തുടർച്ചയായ അഞ്ചാംദിവസവും പെട്രോൾ, ഡീസൽ വിലയിൽ വർധന

കൊച്ചി: രാജ്യത്ത് തുടർച്ചയായ അഞ്ചാംദിവസവും പെട്രോൾ, ഡീസൽ വില ഉയർന്നു. വിവിധ നഗരങ്ങളിൽ പെട്രോളിന് 6 പൈസയും ഡീസലിന് 17 പൈസയുമാണ് ഉയർന്നത്. അഞ്ച് ദിവസംകൊണ്ട് 70 പൈസയാണ് പെട്രോളിന് വർധിച്ചത്. ഡീസലിന് ഒരു രൂപ 15 പൈസയും. മറ്റ് സംസ്ഥാനങ്ങളെ അപേക്ഷിച്ച് കേരളത്തിലാണ് ഇന്ധന വിലയിൽ ഏറ്റവും കൂടുതൽ വർധനയുണ്ടായത്.

സംസ്ഥാനത്ത് ഒരു ലിറ്റർ പെട്രോളിന് ഇന്ന് 83.59 രൂപയാണ് വില. ഡീസലിന് 77.06 രൂപയുമാണ് ഇന്നത്തെ വില. വിവിധ ജില്ലകളുടെ കണക്കെടുത്ത് നോക്കുമ്പോൾ, തിരുവനന്തപുരത്ത് ഇന്ന് ഒരു ലിറ്റർ പെട്രോളിന് 83.59 രൂപയും ഡീസലിന് 77.06 രൂപയാണ് വില. കൊച്ചിയിൽ പെട്രോളിന് 81.78 രൂപയാണ് വില. ഡീസലിന് 75.35 രൂപയും. കോഴിക്കോട് 82.12 രൂപയാണ് ഒരു ലിറ്റർ പെട്രോളിന് ഇന്നത്തെ വില. ഡീസലിന് 75.71 രൂപയും.

Also Read: പഴയ ഒരു കാര്‍ വാങ്ങണോ? ഏറ്റവും നല്ല ലോൺ ഏതാണ്?

രാജ്യതലസ്ഥാനമായ ഡൽഹിയിൽ പെട്രോൾ വില 81.59 രൂപയായി. ഡീസലിന് ഇന്ന് 71.41 രൂപയാണ് വില. മുംബൈയിൽ ഒരു ലിറ്റർ പെട്രോളിന് 88.29 രൂപയും ഡീസലിന് 77.90 രൂപയുമാണ് ഇന്നത്തെ വില.

വിവിധ നഗരങ്ങളിൽ ഡീസലിന്റെ വിലയാണ് കുത്തനെ ഉയർന്നത്. ഒക്ടോബറിൽ രാജ്യത്തെ ഇന്ധന ഉപയോഗം കഴിഞ്ഞവർഷത്തേക്കാൾ ഉയർന്നിട്ടുണ്ട്. ഉത്സവ സീസണിൽ സീഡൽ ഉപയോഗത്തിലുണ്ടായ കുതിച്ചുച്ചാട്ടമാണ് ഇതിന് കാരണം. നിലവിൽ ഡീസൽ ഉപയോഗം ഒരു വർഷത്തിനിടയിലെ ഏറ്റവും ഉയർന്ന നിലയിലാണുള്ളത്. ഒക്ടോബർ മുതൽ ഇന്ധന വില മാറ്റമില്ലാതെ തുടരുകയായിരുന്നു. പൊതുമേഖല എണ്ണ കമ്പനികൾ ഇന്ധന വില സ്ഥിരമായി നിലനിർത്തിയതാണ് ഇതിന് കാരണം.

Also Read: വയസ്സ് 22; കാച്ചെണ്ണയും കണ്‍മഷിയും വിറ്റ് സ്വന്തമായി ഒരു ബ്രാൻഡ് പടുത്തുയര്‍ത്തി അൻസിയ


ആഗോള വിപണിയിലെ ക്രൂഡ് ഓയിൽ വിലയും ഡോളർ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിർണയിക്കുന്നത്. ഇന്ന് ഒരു ബാരൽ അസംസ്‌കൃത എണ്ണയ്ക്ക് (ക്രൂഡ് ഓയിൽ) ഇന്ന് 46.52 ഡോളറാണ് വില. 74.18 രൂപയിലാണ് ഇന്ന് ഡോളർ വിനിമയം നടക്കുന്നത്.