Petrol Price in Kerala: ഇന്ധന വില താഴേക്കുതന്നെ; പെട്രോളിന് 41 പൈസയും ഡീസലിന് 45 പൈസയും ഇന്നു കുറഞ്ഞു

തിരുവനന്തപുരം: സംസ്ഥാനത്ത് ഇന്ധന വില ഇന്നും കുറഞ്ഞു. പെട്രോളിന് 41 പൈസയും ഡീസലിന് 45 പൈസയും വീതമാണ് ഇന്ന് കുറഞ്ഞിരിക്കുന്നത്. അതേസമയം ഇന്നലെ ഇന്ധനവിലയില്‍ മാറ്റങ്ങളൊന്നും രേഖപ്പെടുത്തിയിരുന്നില്ല.

അഞ്ച് സംസ്ഥാനങ്ങളിലെ തെരഞ്ഞെടുപ്പ് സംബന്ധിച്ച് കഴിഞ്ഞയിടെ തുടര്‍ച്ചയായി ഇന്ധനവിലയിൽ ഇടിവുണ്ടാകുന്നുണ്ടായിരുന്നു.. അഞ്ച് സംസ്ഥാനങ്ങളിൽ നടക്കുന്ന തെരഞ്ഞെടുപ്പ് മുന്നിൽ കണ്ടാണ് കേന്ദ്രം ഇന്ധന വില കുറയ്ക്കുന്നതെന്നാണ് പരക്കെയുള്ള ആക്ഷേപം. എന്നാല്‍ ആഗോള വിപണിയിൽ എണ്ണ വില ഇടിയുന്നതാണ് ഇന്ധന വില കുറയാൻ കാരണം.

അടുത്തിടെയായി താരതമ്യേന വലിയ ഇടിവാണ് ഇന്ധന വിലയിൽ ഉണ്ടായിക്കൊണ്ടിരിക്കുന്നത്. കഴിഞ്ഞ ഒന്നര മാസത്തിലേറെയായി ഇന്ധന വിലയില്‍ നിരന്തരം കുറവ് രേഖപ്പെടുത്തുന്നുണ്ട്.

കൊച്ചിയില്‍ ഒരു ലിറ്റര്‍ പെട്രോളിന് ഇന്നത്തെ വില 73.22 രൂപയാണ്. ഒരു ലിറ്റര്‍ ഡീസലിന് 69.51 രൂപയാണ്. തിരുവനന്തപുരത്ത് ഒരു ലിറ്റര്‍ പെട്രോളിന് 74.52 രൂപയും ഡീസല്‍ ലിറ്ററിന് 70.86 രൂപയുമാണ്. കോഴിക്കോട് പെട്രോള്‍, ഡീസൽ വില യഥാക്രമം 73.54 രൂപ, 69.84 രൂപ എന്നിങ്ങനെയാണ് വ്യാപാരം പുരോഗമിക്കുന്നത്.

അതേസമയം ഡൽഹിയിൽ പെട്രോളിന് 71.32 രൂപയും ഡീസലിന് 65.96 രൂപയുമാണ്. വ്യാപാര തലസ്ഥാന നഗരമായ മുംബൈയിൽ പെട്രോളിന് 76.9 രൂപയും ഡീസലിന് 69.01 രൂപയുമാണ്.