പുതിയ റെക്കോർഡിൽ ഇന്ധന വില; പെട്രോൾ, ഡീസൽ വില ഇന്നും കൂടി

കൊച്ചി: രാജ്യത്ത് പെട്രോൾ, ഡീസൽ വിലയിൽ വീണ്ടും വർധന. വിവിധ നഗരങ്ങളിൽ പെട്രോളിന് 25 പൈസയും ഡീസലിന് 26 പൈസയുമാണ് കൂടിയത്. രണ്ടാഴ്ച്ചക്കിടെ ഏഴാമത്തെ തവണയാണ് ഇന്ധന വില ഉയരുന്നത്. പെട്രോളിന് രണ്ട് രൂപ 11 പൈസയും ഡീസലിന് രണ്ട് രൂപ‌ 26 പൈസയുമാണ് ഇതുവരെ കൂടിയത്. കേരളത്തിൽ പെട്രോള്‍, ഡീസൽ വില സര്‍വകാല റെക്കോര്‍ഡിലെത്തിയിരിക്കുകയാണ്. ഒരു ലിറ്റർ പെട്രോളിന് ഇന്ന് 88.33 രൂപയാണ് വില. ഡീസലിന് 82.42 രൂപയും.

രാജ്യത്തെ ചില്ലറ ഇന്ധന വില ഇപ്പോൾ 2018 ഒക്ടോബറിന് ശേഷമുള്ള ഏറ്റവും ഉയർന്ന നിരക്കിലാണ്. പെട്രോളിന് അന്ന് 85 രൂപ 99 പൈസ ആയിരുന്നു. ഈ സര്‍വകാല റെക്കോര്‍ഡാണ് ഇന്ന്‌ മറികടന്നത്. കൊച്ചിയിൽ പെട്രോളിന് 86.42 രൂപയാണ് വില. ഡീസലിന് 80.59 രൂപയും. കോഴിക്കോട് 86.78 രൂപയാണ് ഒരു ലിറ്റർ പെട്രോളിന് ഇന്നത്തെ വില. ഡീസലിന് 80.97 രൂപയും.

Also Read: ടിക് ടോക്കിനെ ഇനി പ്രതീക്ഷിക്കേണ്ട, ചൈനീസ് ആപ്ലിക്കേഷനുകൾ സ്ഥിരമായി നിരോധിക്കാനൊരുങ്ങി ഇന്ത്യ

ഡൽഹി, മുംബൈ തുടങ്ങിയ രാജ്യത്തെ പ്രധാന നഗരങ്ങളിലെല്ലാം ഇന്ധന വില റെക്കോർഡുകൾ തകർത്തു കഴിഞ്ഞിരിക്കുകയാണ്. ഡൽഹിയിൽ ഒരു ലിറ്റര്‍ പെട്രോളിന് 86.30 രൂപയാണ് വില. ഡീസലിന് 76.48 രൂപയാണ് വില. മുംബൈയിൽ പെട്രോളിനും ഡീസലിനും തീവിലയാണ്. ഒരു ലിറ്റർ പെട്രോളിന് 92.86 രൂപയാണ് ഇന്നത്തെ വില. ഡീസലിന് 83.30 രൂപയും.


ആഗോള അസംസ്കൃത എണ്ണയുടെ വിലക്കയറ്റവും പെട്രോളിയം ഉൽ‌പന്നങ്ങളുടെ ആവശ്യകത ഉയർന്നതും കൊവിഡ് -19 നുള്ള വാക്സിൻ ലഭിക്കാനുള്ള സാധ്യതയുമാണ് ഇന്ധന വില വർദ്ധിക്കാനുള്ള പ്രധാന കാരണങ്ങൾ. കൂടാതെ അന്താരാഷ്ട്ര വിപണിയില്‍ ക്രൂഡ് ഓയിലിന് വില കുറഞ്ഞെങ്കിലും എണ്ണക്കമ്പനികള്‍ വില വര്‍ധിപ്പിക്കുന്നതും ഇന്ധനവില വര്‍ധനവിന് കാരണമാകുന്നു.

ആഗോള വിപണിയിലെ ക്രൂഡ് ഓയിൽ വിലയും ഡോളർ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിർണയിക്കുന്നത്. ആഗോള ക്രൂഡ് ഓയിൽ വിലയും കുതിച്ചുയരുകയാണ്. ഇന്ന് ഒരു ബാരൽ അസംസ്‌കൃത എണ്ണയ്ക്ക് (ക്രൂഡ് ഓയിൽ) ഇന്ന് 56.15 ഡോളറാണ് വില. 72.96 രൂപയിലാണ് ഇന്ന് ഡോളർ വിനിമയം നടക്കുന്നത്.