: ആസ്തികൾ മറച്ചവരിൽ സച്ചിൻ, അനിൽ അംബാനി, നീരവ് മോദിയുടെ സഹോദരിയും: പണ്ടോറ പേപ്പർ

വിവിധ നഗരങ്ങളിലെ ഇന്ധനവില

മെട്രോ നഗരമായ ഡല്‍ഹിയില്‍ പെട്രോളിന് 102.64 രൂപയാണ് വില. ഡീസലിന് 91.07 രൂപയും. മുംബൈയില്‍ ഒരു ലിറ്റര്‍ പെട്രോളിന് 108.67 രൂപയാണ് വില. ഡീസലിന് 98.80 രൂപയും. മെയ് 29 മുതലാണ് നഗരത്തില്‍ പെട്രോള്‍ വില 100 രൂപ കടന്നത്.

തിരുവനന്തപുരത്ത് ഒരു ലിറ്റര്‍ പെട്രോളിന് 104.88 രൂപയും ഡീസല്‍ ലിറ്ററിന് 97.98 രൂപയുമാണ് വില . ജൂണ്‍ 26 മുതലാണ് ഇവിടെ പെട്രോള്‍ വില 100 രൂപ കടന്നത്. കൊച്ചിയില്‍ പെട്രോള്‍ ലിറ്ററിന് 102.61 രൂപയാണ് വില. ഡീസല്‍ ലിറ്ററിന് 95.81 രൂപയാണ്. കോഴിക്കോട് ഈ മാസം അഞ്ചിനാണ് പെട്രോള്‍ വില 100 രൂപയില്‍ എത്തിയത്. ഒരു ലിറ്റര്‍ പെട്രോളിന് ഇന്ന് 103.04 രൂപയും ഡീസലിന് 96.26 രൂപയുമാണ്.

ക്രൂഡ് ഓയില്‍ വില

രാജ്യാന്തര എണ്ണവിലക്കയറ്റമാണ് പ്രാദേശിക വിപണികള്‍ക്കു തലവേദനയാകുന്നത്. ഒരാഴ്ചയ്ക്കിടെ രാജ്യാന്തര വിപണിയില്‍ എണ്ണവിലയില്‍ ഒമ്പതു ഡോളറിനടുത്താണു വില വര്‍ധിച്ചത്. നലവില്‍ ഒരു ബാരലിന് 79.28 ഡോളറാണ്. സൗദി, ഏഷ്യന്‍ വിപണികള്‍ക്കുള്ള എണ്ണവില കുറച്ചെങ്കിലും ഇതിന്റെ പ്രയോജനം ഉപഭോക്താക്കള്‍ക്ക് ലഭിച്ചിട്ടില്ല.

രാജ്യാന്തര വിപണിയില്‍ ഒപെക് രാജ്യങ്ങള്‍ എണ്ണ ഉല്‍പ്പാദനം കുറയ്ക്കുകയാണ്. ഈ രാജ്യങ്ങള്‍ ഉടനടി ഉല്‍പ്പാദനം വര്‍ധിപ്പിക്കില്ലെന്നാണു സൂചന. ഇതു എണ്ണവില ഉയരാന്‍ കാരണമായേക്കാം. കഴിഞ്ഞയാഴ്ച ബാരലിന് 70 ഡോളറിനടുത്തായിരുന്നു വില. ഡോളറിനെതിരേ രൂപയുടെ മൂല്യം ഇടിയുന്നതും പ്രാദേശിക എണ്ണവില കൂടാന്‍ കാരണമാണ്. നിലവില്‍ 74.56ലാണ് രൂപയുടെ വിനിമയം നടക്കുന്നത്. ഇന്നലെ ഇത് 74.19 രൂപയായിരുന്നു.